သိုၵ်းထႆး ပိုတ်းယိုဝ်း ၸုမ်းၵႃႉယႃႈမဝ်းၵမ် ၸွမ်းလႅၼ်လိၼ် တႆး−ထႆး ထႅင်ႈ

ၸုမ်းၵႃႉၶၢႆယႃႈမဝ်းၵမ် လၵ်ႉလွမ်တေႃႉယႃႈမဝ်းၵမ်ၶၢမ်ႈလႅၼ်လိၼ် ၶဝ်ႈၵႂႃႇၼႂ်းမိူင်းထႆးလႄႈ မီးလွင်ႈပိုတ်းယိုဝ်းၸွမ်းသိုၵ်းထႆးထႅင်ႈ။

မိူဝ်ႈဝႃးဝၼ်းထီႉ 12 January 2024 (လိူၼ်ၵမ်မႂ်ႇ 2 ၶမ်ႈ ပီႊတႆး 2118 ၼီႈ) ၼၼ်ႉ သိုၵ်းထႆး လႆႈဢွၵ်ႇလဵပ်ႈယၢမ်း ၵူတ်ႇထတ်းၸွမ်းလႅၼ်လိၼ် တႆး−ထႆး ဢၼ်မီးၼႂ်း ပိုၼ်ႉတီႈ ဝၢၼ်ႈပၢင်းသႅၼ်ၶိူဝ်း ဢိူင်ႇမႃႈလိၵႃ ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ မိူင်းထႆး ဝၢႆးၼၼ်ႉ ၸင်ႇလႆႈထူပ်းႁၼ်ၵူၼ်း 5−7 ၵေႃႉ ဢၼ်ပႆယူႇ ႁၢင်လႅၼ် လိၼ်မွၵ်ႈ 1.3 ၵီႇလူဝ်ႇမီႇတိူဝ်ႇလႄႈ ၽၢႆႇတၢင်းသိုၵ်းတေဢၢၼ်းၶဝ်ႈၵူတ်ႇထတ်း ဝႃႈၼႆသေတႃႉ ၸိူဝ်းၶဝ်သမ်ႉပိုတ်းယိုဝ်းသိုၵ်းထႆးဢွၼ်တၢင်းလႄႈ သွင်ၽၢႆႇပိုတ်း ယိုဝ်းၵၼ်ႁိုင်မွၵ်ႈ 10 မိၼိတ်ႉ ၼႆယဝ်ႉ။

ဝၢႆးသေသဵင်ႈၵွင်ႈယဵၼ်ၵႂႃႇယဝ်ႉၼၼ်ႉ ၽၢႆႇတၢင်းသိုၵ်းထႆး ၸင်ႇလႆႈၶဝ်ႈၵူတ်ႇထတ်း ၼႂ်းပိုၼ်ႉတီႈဢၼ်ပိုတ်းယိုဝ်းၵၼ်ၼၼ်ႉသေ ထူပ်းႁၼ်တူဝ်တၢႆ ၵူၼ်းတေႃႉသူင်ႇ ယႃႈမဝ်းၵမ် ၼွၼ်းတၢႆယူႇ 1 ၵေႃႉ၊ ၵွင်ႈယၢဝ်း 1 လမ်း သေဢမ်ႇၵႃး ထူပ်းႁၼ်ပႃးထူင်ၵေႃႇၸၢၼ်ႈ 4 ထူင် ဢၼ်သႂ်ႇယႃႈလမ်ဝႆႉၼႂ်းမၼ်း 45 ႁေႃႇ ႁူမ်ႈၼမ်ႉၼၵ်းယႃႈလမ် တင်းမူတ်း 72 ၵီႇလူဝ်ႇၵရမ်ႇ ဝႃႈၼႆ။

ၸွမ်းလႅၼ်လိၼ် တႆး−ထႆး ၼႆႉ ယွၼ်ႉၸုမ်းၵႃႉယႃႈမဝ်းၵမ် ၵႆႉလၵ်ႉလွမ်တေႃႉယႃႈ ၶၢမ်ႈလႅၼ်လိၼ်သေ ၶဝ်ႈၵႂႃႇၼႂ်းမိူင်းထႆးလႄႈ ၽၢႆႇတၢင်းၽူႈမီးပုၼ်ႈၽွၼ်း သိုၵ်းထႆးၶဝ် တေတိူဝ်းၽိူမ်ႉလွင်ႈၵူတ်ႇထတ်း ႁႂ်ႈၼႅၼ်ႈၼႃလိူဝ်ၵဝ်ႇ ၼႆယဝ်ႉ။

တႆးလွတ်ႈလႅဝ်း