ၸုမ်းၵႃႉယႃႈမဝ်းၵမ် ပိုတ်းယိုဝ်းၸွမ်း သိုၵ်းထႆး တီႈလႅၼ်လိၼ် တႆး−ထႆး ထႅင်ႈ

သိုၵ်းထႆး ဢွၵ်ႇလဵပ်ႈယၢမ်းၸွမ်းလႅၼ်လိၼ် တႆး−ထႆး သေ မီးလွင်ႈပိုတ်းယိုဝ်းၸွမ်း ၸုမ်းၵႃႉယႃႈမဝ်းၵမ် ဢၼ်လၵ်ႉတေႃႉယႃႈၶမ်ႈလႅၼ်လိၼ်ၼၼ်ႉထႅင်ႈ ဝႃႈၼႆ။

မိူဝ်ႈဝၼ်းထီႉ 15 January 2024 (လိူၼ်ၵမ်မႂ်ႇ 5 ၶမ်ႈ ပီႊတႆး 2118 ၼီႈ) ယၢမ်းၵၢင်ၶိုၼ်း ဢၼ်တေယၢင်ႈၶဝ်ႈဝၼ်းထီႉ 16 January 2024 ၼၼ်ႉ ၽၢႆႇတၢင်းသိုၵ်းထႆး လႆႈႁပ်ႉၶၢဝ်ႇဝႃႈ တေမီးလွင်ႈလၵ်ႉလွမ်တေႃႉယႃႈမဝ်းၵမ် ၶၢမ်ႈလႅၼ်လိၼ် တႆး−ထႆး တီႈလွႆႁူဝ်လူၼ်ႉ ဢၼ်မီးၼႂ်းပိုၼ်ႉတီႈ ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ မိူင်းထႆး ၸင်ႇလႆႈၵႂႃႇပႂ်ႉၵူတ်ႇထတ်းသေ ထူပ်းႁၼ်ၵူၼ်းဢၼ်မီးလွင်ႈထၢင်ႇထိူမ် မွၵ်ႈ 3 ၵေႃႉ လႄႈ ၽၢႆႇသိုၵ်းထႆး တေဢၢၼ်းၶဝ်ႈၵူတ်ႇထတ်း ၵူၺ်းၸိူဝ်းၶဝ်သမ်ႉ ပိုတ်းယိုဝ်းသႂ်ႇသိုၵ်းထႆးဢွၼ်တၢင်းသေ သွင်ၽၢႆႇၸင်ႇလႆႈပိုတ်းယိုဝ်းၵၼ်ႁိုင်မွၵ်ႈ 5 မိၼိတ်ႉၼႆႉ ဝႃႈၼႆ။

ဝၢႆးသေသဵင်ၵွင်ႈယဵၼ်ၵႂႃႇယဝ်ႉၼၼ်ႉ သိုၵ်းထႆးၸင်ႇလႆႈၶဝ်ႈၵုမ်းထိင်းၼႂ်းပိုၼ်ႉတီႈ ဢၼ်မီးလွင်ႈပိုတ်းယိုဝ်းၵၼ်ၼၼ်ႉသေ ထူပ်းႁၼ်ထူင်ၵေႃႇၸၢၼ်ႈ ဢၼ်သႂ်ႇယႃႈမ ဝႆႉၼႂ်းမၼ်းတႃႇ 2 ထူင် လႄႈ တေသိုပ်ႇၵူတ်ႇထတ်းၵႂႃႇထႅင်ႈ ဝႃႈၼႆ။

မိူဝ်ႈပူၼ်ႉမႃးၼၼ်ႉ သိုၵ်းထႆး ၵႆႉမီးလွင်ႈပိုတ်းယိုဝ်းၸွမ်း ၸုမ်းၵႃႉယႃႈမဝ်းၵမ် ၸွမ်းလႅၼ်လိၼ် တႆး−ထႆး ဢၼ်လွင်ႈယႂ်ႇသမ်ႉပဵၼ် မိူဝ်ႈႁၢင်ပီႊ 2023 လႄႈ လိူၼ် January 2024 ၼႆႉၵူၺ်း ၽၢႆႇတၢင်းသိုၵ်းထႆး ယိုတ်းသိမ်းလႆႈယႃႈမ ဢမ်ႇယွမ်း 20 လၢၼ်ႉမဵတ်ႉ၊ ယႃႈဢၢႆႉသ် 323 ၵီႇလူဝ်ႇၵရမ်ႇသေ ၸုမ်းၵႃႉယႃႈမဝ်းၵမ် ထုၵ်ႇသိုၵ်းထႆး ပိုတ်းယိုဝ်းလူႉတၢႆၵႂႃႇယဝ်ႉဢမ်ႇယွမ်း 19 ၵေႃႉ ဝႃႈၼႆ။

တႆးလွတ်ႈလႅဝ်း