ပလိၵ်ႈထႆး တီႉၺွပ်းလႆႈယႃႈမဝ်းၵမ် လႄႈ ၵူၼ်းတေႃႉသူင်ႇ တီႈလႅၼ်လိၼ် တႆး−ထႆး

ၵူၼ်းႁပ်ႉၸၢင်ႈတေႃႉသူင်ႇယႃႈမဝ်းၵမ် လုၵ်ႉတီႈလႅၼ်လိၼ် တႆး−ထႆး သေ ဢၢၼ်းတေႃႉယႃႈၶဝ်ႈၵႂႃႇ ၼႂ်းၸႄႈဝဵင်းၵဵင်းႁၢႆး မိူင်းထႆး ၵူၺ်းထုၵ်ႇတီႉၺွပ်းလႆႈ တင်းၵူၼ်း တင်းယႃႈမဝ်းၵမ်။

မိူဝ်ႈဝၼ်းထီႉ 23 January 2024 (လိူၼ်ၵမ်မႂ်ႇ 13 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းပလိၵ်ႈထႆး လႆႈႁပ်ႉၶၢဝ်ႇဝႃႈ တေမီးလွင်ႈတေႃႉသူင်ႇယႃႈမဝ်းၵမ် ၸွမ်းလႅၼ်လိၼ် တႆး−ထႆး တင်းၼမ်ၼႆလႄႈ ၸင်ႇလႆႈဢွၵ်ႇလဵပ်ႈပႂ်ႉၵူတ်ႇထတ်း သေ ထူပ်းႁၼ်ၵႃးလမ်းၼိုင်ႈ ဢၼ်မီးလူတ်ႉၶိူင်ႈၼမ်းၼႃႈမႃး 3 လမ်း လုၵ်ႉတီႈၼႂ်း ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆး သေ ႁေႃႈမုင်ႈၼႃႈၵႂႃႇတၢင်းဝဵင်းၵဵင်းႁၢႆး ဝၢႆးၼၼ်ႉ ၽၢႆႇပလိၵ်ႈထႆးၵေႃႈ လႆႈလမ်းၵႂႃႇၸွမ်းၵႃးလမ်းၼၼ်ႉ တေႃႇထိုင်တီႈ ဝၢၼ်ႈတႃႈၶဝ်ႈပိူၵ်ႇ ပွၵ်ႉ 7 ဢိူင်ႇတႃႈၶဝ်ႈပိူၵ်ႇယဝ်ႉ လႆႈႁွင်ႉႁႂ်ႈၵႃးလမ်းၼၼ်ႉၵိုတ်း တႃႇၶဝ်ႈၵူတ်ႇထတ်း ၵူၺ်းၵႃႈ ၵႃးလမ်းၼၼ်ႉသမ်ႉႁေႃႈပၢႆႈသေ ဝၢႆးၼၼ်ႉ ယွၼ်ႉႁေႃႈဝႆးပူၼ်ႉတီႈ ၵုမ်းထိင်းၵႃးဢမ်ႇလႆႈလႄႈ ပုင်ႈလေႃႈဢွၵ်ႇၵႂႃႇၼွၵ်ႈတၢင်း ဝႃႈၼႆ။

ဝၢႆးသေၼၼ်ႉ ၽၢႆႇတၢင်းပလိၵ်ႈထႆးၵေႃႈ ၸင်ႇၶဝ်ႈၵႂႃႇၵူတ်ႇထတ်းသေ ထူပ်းႁၼ် ထူင်ၵေႃႇၸၢၼ်ႈ 8 ထူင် ဢၼ်သႂ်ႇယႃႈမဝႆႉၼႂ်းမၼ်းတင်းမူတ်း 2,100,000 မဵတ်ႉ လႄႈ တီႉၺွပ်းၵုမ်းထိင်းလႆႈပႃး ၵူၼ်းတေႃႉသူင်ႇ 2 ၵေႃႉ ၼႆယဝ်ႉ။

ၸွမ်းၼင်ႇပလိၵ်ႈထႆး လႆႈၸႅတ်ႈထၢမ်ၵူၼ်းတေႃႉသူင်ႇယႃႈမဝ်းၵမ်ၼၼ်ႉသေ လႆႈ ႁူႉဝႃႈ မီးၵူၼ်းၼႂ်းမိူင်းတႆးၵေႃႉၼိုင်ႈ ၸၢင်ႈၶႃ 2 ၵေႃႉ တႃႇငိုၼ်းထႆး 1 သႅၼ်ဝၢတ်ႇ လႄႈ ႁႂ်ႈၶႃၵႂႃႇႁပ်ႉယႃႈတီႈၼႂ်းၵႄႈၵၢင် ဝၢၼ်ႈပၢင်မၢၵ်ႇႁၼ် တင်း ဝၢၼ်ႈမူင်ႉၵဝ်ႈလင် ဢိူင်ႇထိူဝ်ႉထႆး ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆး မိူင်းထႆးသေ ၵႂႃႇသူင်ႇတီႈ ၼႂ်းၸႄႈဝဵင်းၵဵင်းႁၢႆး ဝႃႈၼႆ။

ၵဵဝ်ႇလူၺ်ႈယႃႈမဝ်းၵမ် လႄႈ ၵူၼ်းတေႃႉသူင်ႇ ဢၼ်ပလိၵ်ႈထႆး တီႉၺွပ်းလႆႈပွၵ်ႈ ၵမ်းၼႆႉ တေႁဵတ်းသၢင်ႈပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇမၢႆႈမီႈၸိုင်ႈမိူင်းမီး ၼၼ်ႉ ဝႃႈၼႆ။

တႆးလွတ်ႈလႅဝ်း