လွင်ႈထုၵ်ႇလီႁူႉ ၵႅၼ်ႇသႃႇတဝ်ႈၼူမ်း

ၵႅၼ်ႇသႃႇတဝ်ႈၼူမ်းၼႆႉၵေႃႈ ၵူႈပီႊပီႊၼၼ်ႉ မီးၽူႈယိင်း တၢႆယွၼ်ႉမၼ်းမႃးတင်းၼမ် ယူႇယဝ်ႉ။  လိူဝ်သေၼၼ်ႉ မေႃယႃၶဝ်ၵေႃႈ ဢမ်ႇႁူႉငဝ်ႈႁၢၵ်ႈလွင်ႈတၢင်းလႆႈၸႅင်ႈလႅင်း။ ၵူၺ်းၵႃႈ လွင်ႈတၢင်းဢၼ်ႁဵတ်းႁႂ်ႈ မီးတၢင်းပဵၼ်ၼႆႉလႆႈတႄႉၵေႃႈ ပဵၼ် ႁေႃႇမူၼ်း Estrogen ၼႂ်းၽူႈယိင်းလႄႈ တေၵႂႃႇတုမ်ႉယွၼ်ႈထိုင်လွင်ႈလႅၵ်ႈလၢႆႈ သႄးလ်ၼိူဝ်ႉတီႈတဝ်ႈၼူမ်းၼၼ်ႉ ၼမ်ပူၼ်ႉတီႈ ထိုင်တီႈမၼ်းႁုၼ်ႈမုၼ်းၵႂႃႇဢမ်ႇပုင်ႇမၢၼ်ႇသေယဝ်ႉ တူဝ်ၶိင်းၵေႃႈဢမ်ႇၸၢင်ႈၵုမ်းထိင်းမၼ်းလႆႈ၊ ႁဵတ်းႁႂ်ႈသႄးလ်ၸိူဝ်းၼၼ်ႉ ယဵၼ်းပဵၼ်သႄးလ်ၵႅၼ်ႇသႃႇသေ တေၽႄႈလၢမ်းၵႂႃႇဝႆးလႄႈ ၸၢင်ႈၽႄႈလၢမ်းပႃး ၶိူင်ႈဢင်ႇၵႃႇၼႂ်းတူဝ်ၶိင်းလၢႆလၢႆပွတ်းတွၼ်ႈလႆႈထႅင်ႈ ယူႇယဝ်ႉ။

ပေႃးဝႃႈတႄႉ ၵႅၼ်ႇသႃႇတဝ်ႈၼူမ်းၼႆႉၵေႃႈ မီးယူႇလၢႆလၢႆမဵဝ်းမိူၼ်ၵၼ် ဢၼ်ၵႆႉထူပ်းႁၼ်တႄႉ တေပဵၼ်ၵႅၼ်ႇသႃႇဢၼ်ပဵၼ်မႃးတီႈတေႃႈၼမ်ႉၼူမ်း ၼၼ်ႉယဝ်ႉ။ မိူဝ်ႈသႄးလ်ၵႅၼ်ႇသႃႇ ၽႄႈလၢမ်းၵႂႃႇႁွတ်ႈထိုင် တေႃႈၼမ်ႉၼူမ်း ၶဝ်ႈၵႂႃႇထိုင်တေႃႈၼမ်ႉလိူင် ဢမ်ႇၼၼ် သဵၼ်ႈလိူတ်ႈၼႆ သႄးလ်ၼၼ်ႉၵေႃႈ တေၽႄႈလၢမ်းၵႂႃႇၵူႈပွတ်းတွၼ်ႈၼႂ်းတူဝ်ၶိင်းမႃး ဢမ်ႇဝႃႈ လုပ်ႇ၊ ပွတ်ႇ၊ တပ်း၊ ဢွၵ်းဢေႃ ၸိူဝ်းၼႆႉ။

