သိုၵ်းထႆး ပိုတ်းယိုဝ်းၸွမ်းၵူၼ်းၵႃႉယႃႈ တီႈလႅၼ်လိၼ် တႆး−ထႆး ထႅင်ႈ

ၼႂ်းၽွင်းယၢမ်းၼႆႉ ၵူၼ်းၵႃႉယႃႈမဝ်းၵမ် လၵ်ႉတေႃႉယႃႈၶဝ်ႈမိူင်းထႆး ဢမ်ႇၵိုတ်းဢမ်ႇလိုဝ်ႈလႄႈ ၽူႈမီးပုၼ်ႈၽွၼ်းၵူႈၽၢႆႇၽၢႆႇ ၼႂ်းမိူင်းထႆးၵေႃႈ လႆႈတိူဝ်းလွင်ႈၵူတ်ႇထတ်းၵူႈၽၢႆႇသေ သိုၵ်းထႆး လႆႈမီးလွင်ႈပိုတ်းယိုဝ်းၸွမ်း ၵူၼ်းတေႃႉယႃႈ တီႈလႅၼ်လိၼ် တႆး−ထႆး သေ တီႉၺွပ်းလႆႈယႃႈမဝ်းၵမ်ထႅင်ႈ တင်းၼမ်။

ၸွမ်းၼင်ႇသိုဝ်ႇၶၢဝ်ႇထႆး ဢွၵ်ႇဝႆႉဝႃႈ မိူဝ်ႈဝႃးဝၼ်းထီႉ 28 February 2024 (လိူၼ်သၢမ် လွင်ႈ 4 ၶမ်ႈ ပီႊတႆး 2118 ၼီႈ) ၽွင်းသိုၵ်းထႆး ဢၼ်ဢွၵ်ႇလဵပ်ႈယၢမ်းၸွမ်း လႅၼ်လိၼ် တႆး−ထႆး ၼႂ်းပိုၼ်ႉတီႈ ဢိူင်ႇမွၼ်ႉပိၼ်ႇ  ၸႄႈဝဵင်းမိူင်းၾၢင် ၸႄႈတွၼ်ႈ ၵဵင်းမႆႇ မိူင်းထႆး ႁၢင်ႇၵႆတင်းလႅၼ်လိၼ်မွၵ်ႈ 2.5 ၵီႇလူဝ်ႇမီႇတိူဝ်ႇၼၼ်ႉ လႆႈထူပ်း ႁၼ်ၵူၼ်းမွၵ်ႈ 5−6 ၵေႃႉ လႄႈ တေဢၢၼ်းၶဝ်ႈၵူတ်ႇထတ်း ၵူၺ်းၵႃႈ ၵူၼ်းၸိူဝ်း ၼၼ်ႉသမ်ႉ ပိုတ်းယိုဝ်းသႂ်ႇသိုၵ်းထႆး ဢွၼ်တၢင်းလႄႈ သွင်ၽၢႆႇပိုတ်းယိုဝ်းၵၼ်ႁိုင် မွၵ်ႈ 10 မိၼိတ်ႉၼႆႉ ဝႃႈၼႆ။

ဝၢႆးသေသဵင်ဢွၵ်ႇယဵၼ်ၵႂႃႇယဝ်ႉၼၼ်ႉ ၽၢႆႇတၢင်းသိုၵ်းထႆး ၸင်ႇလႆႈၶဝ်ႈၵူတ်ႇထတ်း ၼႂ်းပိုၼ်ႉတီႈၼၼ်ႉသေ ထူပ်းႁၼ်ထူင်ပိူဝ်ႉ 4 ထူင်၊ ၼႂ်းၼႆႉ တႃႇ 3 ထူင် သႂ်ႇယႃႈမ ဝႆႉၼႂ်းမၼ်းတင်းမူတ်း 300,000 မဵတ်ႉ လႄႈ ထႅင်ႈထူင် 1 တႄႉ သႂ်ႇဝႆႉယႃႈၽိၼ်ႇၽိူၵ်ႇ 6 ႁေႃႇ ၼမ်ႉၼၵ်းတင်းမူတ်း 3 ၵီႇလူဝ်ႇၵရမ်ႇ ဢိၵ်ႇတင်း ယႃႈလမ် 12 ၸွႆႉ ဢမ်ႇ ၼၼ် 19.2 ၵီႇလူဝ်ႇၵရမ်ႇသေ ၵူၼ်းတေႃႉသူင်ႇတႄႉပၢႆႈလွတ်ႈၵႂႃႇလႆႈ ၼႆယဝ်ႉ။

ၸွမ်းလႅၼ်လိၼ် တႆး−ထႆး ၼႆႉ ၵူၼ်းၵႃႉယႃႈမဝ်းၵမ် ၵႆႉလၵ်ႉတေႃႉယႃႈၶဝ်ႈၵႂႃႇၼႂ်း မိူင်းထႆးလႄႈ မိူဝ်ႈဝၼ်းထီႉ 27 February 2024 ၼၼ်ႉၵေႃႈ ၽၢႆႇတၢင်းသိုၵ်းထႆး လႆႈပိုတ်းယိုဝ်းၸွမ်းၵူၼ်းၵႃႉယႃႈ တီႈၼႂ်းပိုၼ်ႉတီႈ ၸႄႈဝဵင်းမႄႈဢၢႆး ၸႄႈတွၼ်ႈ ၵဵင်းမႆႇ မိူင်းထႆးသေ ၽၢႆႇတၢင်းၵူၼ်းၵႃႉယႃႈတၢႆ 3 ၵေႃႉ လႄႈ တီႉၺွပ်းလႆႈပႃးယႃႈမ 600,000 မဵတ်ႉ၊ ၵွင်ႈ 2 လဝ်း၊ မၢၼ်ႇပျွင်း 1 ဢၼ် ဢိၵ်ႇတင်း ၾူၼ်းထႅင်ႈ 3 လုၵ်ႈ ဝႃႈၼႆ။

တႆးလွတ်ႈလႅဝ်း