ပလိၵ်ႈထႆး တီႉၺွပ်းလႆႈယႃႈမ ၸွမ်းလႅၼ်လိၼ် တႆး−ထႆး ထႅင်ႈတင်းၼမ်

ပလိၵ်ႈၽၢႆႇၽဵဝ်ႈမူၺ်ႉယႃႈမဝ်းၵမ်ထႆး တီႉၺွပ်းလႆႈယႃႈမ ဢၼ်လုၵ်ႉတီႈလႅၼ် လိၼ် တႆး−ထႆး သေ ဢၢၼ်းတေႃႉသူင်ႇၶဝ်ႈၵႂႃႇၼႂ်းဝဵင်းၵဵင်းမႆႇ မိူင်းထႆးတင်းၼမ်။

မိူဝ်ႈဝၼ်းထီႉ 8 January 2024 (လိူၼ်ၸဵင်လွင်ႈ 12 ၶမ်ႈ ပီႊတႆး 2118 ၼီႈ) ယၢမ်းၵၢင် ၶိုၼ်းမွၵ်ႈ 23:30 မူင်းၼၼ်ႉ ပလိၵ်ႈၽၢႆႇၽဵဝ်ႈမူၺ်ႉယႃႈမဝ်းၵမ်ထႆး လႆႈႁပ်ႉၶၢဝ်ႇတေ မီးလွင်ႈတေႃႉသူင်ႇယႃႈၼႆလႄႈ ၸင်ႇလႆႈၵႂႃႇပႂ်ႉၵူတ်ႇထတ်းၸွမ်းႁိမ်းႁွမ်းပႃႇႁဵဝ်ႈ ဝၢၼ်ႈရိမ်းၵူၵ်း ပွၵ်ႉ 4 ဢိူင်ႇမႄႈယၢဝ်း ၸႄႈဝဵင်းၵဵင်းႁၢႆး ၸႄႈတွၼ်ႈၵဵင်းႁၢႆး မိူင်းထႆး သေ ထူပ်းႁၼ်ၵႃး 3 လမ်း ဢၢၼ်းလတ်းၽၢၼ်ႇၼႂ်းပိုၼ်ႉတီႈၼၼ်ႈ ၵူၺ်းသမ်ႉႁၼ် ပလိၵ်ႈထႆးလႄႈ ဢွၼ်ၵၼ်ႁေႃႈပၢႆႈ ၽၢႆႇတၢင်းပလိၵ်ႈထႆးၵေႃႈ လႆႈလမ်းၸွမ်း တေႃႇပေႃးထူပ်းႁၼ်ၵႃး ဢၼ်ၵိုတ်းဝႆႉၸွမ်းတၢင်းလႄႈ ၸင်ႇလႆႈၶဝ်ႈၵူတ်ႇထတ်း ထူပ်းႁၼ်ထူင်ၵေႃႇၸၢၼ်ႈ 52 ထူင် ဢၼ်သႂ်ႇယႃႈမဝႆႉၼႂ်းမၼ်းတင်းမူတ်း 6,000,000 မဵတ်ႉ ဝႃႈၼႆ။

ၼွၵ်ႈလိူဝ်သေၼႆႉ ပလိၵ်ႈထႆး ယင်းယိုတ်းသိမ်းလႆႈပႃးၵႃးထႅင်ႈ 1 လမ်း ႁူမ်ႈပဵၼ် 2 လမ်း လႄႈ ၼႂ်းၵႃးၼၼ်ႉၵေႃႈ လႆႈမီးၽိုၼ်လိၵ်ႈၽိုၼ်လၢႆးဢၼ်လွင်ႈယႂ်ႇထႅင်ႈတင်း ၼမ်သေ ၵဵဝ်ႇလူၺ်ႈယႃႈမဝ်းၵမ် တင်း ၵႃး ဢၼ်ယိုတ်းသိမ်းလႆႈပွၵ်ႈၵမ်းၼႆႉ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် တေႁဵတ်းသၢင်ႈၵႂႃႇၸွမ်းၼင်ႇမၢႆမီႈၸိုင်ႈမိူင်းမီး ၼၼ်ႉ ဝႃႈၼႆ။

တႆးလွတ်ႈလႅဝ်း