ၵႅၼ်ႇသႃႇတဝ်ႈၼူမ်းၼႆႉၵေႃႈ ဢမ်ႇလႆႈႁဵတ်းႁႂ်ႈၸဵပ်းသႅပ်ႇသင် လိူဝ်သေဝႃႈ မၼ်းမီးၵွၼ်ႈၼိူဝ်ႉဢၼ်ၵမ်းတူၺ်းႁူႉလႆႈယူႇ ၵူၺ်းၵႃႈ ဢမ်ႇလႆႈမီးလွင်ႈၸဵပ်းသႅပ်ႇ၊ ၵွပ်ႈၼၼ်လႄႈ ႁဵတ်းႁႂ်ႈၽူႈယိင်းၵမ်ႈၽွင်ႈဝူၼ်ႉဝႃႈ တေဢမ်ႇပဵၼ်သင်ၼႆသေယဝ်ႉ ဢမ်ႇလႆႈသူၼ်ၸႂ်မၼ်း ထိုင်တီႈပေႃးၽႄႈလၢမ်းၵႂႃႇတိၵ်းတိၵ်း တေႃႇပေႃးပဵၼ် တဝ်ႈၼူမ်း ၵႂ်ႈမႃး၊ ၼဝ်ႈမႃး၊ တႅၵ်ႇမႃး ယဝ်ႉၸင်ႇၵွႆႈၵႂႃႇထူပ်းမႃယႃၼႆၸိုင် သင်မၼ်းႁၢႆႉႁႅင်းၼႃႇယဝ်ႉၼၼ်ႉ မၼ်းၵေႃႈဢမ်ႇၸၢင်ႈယူတ်းယႃ ႁႂ်ႈၸိုၼ်ႈၶႅၼ်းၶိုၼ်ႈလႆႈယဝ်ႉ။

ၵူၼ်းဢၼ်မီးတိုဝ်ႉတၢင်းပဵၼ်ၵႅၼ်ႇသႃႇလႆႈၼၼ်ႉ တေမီးမိူၼ်ၼင်ႇ− ယူႇၼႂ်းၶိူဝ်း ဢၼ်ယၢမ်ႈပဵၼ်ၵႅၼ်ႇသႃႇယူႇယဝ်ႉ၊ ၽူႈယိင်းဢၼ်ဢႃႇယု 40 ပီႊ ၶိုၼ်ႈၼိူဝ်၊ ၵူၼ်းဢၼ်ယၢမ်ႈၽႃႇတတ်းၵွၼ်ႈၼိူဝ်ႉတီႈတဝ်ႈၼူမ်း၊ ၽူႈယိင်းဢမ်ႇမီးလုၵ်ႈလႄႈ မီးလုၵ်ႈယၢပ်ႇ၊ ၵိၼ်ယႃတႃႇႁေႃႇမူၼ်း တွၼ်ႈတႃႇၵူၼ်းပၢၼ်ဢၼ်ႁူဝ်လိူၼ်သုတ်း မႃးၶၢဝ်းတၢင်းႁိုင် 10 ပီႊ ၸိူဝ်းၼႆႉ ၸၢင်ႈႁဵတ်းႁႂ်ႈမီးတိုဝ်ႉတၢင်းပဵၼ်လႆႈ တၢင်းပဵၼ်ၵႅၼ်ႇသႃႇတဝ်ႈၼူမ်းယူႇယဝ်ႉ။

