သိုၵ်းထႆး ၵူတ်ႇထတ်းတီႉၺွပ်းလႆႈယႃႈမဝ်းၵမ် ႁိမ်းလႅၼ်လိၼ်တႆး−ထႆး

သိုၵ်းထႆး ဢွၵ်ႇၵူတ်ႇထတ်းတီႉၺွပ်းလႆႈယႃႈမဝ်းၵမ် ဢၼ်ၵူၼ်းၵႃႉၶၢႆ လၵ်ႉတေႃႉၵႂႃႇ သိူင်ႇဝႆႉၸွမ်းၼႂ်းထိူၼ်ႇၼႂ်းၶိူဝ်း ႁိမ်းလႅၼ်လိၼ် တႆး−ထႆး ၼၼ်ႉ တင်းၼမ်။

မိူဝ်ႈဝၼ်းထီႉ 10 March 2024 (လိူၼ်သီႇမႂ်ႇ 1 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်း သိုၵ်းထႆး လႄႈ ၽူႈမီးပုၼ်ႈၽွၼ်းဢၼ်ၵဵဝ်ႇၶွင်ႈ ႁူမ်ႈၵၼ်ဢွၵ်ႇလဵပ်ႈယၢမ်း ၼႂ်းပိုၼ်ႉ တီႈဝၢၼ်ႈပၢႆးသွင်ငႄႉ ဢိူင်ႇဝဵင်းၼိူဝ် ၸႄႈဝဵင်းမိူင်းပၢႆး ၸႄႈတွၼ်ႈမႄႈႁွင်ႈသွၼ် ႁိမ်းလႅၼ်လိၼ် တႆး−ထႆး သေ ၵူတ်ႇထတ်းထူပ်းႁၼ် ၵွင်ယႃႈမဝ်းၵမ် ဢၼ်သိူင်ႇဝႆႉ ၼႂ်းပႃႇၵူၺ်ႈတင်းမူတ်း 18 ထူင် ၼႂ်းမၼ်းသႂ်ႇယႃႈမဝႆႉယူႇတင်းမူတ်း 2,900,000 မဵတ်ႉ လႄႈ ယႃႈဢၢႆႉသ် ထႅင်ႈ 6 ၵီႇလူဝ်ႇၵရမ်ႇ ၼႆယဝ်ႉ။

တေႃႈၼင်ႇၼၼ် ၼႂ်းပိုၼ်ႉတီႈဝၢၼ်ႈပၢႆးသွင်ငႄႉ ဢိူင်ႇဝဵင်းၼိူဝ် ၸႄႈဝဵင်းမိူင်းပၢႆး ၼႆႉၵူၺ်းၼင်ႇၵဝ်ႇ မိူဝ်ႈၼႂ်းဝၼ်းထီႉ 8 March 2024 ၼၼ်ႉ ၽၢႆႇတၢင်းသိုၵ်းထႆး ၵူတ်ႇထတ်းတီႉၺွပ်းလႆႈ ယႃႈမ 1,200,000 မဵတ်ႉ တင်း ယႃႈဢၢႆႉသ် 35 ၵီႇလူဝ်ႇၵရမ်ႇ သေဢမ်ႇၵႃး ၼႂ်းဝၼ်းထီႉ 7 March 2024 ၼၼ်ႉၵေႃႈ ၵူတ်ႇထတ်းထူပ်းႁၼ်ၵွင် ယႃႈမဝ်းၵမ် ဢၼ်မီးယႃႈမတင်းမူတ်း 6,952,000 မဵတ်ႉ လႄႈ ယႃႈဢၢႆႉသ် 62.5 ၵီႇလူဝ်ႇၵရမ်ႇထႅင်ႈ မိူၼ်ၵၼ် ဝႃႈၼႆ။

ၼႂ်းၶၢဝ်းတၢင်း 3 ဝၼ်း ဢၼ်သိုၵ်းထႆး တင်း ၽူႈမီးပုၼ်ႈၽွၼ်းဢၼ်ၵဵဝ်ႇၶွင်ႈ ၵူတ်ႇထတ်းတီႉၺွပ်းလႆႈယႃႈမဝ်းၵမ်ၼၼ်ႉ ႁူမ်ႈပဵၼ်ယႃႈမတင်းမူတ်း 11,052,000 မဵတ်ႉ လႄႈ ယႃႈဢၢႆႉသ် 103.5 ၵီႇလူဝ်ႇၵရမ်ႇ ဝႃႈၼႆသေတႃႉ ၵူၺ်းဢမ်ႇတီႉၺွပ်းလႆႈ ၵူၼ်းတေႃႉသူင်ႇ တင်း ၽူႈၸိူဝ်းၵဵဝ်ႇၶွင်ႈၸွမ်းယႃႈမဝ်းၵမ်သေၵေႃႉ ၼႆယဝ်ႉ။

တႆးလွတ်ႈလႅဝ်း