ၶွင်ႇသီႇဢဝ်ၶိုၼ်းၸိုင်ႈတႆး RCSS လူင်းလၢႆးမိုဝ်းၸွမ်းၵၼ် တင်း ၸုမ်းၵျီႇၼီႇပႃႇၶေႃး

ၼႂ်းတိုဝ်ႉတၢင်း ဝၼ်းသူင်ႇသင်ႇပီၵဝ်ႇ 2113 ၼီႈ ႁပ်ႉတွၼ်ႈပီမႂ်ႇ 2114 ၼီႈပီၼႆႉ ၶွင်ႇသီႇဢဝ်ၶိုၼ်းၸိုင်ႈတႆး RCSS လူင်းလၢႆးမိုဝ်းၸွမ်းၵၼ် တင်း  ၸုမ်းၵျီႇၼီႇပႃႇၶေႃး (Geneva Call ) ၵဵဝ်ႇၵပ်းလွင်ႈ ၶေႃႈမၵ်းမၼ်ႈတိုဝ်းၵမ် ၵၢၼ်ၵႅတ်ႇၶႄႁႄႉၵင်ႈပၼ်လုၵ်ႈဢွၼ်ႇ ယႃႇႁႂ်ႈထူပ်းၺႃးၽေးၽွၼ်းယွၼ်ႈ ၶွင်ပၢင်တိုၵ်း တီႈငဝ်ႈၸိုင်ႈလွႆတႆးလႅင်း ဝႃႈၼႆ။

ပိူဝ်ႈတႃႇတေလူင်းလၢႆးမိုဝ်းၸွမ်းၵၼ် တင်း ၸုမ်းၵျီႇၼီႇပႃႇၶေႃး(Geneva Call) ၼႆႉ မိူဝ်ႈဝႃးဝၼ်းထီႉ 26 November 2019 ယၢမ်းၵၢင်ၼႂ် 09 : 00 မူင်း ၶွင်ႇသီႇဢဝ်ၶိုၼ်းၸိုင်ႈတႆး RCSS လႆႈၸတ်းႁဵတ်း ပၢင်ၵုမ်ဢုပ်ႇဢူဝ်းၵၼ်သေ ယၢမ်းႁူဝ်ၶမ်ႈ 18 : 00 မူင်းသမ်ႉ ၸတ်းႁဵတ်းပၢင်လူင်းလၢႆးမိုဝ်းၸွမ်းၵၼ် တင်း ၸုမ်းၵျီႇၼီႇပႃႇၶေႃး (Geneva Call) ၵဵဝ်ႇၵပ်းလွင်ႈ ၶေႃႈမၵ်းမၼ်ႈတိုဝ်းၵမ် ၵၢၼ်ၵႅတ်ႇၶႄႁႄႉၵင်ႈပၼ်လုၵ်ႈဢွၼ်ႇ ယႃႇႁႂ်ႈထူပ်းၺႃးၽေးၽွၼ်းယွၼ်ႈ ၶွင်ပၢင်တိုၵ်း ဝႃႈၼႆ။

ပၢင်ၵုမ်ယၢမ်းၵၢင်ၼႂ်ၼၼ်ႉ မီးႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်းလူင်ယွတ်ႈသိုၵ်း ၊ ၵႅမ်ႁူဝ်ပဝ်ႈၼိုင်ႈ ၸွမ်သိုၵ်းၸၢႆးယီႈ ၊ ၵႅမ်ႁူဝ်ပဝ်ႈသွင် ၸွမ်ႁၢၼ်ၶိူဝ်းငိုၼ်း လႄႈ ၵေႃပွင်ၵၢၼ်ဢွၼ်ႁူဝ်ငဝ်ႈၸိုင်ႈ ၊ တူဝ်တႅၼ်းၸုမ်းၵျီႇၼီႇပႃႇၶေႃး (Geneva Call) ၊ ၸုမ်း ILO ဢိၵ်ႇတင်း Save The Children ၶိုၼ်ႈႁွတ်ႈ ဝႃႈၼႆ။

ၼႂ်းပၢင်ၵုမ်ၼၼ်ႉ ၶွင်သီႇဢဝ်ၶိုၼ်းၸိုင်ႈတႆး RCSS လႄႈ ၸုမ်းၵျီႇၼီႇပႃႇၶေႃး သွင်ၽၢႆႇလႆႈသပ်းလႅင်းၼႄၵၼ် ၵဵဝ်ႇလူၺ်ႈၶေႃႈမၵ်းမၼ်ႈတိုဝ်းၵမ် ၵၢၼ်ၵႅတ်ႇၶႄႁႄႉၵင်ႈပၼ်လုၵ်ႈဢွၼ်ႇ ယႃႇႁႂ်ႈထူပ်းၺႃးၽေးၽွၼ်းယွၼ်ႈ ၶွင်ပၢင်တိုၵ်း 16 ၶေႃႈ ဝႃႈၼႆ ၊ ယူႇတီႈၵေႃပွင်ၵၢၼ်ဢွၼ်ႁူဝ်ငဝ်ႈၸိုင်ႈၵေႃႈ လႆႈတွင်ႈထၢမ်တီႈ  ၸုမ်းၵျီႇၼီႇပႃႇၶေႃး (Geneva Call) ၵဵဝ်ႇၵပ်းၶေႃႈမၵ်းမၼ်ႈတိုဝ်းၵမ် ၵၢၼ်ၵႅတ်ႇၶႄႁႄႉၵင်ႈ လုၵ်ႈဢွၼ်ႇ 16 ၶေႃႈၼႆႉ မီးသင်လၢႆလၢႆ ပေႃးလူင်းလၢႆးမိုဝ်းယဝ်ႉ တေမီးလွင်ႈၶွင်ႉၶမ်ၸိူင်ႉႁိုဝ် တေလႆႈၽွၼ်းလီသင်လၢႆလၢႆ ၸဵမ်ၸိူဝ်းၼႆႉၵႂႃႇ ႁႂ်ႈလူင်ႉလႅင်း ၼႆယဝ်ႉ။ 