ၶေႃႈပၼ်ၾၢင်ႉဝႃႈပဵၼ်ၵႅၼ်ႇသႃႇတဝ်ႈၼူမ်း

1. ၵမ်းၺႃးၵွၼ်ႈ၊ ႁူၺ်ႇ တီႈႁိမ်းႁွမ်းတဝ်ႈၼူမ်း ဢမ်ႇၼၼ် ၸမ်ၸမ်ၵိင်ႇႁႄႉ၊ တဵၵ်းတူၺ်းယဝ်ႉၸဵပ်း ဢမ်ႇၼၼ် ဢမ်ႇၸဵပ်းၵေႃႈလႆႈ (သင်မၼ်းပဵၼ်ၵွၼ်ႈ Cyst တေၸဵပ်း သင်ပဵၼ်ၵွၼ်ႈၵႅၼ်ႇသႃႇ ၸဵပ်းယူႇ ၵူၺ်းၵႃႈ ဢမ်ႇၼႄႉၼွၼ်း)။
2. ၽၢင်ႁၢင်ႈၼႃႈဢူၵ်းဢမ်ႇမိူၼ်ၵဝ်ႇ သမ်ႉဝႃႈၼႃႈဢူၵ်းၼၼ်ႉ တေဢမ်ႇပဵင်းၵၼ်သေၵႃႈႁိုဝ်ၵေႃႈယဝ်ႉ သင်တူၺ်းဝႃႈမၼ်းပႅၵ်ႇပိူင်ႈႁႅင်းၼႃႇ ၼႆၸိုင် ႁႂ်ႈၾၢင်ႉသတိတူၺ်းပႃး။
3. မိပ်ႇတဝ်ႈၼူမ်းလွႆးလွႆးသေ ႁၼ်ဝႃႈမီးၼမ်ႉလိူင်၊ လိူတ်ႈ ဢွၵ်ႇမႃး (ဢမ်ႇၼပ်ႉပႃးမႄႈလဵင်ႉၼူမ်းလုၵ်ႈ)။
4. မီးႁွႆးၸဵပ်းတီႈႁူဝ်ၼူမ်း ဢၼ်ဢမ်ႇႁူႉတီႈမႃး။
5. ၽိဝ်ၼင်ၸွမ်းႁိမ်းႁွမ်းတဝ်ႈၼူမ်း ဢုၵ်းလုၵ်းဢူင်ႈလူင်ႈ မိူၼ်ၵႅမ်ႈလွၵ်းဝႆႉ။
6. သင်ဝႃႈပဵၼ်မႄႈလဵင်ႉၼူမ်းလုၵ်ႈၼႆၸိုင် ၸၢင်ႈတေမီးၼူမ်းဢွၵ်ႇမႃး လႆႈၽၢႆႇလဵဝ်လႄႈ ၼူမ်းတေၸၢင်ႈၸဵပ်း ဢမ်ႇၼၼ် တေမီးသီၼူမ်းလေႃးလိူတ်ႈမႃးပႃး။
7. တဝ်ႈၼူမ်းလႅင်လႄႈၸဵပ်းသႅပ်ႇ သမ်ႉဝႃႈဢမ်ႇၸႂ်ႈဝၼ်းဢၼ်ႁူဝ်လိူၼ်မႃး။

လွၵ်းလၢႆးၵူတ်ႇၸႅတ်ႈတူၺ်းၵႅၼ်ႇသႃႇတဝ်ႈၼူမ်းႁင်းၵူၺ်း

• ထွတ်ႇသိူဝ်ႈသေတူၺ်းဝႃႈ တဝ်ႈၼူမ်းတင်းသွင်ၽၢႆႇၼၼ်ႉ ၸွင်ႇမီးသင်ပႅၵ်ႇပိူင်ႈၵႂႃႇ။
• ၸုၵ်းသေယုၵ်ႉမိုဝ်းၶိုၼ်ႈတင်းသွင်ၽၢႆႇ ယဝ်ႉတူၺ်းဝႃႈ ၸွင်ႇမၼ်းလႅၵ်ႈလၢႆႈၵႂႃႇ လႄႈ ၸွင်ႇမၼ်းမိူၼ်ၵၼ်။
• ၸႂ်ႉမိုဝ်းသၢမ်ၼိဝ်ႉ ၼိဝ်ႉၵၢင်၊ ၼဵဝ်ႉၼၢင်း၊ ၼိဝ်ႉၸီႉ တဵၵ်းတူၺ်းလွႆးလွႆး ၸွမ်းႁိမ်းႁွမ်းတေႃႇထိုင်တဝ်ႈၼူမ်း လႄႈ သင်ထူပ်းၵွၼ်ႈမႃး လႄႈ တဵၵ်းတူၺ်းၸွင်ႇမၼ်းၸဵပ်းယူႇႁိုဝ်။
• မိပ်ႇတူၺ်းႁူဝ်ၼူမ်းလွႆးလွႆး ၸွင်ႇမၼ်းမီးႁွႆးၸဵပ်းလႄႈ မီးၼမ်ႉလႆဢွၵ်ႇမႃးယူႇႁိုဝ်။

သင်ထူပ်းႁၼ်ၽၢင်ႁၢင်ႈဢၼ်လႂ်ဢၼ်ၼိုင်ႈၼႆၸိုင် လီလႆႈၵႂႃႇၸႅတ်ႈတီႈႁူင်းယႃ ႁႂ်ႈယုမ်ႇလႆႈၸႅင်ႈလႅင်းလႄႈ ယူတ်းယႃၵႂႃႇလႆႈၶိုတ်းတၼ်းၼၼ်ႉယဝ်ႉ။

ပိၼ်ႇတႅမ်ႈ−လွႆသွမ်ႇ

တႆးလွတ်ႈလႅဝ်း

ဢၢင်ႈဢိင်မႃးတီႈ−sanook