ၾႆးမႆႈဝတ်ႉၵျွင်း ၸလၢႆးၶုမ်ႇ ဝဵင်းလၢႆးၶႃႈ မီးလွင်ႈလူႉသုမ်းၼမ်

ယွၼ်ႉၾႆးသႅင်လႅတ်ႇ ဢမ်ႇၼၼ် သူဝ်ႇလႃႇ(Solar)သျွတ်ႉ ပဵၼ်လွင်ႈၾႆးလုၵ်ႉမႆႈ တီႈဝတ်ႉၵျွင်းၸလၢႆးၶုမ်ႇ ၽၢႆႇဢွၵ်ႇဝဵင်းလၢႆးၶႃႈသေ ၶူဝ်းၶွင်ဢၼ်မီးၼႂ်းဝတ်ႉၵျွင်းၼၼ်ႉ လႆႈလူႉသုမ်းပဵၼ်ၽဝ်ႇမူတ်း ၼႆယဝ်ႇ။

မိူဝ်ႈဝႃးဝၼ်းထီႉ 13 March 2024 (လိူၼ်ႇသီႇမႂ်ႇ 4 ၶမ်ႈ ပီႊတႆး 2118 ၼီႈ) ၶၢဝ်းယၢမ်းဝၢႆးဝၼ်း 15:15 မူင်း ပဵၼ်လွင်ႈၾႆးလုၵ်ႉမႆႈတီႈ ဝတ်ႉၵျွင်းၸလၢႆးၶုမ်ႇ ဢၼ်မီးဝႆႉၽၢႆႇဢွၵ်ႇဝဵင်းလၢႆးၶႃႈ ယၢၼ်ၵႆဝဵင်းမွၵ်ႈ 14 လၵ်းၼၼ်ႉသေလႄႈ ယွၼ်ႉၾႆးမႆႈပွၵ်ႈၼႆႉ မီးလွင်ႈလူႉသုမ်းယႂ်ႇလူင်  တေႃႇထိုင်ၶၢဝ်းယၢမ်း 17:00 ပၢႆပၢႆ ၾႆးၸင်ႇမွတ်ႇယဵၼ်ၵႂႃႇ ၼႆယဝ်ႉ။

ၵဵဝ်ႇၵပ်းလူၺ်ႈလွင်ႈၼႆႉ ၸဝ်ႈၶူးပၼ်ႇတိ ၵွင်းမူးမၢၵ်ႇႁိၼ်ၼမ်ႉ လႆႈလၢတ်ႈၼႄတီႈသိုဝ်ႇၶၢဝ်ႇတႆးလွတ်ႈလႅဝ်းဝႃႈ “ဢၼ်ၾႆးလႆႈမႆႈၼႆႉ ပဵၼ်ယၢမ်းဝၢႆးဝၼ်း 15:15 မူင်းၼႆႉ မၼ်းပဵၼ်ယွၼ်ႉၾႆးသႅင်လႅတ်ႇ (Solar) ဢၼ်တၢပ်ႈဝႆႉၼိူဝ်လဵၵ်းမုင်းၵျွင်းၼၼ်ႉၼႃႇၼေႃႈ၊ သၢႆမၼ်းသမ်ႉထူင်ႇမႃး ၼႂ်းလုၵ်းၼွၼ်းၸဝ်ႈသၢင်ႇၶဝ်လႄႈ ၾႆးတေတႄႇမႆႈၼႂ်းလုၵ်းၼွၼ်းၸဝ်ႈသၢင်ႇ ၶဝ်ၼၼ်ႉၵႃႈ၊ ၵွပ်ႈပိူဝ်ႈၼႂ်းလုၵ်းၼၼ်ႉသမ်ႉ မီးၽႅၼ်ႇ၊ ၽႃႈႁူမ်ႇၶူဝ်းၼွၼ်း မဵဝ်းၾႆးမႆႈငၢႆႈလၢႆလၢႆ၊ မိူဝ်ႈၾႆးမႆႈၼၼ်ႉ မႅၼ်ႈၽွင်း ၸဝ်ႈသြႃႇသုၽေႃးထ ၽူႈၵွၼ်းဝတ်ႉၸလၢႆးၶုမ်ႇ လႄႈၸဝ်ႈသၢင်ႇၶဝ် ဢွၼ်ၵၼ်ၵႂႃႇၶပ်ႉၽိုၼ်းၶဝ် ႁိမ်းဝတ်ႉၼၼ်ႉလႄႈ ၽိူဝ်ႇဝႃႈႁၼ်ၾႆးလုၵ်ႉမႆႈၵေႃႈ သမ်ႉပေႃးဢမ်ႇၸၢင်ႈၶဝ်ႈၶႄယဝ်ႉ” လၢတ်ႈၼႄၼင်ႇၼႆ။

