ၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ်တင်းၼမ်

ၸဝ်ႈၼႃႈတီႈပလိၵ်ႈထႆး လႄႈ သိုၵ်းထႆး တီႉၺွပ်းလႆႈယႃႈမဝ်းၵမ် ဢၼ်လုၵ်ႉၼႂ်းမိူင်းတႆးသေ လၵ်ႉလွမ်တေႃႇသူင်ႇၶဝ်ႈၵႂႃႇၼႂ်းမိူင်းထႆး ၼၼ်ႉတင်းၼမ်။

မိူဝ်ႈဝၼ်းထီႉ 18 January 2024 (လိူၼ်ၵမ်မႂ်ႇ 8 ၶမ်ႈ ပီႊတႆး 2118 ၼီႈ) ၼၼ်ႉ သိုၵ်းထႆး ဢၼ်ဢွၵ်ႇလဵပ်ႈယၢမ်းတႃႇၵႅတ်ႇၶႄႁႄႉၵင်ႈလွင်ႈၽိတ်းမၢႆမီႈၸွမ်းလႅၼ်လိၼ် တႆး−ထႆး ဢၼ်မီးၼႂ်းပိုၼ်ႉတီႈ ဝၢၼ်ႈပႃႇသီ ဢိူင်ႇမႃႈလိၵႃ ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ မိူင်းထႆးၼၼ်ႉ ထူပ်းႁၼ်ၵူၼ်းဢၼ်မီးလွင်ႈထၢင်ႇထိူမ်သေ တေဢၢၼ်းၶဝ်ႈၵူတ်ႇထတ်း ၵူၺ်းၸိူဝ်းၶဝ်သမ်ႉပိုတ်းယိုဝ်းသႂ်ႇသိုၵ်းထႆးဢွၼ်တၢင်း လႄႈ သွင်ၽၢႆႇလႆႈပိုတ်းယိုဝ်းၵၼ်ႁိုင်မွၵ်ႈ 10 မိၼိတ်ႉၼႆႉ ဝႃႈၼႆ။

ဝၢႆးသေသဵင်ၵွင်ႈယဵၼ်ၵႂႃႇယဝ်ႉၼၼ်ႉ ၽၢႆႇတၢင်းသိုၵ်းထႆးၵေႃႈ လႆႈၶဝ်ႈၵူတ်ႇထတ်း ၼႂ်းပိုၼ်ႉတီႈဢၼ်ပိုတ်းယိုဝ်းၵၼ်ၼၼ်ႉသေ ထူပ်းႁၼ်ထူင်ၵေႃႇၸၢၼ်ႈ 5 ထူင် ၼႂ်းၼၼ်ႉတႃႇ 3 ထူင် သႂ်ႇယႃႈမဝႆႉ ႁူမ်ႈ 300,000 မဵတ်ႉ၊ ထႅင်ႈ 2 ထူင်သမ်ႉ ပဵၼ်ယႃႈလမ် ႁူမ်ႈ 20 ႁေႃႇ ဢမ်ႇၼၼ် 20 ၸွႆႉ ၼႆယဝ်ႉ။

ၼွၵ်ႈလိူဝ်သေၼႆႉ မိူဝ်ႈဝၼ်းထီႉ 17 January 2024 ၼၼ်ႉၵေႃႈ ပလိၵ်ႈထႆး တီႉၺွပ်း လႆႈယႃႈမ တီႈလၢၼ်ႇၵူတ်ႇထတ်း ဝၢၼ်ႈၼမ်ႉရႅမ်း ဢိူင်ႇႁူၺ်ႈရႆႉ ၸႄႈဝဵင်းတဵၼ်ႇၶျႆး ၸႄႈတွၼ်ႈၽႄႉ မိူင်းထႆး ၼၼ်ႉ ႁူမ်ႈတင်းမူတ်း 1 လၢၼ်ႉမဵတ်ႉ ႁူမ်ႈပႃးၵူၼ်းတေႃႉသူင်ႇ 6 ၵေႃႉ ပဵၼ်ၵူၼ်းထႆးတင်းမူတ်း ဝႃႈၼႆ။

ယႃႈမဝ်းၵမ်ဢၼ်ပလိၵ်ႈထႆး တီႉၺွပ်းလႆႈပွၵ်ႈၵမ်းၼႆႉ လႆႈလုၵ်ႉဢဝ်တီႈလႅၼ်လိၼ် တႆး−ထႆး ၼႂ်းပိုၼ်ႉတီႈၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ သေ တေၵႂႃႇသူင်ႇၼႂ်းပိုၼ်ႉတီႈ ၸႄႈတွၼ်ႈၶျုမ်းၽွၼ်း ဢၼ်ယူႇၸိုင်ႈထႆးပွတ်းၸၢၼ်း တိတ်းၽင်ႇပၢင်ႇလၢႆႇပုၼ်ႉၼႆလႄႈ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် တေၸွမ်းႁႃတူဝ်ၽူႈၵဵဝ်ႇၶွင်ႈၵႂႃႇထႅင်ႈသေ ဢဝ်မႃးပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ဝႃႈၼႆ။

တႆးလွတ်ႈလႅဝ်း