သိုၵ်းထႆး တီႉၺွပ်းလႆႈယႃႈမဝ်းၵမ် ႁူမ်ႈၵူၼ်းတေႃႉတၢင်ႇ 2 ၵေႃႉ

သိုၵ်းထႆး လႄႈ ၽူႈမီးပုၼ်ႈၽွၼ်းထႆးထႅင်ႈလၢႆလၢႆၽၢႆႇ ႁူမ်ႈၵၼ်တီႉၺွပ်းလႆႈ ယႃႈမ ဢၼ်လုၵ်ႉတီႈလႅၼ်လိၼ် တႆး−ထႆး သေ လၵ်ႉလွမ်ႉတေႃႉၶဝ်ႈမိူင်းထႆးတင်းၼမ် ႁူမ်ႈပႃးၵူၼ်းတေႃႉသူင်ႇထႅင်ႈ ဝႃႈၼႆ။

ၸွမ်းၼင်ႇသိုဝ်ႇၶၢဝ်ႇထႆး ဢွၵ်ႇဝႆႉဝႃႈ မိူဝ်ႈဝၼ်းထီႉ 3 February 2024 (လိူၼ်ၵမ်လွင်ႈ 10 ၶမ်ႈ ပီႊတႆး 2118 ၼီႈ) ၼၼ်ႉ သိုၵ်းထႆး လႄႈ ၽူႈမီးပုၼ်ႈၽွၼ်းထႆးထႅင်ႈလၢႆလၢႆ ၽၢႆႇ လႆႈႁပ်ႉၶၢဝ်ႇ တေမီးလွင်ႈတေႃႉသူင်ႇယႃႈမဝ်းၵမ် ၸွမ်းလႅၼ်လိၼ် တႆး−ထႆး ၶဝ်ႈၵႂႃႇၵဵပ်းသိူင်ႇဝႆႉ ၼႂ်းပိုၼ်ႉတီႈ ဢိူင်ႇမႄႈယၢဝ်း ၸႄႈဝဵင်းၵဵင်းႁၢႆး ၸႄႈတွၼ်ႈၵဵင်း ႁၢႆး မိူင်းထႆး လႄႈ ၸင်ႇလႆႈၵႂႃႇတင်ႈလၢၼ်ႇပႂ်ႉၵူတ်ႇထတ်းတီႈၼႂ်းဢိူင်ႇႁူၺ်ႈသၵ်း ၸႄႈဝဵင်းၵဵင်းႁၢႆးသေ ၵူတ်ႇထတ်းတီႉၺွပ်းလႆႈ ယႃႈမႁူမ်ႈတင်းမူတ်း 1,000,000 မဵတ်ႉ လႄႈ ၵူၼ်းတေႃႉသူင်ႇထႅင်ႈ 2 ၵေႃႉ ဝႃႈၼႆ။

ယႃႈမဝ်းၵမ် လႄႈ ၵူၼ်းတေႃႉသူင်ႇ 2 ၵေႃႉ ဢၼ်တီႉၺွပ်းလႆႈပွၵ်ႈၵမ်းၼႆႉ ၽၢႆႇတၢင်း ၽူႈမီးပုၼ်ႈၽွၼ်းထႆးၶဝ် တေႁဵတ်းသၢင်ႈပၼ်တၢမ်ႇတၢင်းၽိတ်းၵႂႃႇ ၸွမ်းၼင်ႇ မၢႆမီႈၸိုင်ႈမိူင်းမီးၼၼ်ႉ ၼႆယဝ်ႉ။

တႆးလွတ်ႈလႅဝ်း