ပၢင်ၵုမ်ဢုပ်ႇဢူဝ်း ၶွင်ႇသီႇဢဝ်ၶိုၼ်းၸိုင်ႈတႆး RCSS လႄႈ ၸုမ်းၵျီႇၼီႇပႃႇၶေႃး ယၢမ်းတွၼ်ႈၼႂ်ၼႆႉ ယဝ်ႉတူဝ်ႈၵႂႃႇ ယၢမ်းၵၢင်ဝၼ်း 12 : 00 မူင်းသေ ယၢမ်းဝၢႆးဝၼ်းၼၼ်ႉ ၸုမ်းၵျီႇၼီႇပႃႇၶေႃး တွင်ႈထၢမ် (Interview) ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်းလူင်ယွတ်ႈသိုၵ်း ဝႃႈၼႆ။

ထိုင်မႃးယၢမ်းႁူဝ်ၶမ်ႈ 18 : 00 မူင်းၼၼ်ႉ ၸတ်းႁဵတ်းပၢင်လူင်းလၢႆးမိုဝ်းၸွမ်းၵၼ် တင်း ၸုမ်းၵျီႇၼီႇပႃႇၶေႃး (Geneva Call ) တီႈပၢင်ႁူမ်ႈၸဝ်ႈသိူဝ်ၶၢၼ်ႇၾႃႉသေ မီးႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်း လူင်ယွတ်ႈသိုၵ်း ၊ ၵႅမ်ႁူဝ်ပဝ်ႈၼိုင်ႈ ၊ ၵႅမ်ႁူဝ်ပဝ်ႈသွင် ၊ ၵေႃပွင်ၵၢၼ်ဢွၼ်ႁူဝ်ငဝ်ႈၸိုင်ႈ ၊ ၸုမ်းၵျီႇၼီႇပႃႇၶေႃး (Geneva Call) ၊ ၸုမ်း ILO ၊ ၸုမ်း Save The Children ၊ ၵေႃႉသိုၵ်းၵေႃႉႁၢၼ် ဢိၵ်ႇတင်း ပေႃႈမႄႈၵူၼ်းမိူင်း ၶဝ်ႈႁူမ်ႈၸွမ်းတင်းၼမ် ဝႃႈၼႆ။

ၼႂ်းပၢင်လူင်းလၢႆးမိုဝ်း ၶွင်ႇသီႇဢဝ်ၶိုၼ်းၸိုင်ႈတႆး RCSS လႄႈ ၸုမ်းၵျီႇၼီႇပႃႇၶေႃး (Geneva Call) ၼႆႉ ႁူဝ်ပဝ်ႈလူင်ၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်းလူင်ယွတ်ႈသိုၵ်း မွၵ်ႇလၢတ်ႈၶေႃႈၵႂၢမ်းၵႂႃႇ ၵဵဝ်ႇၵပ်းလွင်ႈလႆႈလူင်းလၢႆးမိုဝ်းၸွမ်းၵၼ် တင်း ၸုမ်းၵျီႇၼီႇပႃႇၶေႃး လႄႈ ၶေႃႈယိူင်းဢၢၼ်း မီးသင်လၢႆလၢႆ ၸဵမ်ၸိူဝ်းၼႆႉ ဝႃႈၼႆ။

ဝၢႆးသေ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး RCSS ၸွမ်သိုၵ်းလူင်ယွတ်ႈသိုၵ်း ၊ Mr.Alair Delefres ႁူဝ်ပဝ်ႈၸုမ်းၵျီႇၼီႇပႃႇၶေႃး ဢိၵ်ႇတင်း ၽူႈမီးပုၼ်ႈၽွၼ်းၶဝ် မွၵ်ႇလၢတ်ႈၶေႃႈၵႂၢမ်းယဝ်ႉ ၶွင်ႇသီႇဢဝ်ၶိုၼ်းၸိုင်ႈတႆး RCSS လူင်းလၢႆးမိုဝ်းၸွမ်းၵၼ် တင်း ၸုမ်းၵျီႇၼီႇပႃႇၶေႃး(Geneva Call)  ၵဵဝ်ႇၵပ်းလွင်ႈ ၶေႃႈမၵ်းမၼ်ႈတိုဝ်းၵမ် ၵၢၼ်ၵႅတ်ႇၶႄႁႄႉၵင်ႈပၼ်လုၵ်ႈဢွၼ်ႇ ယႃႇႁႂ်ႈထူပ်းၺႃးၽေးၽွၼ်းယွၼ်ႈ ၶွင်ပၢင်တိုၵ်း ဝႃႈၼႆ ၊ သိုပ်ႇၼၼ်ႉ  ႁူမ်ႈၵၼ်ထႆႇၶႅပ်း ႁၢင်ႈပဵၼ်မၢႆတွင်းၵိုၵ်းပိုၼ်းသေ ႁုပ်ႈသိမ်းပၢင်လူင်းလၢႆးမိုဝ်းယဝ်ႉတူဝ်ႈလီငၢမ်းၵႂႃႇ ၼႆယဝ်ႉ။

တႆးလွတ်ႈလႅဝ်း