သိုၵ်းထႆး တီႉၺွပ်းလႆႈယႃႈမဝ်းၵမ် တီႈလႅၼ်လိၼ် တႆး−ထႆး ထႅင်ႈတင်းၼမ်

ၵူၼ်းၵႃႉၶၢႆယႃႈမဝ်းၵမ် လၵ်ႉလွမ်တေႃႉသူင်ႇယႃႈၶဝ်ႈၵႂႃႇၼႂ်းမိူင်းထႆး ဢမ်ႇထၢတ်ႇ ဢမ်ႇဝၢႆးလႄႈ ၽၢႆႇသိုၵ်းထႆး သိုပ်ႇတီႉၺွပ်းလႆႈယႃႈမဝ်းၵမ်ႁူဝ်လၢၼ်ႉမဵတ်ႉ ၼႆယဝ်ႉ။

ၸွမ်းၼင်ႇသိုဝ်ႇၶၢဝ်ႇ MGR Online ဢွၵ်ႇဝႆႉၼၼ်ႉဝႃႈ မိူဝ်ႈဝႃးဝၼ်းထီႉ 28 January 2024 (လိူၼ်ၵမ်လွင်ႈ 3 ၶမ်ႈ ပီႊတႆး 2118 ၼီႈ) ၼၼ်ႉ သိုၵ်းထႆး လႆႈဢွၵ်ႇလဵပ်ႈယၢမ်း ၸွမ်းလႅၼ်လိၼ် တႆး−ထႆး ၼႂ်းပိုၼ်ႉတီႈ ဢိူင်ႇမွၼ်ႉပိၼ်ႇ ၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ မိူင်းထႆးလႄႈ ထူပ်းႁၼ်ၵူၼ်းမွၵ်ႈ 25−30 ၵေႃႉ ၼႂ်းၼၼ်ႉ မီးၵူၼ်းပႃးၵွင်ႈယူႇမွၵ်ႈ 3−5 ၵေႃႉသေ ပႆၶၢမ်ႈလႅၼ်လိၼ် ၶဝ်ႈၵႂႃႇၼႂ်းလိၼ်မိူင်းထႆး၊ ၽၢႆႇတၢင်းသိုၵ်းထႆး တေဢၢၼ်းၶဝ်ႈၵူတ်ႇထတ်း ဝႃႈၼႆသေတႃႉ ၵူၼ်းၸိူဝ်းၼၼ်ႉသမ်ႉ ယိုဝ်းသႂ်ႇ သိုၵ်းထႆးဢွၼ်တၢင်းလႄႈ သွင်ၽၢႆႇပိုတ်းယိုဝ်းၵၼ် ႁိုင်မွၵ်ႈ 3−5 မိၼိတ်ႉ၊ ဝၢႆးသဵင်ၵွင်ႈယဵၼ်ၵႂႃႇယဝ်ႉၼၼ်ႉ သိုၵ်းထႆး ၸင်ႇၶဝ်ႈၵူတ်ႇထတ်း ၼႂ်းပိုၼ်ႉတီႈပိုတ်းယိုဝ်းၵၼ်ၼၼ်ႉသေ ထူပ်းႁၼ်ထူင်ၵေႃႇၸၢၼ်ႈ 25 ထူင် ဢၼ်သႂ်ႇယႃႈမဝႆႉၼႂ်းမၼ်းတင်းမူတ်း 2,500,000 မဵတ်ႉ ဝႃႈၼႆ။

ၼွၵ်ႈလိူဝ်သေၼႆႉ မိူဝ်ႈဝၼ်းထီႉ 27 January 2024 (လိူၼ်ၵမ်လွင်ႈ 2 ၶမ်ႈ ပီႊတႆး 2118 ၼီႈ) ၼၼ်ႉၵေႃႈ သိုၵ်းထႆး ၵူတ်ႇထတ်း တီႉၺွပ်းလႆႈ ယႃႈမ 6,000,000 မဵတ်ႉ ႁူမ်ႈပႃး ယႃႈဢၢႆႉသ် 29 ၵီႇလူဝ်ႇၵရမ်ႇ တီႈၼႂ်းပိုၼ်ႉတီႈ ဝၢၼ်ႈႁူၺ်ႈလိုၵ်ႉ ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇ မိူင်းထႆး ဢၼ်ယူႇတိတ်းၸပ်းလႅၼ်လိၼ်မိူင်းတႆးၼၼ်ႉ ဝႃႈၼႆ။

မိူဝ်ႈဝၼ်းထီႉ 27 January 2024 ၼႂ်းဝၼ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ ၸဝ်ႈၼႃႈတီႈထႆး တီႉၺွပ်းလႆႈယႃႈမထႅင်ႈ 5,000,000 မဵတ်ႉ တီႈၼႂ်းဢိူင်ႇၽႃငၢမ်း ၸႄႈဝဵင်းဝဵင်းၶျႆး ၸႄႈတွၼ်ႈၵဵင်းႁၢႆး မိူင်းထႆး ၵူၼ်းတေႃႉသူင်ႇတႄႉ ဢမ်ႇတၼ်းတီႉၺွပ်းလႆႈ လႄႈ ယႃႈမဝ်းၵမ်ၼႆႉၵေႃႈ လုၵ်ႉတီႈလႅၼ်လိၼ်တႆး−ထႆးသေ တေႃႉသူင်ႇၶဝ်ႈၵႂႃႇ ၼႂ်းမိူင်းထႆးမိူၼ်ၵၼ် ဝႃႈၼႆ။

တႄႇဢဝ်လိူၼ် October 2023 ထိုင် ၼႂ်းလိူၼ် January 2024 ၼႆႉ ၽၢႆႇတၢင်းသိုၵ်းထႆး ၵႆႉမီးလွင်ႈပိုတ်းယိုဝ်းၸွမ်း ၵူၼ်းတေႃႉသူင်ႇယႃႈမဝ်းၵမ် ၸွမ်းလႅၼ်လိၼ် တႆး−ထႆးသေ တီႉၺွပ်းလႆႈယႃႈမ ဢမ်ႇယွမ်း 50 လၢၼ်ႉမဵတ်ႉ လႄႈ ၽၢႆႇသိုၵ်းထႆးၵေႃႈ တေတိူဝ်းဢွၵ်ႇလဵပ်ႈယၢမ်းၸွမ်းလႅၼ်လိၼ် ႁႂ်ႈၼႅၼ်ႈၼႃလိူဝ်သေၵဝ်ႇ ဝႃႈၼႆ။

တႆးလွတ်ႈလႅဝ်း