သိုပ်ႇလၢတ်ႈထႅင်ႈဝႃႈ “ဢၼ်လႆႈလူႉသုမ်းၵႂႃႇၸွမ်းၾႆးၼၼ်ႉမီးၼမ်ၼႃႇ ၶဝ်ႈပိူၵ်ႇ 120 ထူင်၊ ၶဝ်ႈသၢၼ်မွၵ်ႈ 2 ၸေႃး၊ လူတ်ႉၶိူင်ႈ 3 လမ်း၊ ၽႃႈႁူမ်ႇၶူဝ်းၼွၼ်းတင်းၼမ် ဢိၵ်ႇပႃး ႁုၼ်ႁၢင်ႈၽြႃး၊ ပပ်ႉထမ်းတြႃး ၸိူဝ်းၼႆႉလႄႈ ၶူဝ်းၵၢၼ်ႇၶူဝ်းၵျွင်း ၵူႈလွင်ႈလွင်ႈဢၼ်မီးၼႂ်းဝတ်ႉၵျွင်းၼၼ်ႉပႃးၵႂႃႇၸွမ်းၾႆးမူတ်း ဢမ်ႇတၼ်းလႆႈသင်သေမဵဝ်း မိူဝ်ႈၽၢႆႇၶႄၾႆးၶဝ်မႃးထိုင်ၵေႃႈ ၾႆးပေႃးၸမ်မွတ်ႇယဝ်ႉ” လၢတ်ႈၼႄၼင်ႇၼႆ။

ၸဝ်ႈၶူးပၼ်ႇတိ သိုပ်ႇလၢတ်ႈပၼ်ၾၢင်ႉဝႃႈ “ၽႂ်ၵေႃႈလီ ပေႃးတေၸႂ်ႉတိုဝ်းၾႆးၾႃႉ၊ ၾႆးသႅင်လႅတ်ႇ ၸိူဝ်းၼႆႉ လီလႆႈႁွင်ႉၵူၼ်းဢၼ်လူင်ႉလႅၼ်ႇမၼ်းမႃးႁဵတ်းပၼ်လီလီ ၵွပ်ႈၾႆးၼႆႉၸၢင်ႈပဵၼ်ၽေး လႃႈလီႈၸၢပ်ႈသေ ပွႆႇသၢႆမၼ်းထူင်ႇထူင်ႇထဵဝ်ႈထဵဝ်ႈ ဢမ်ႇလႆႈ ပေႃးပဵၼ်ၼႆမႃး ဢမ်ႇဢဝ်သင်လႆႈၶိုၼ်းလႄႈ ပဵၼ်လွင်ႈလူႉယႂ်ႇသုမ်းလူင်တႃႇႁဝ်းတႄႉတႄႉ” ၼႆယဝ်ႉ။

ဝတ်ႉၵျွင်းၸလၢႆးၶုမ်ႇၼႆႉ မိူဝ်ႈဢွၼ်တၢင်း ပဵၼ်ဝတ်ႉၵျွင်းပႅၼ်ႈသေ ထိုင်ပီႊ 2003 ၼၼ်ႉ ၶိုၼ်းမႄးႁဵတ်းပဵၼ်ၵျွင်းဢုတ်ႇတေႃႇထိုင်ယၢမ်းလဵဝ်လႄႈ မိူဝ်ႈလဵဝ်မီးဝႆႉ ၸဝ်ႈသြႃႇသုၽေႃးထ ၽူႈၵွၼ်းဝတ်ႉလႄႈ ၸဝ်ႈသၢင်ႇ 5 ပႃး ၼႆယဝ်ႉ။

တႆးလွတ်ႈလႅဝ်း