သိုၵ်းထႆး ပိုတ်းယိုဝ်းၸွမ်းၵူၼ်းၵႃႉယႃႈ တီႈလႅၼ်လိၼ် တႆး−ထႆး

ၸဝ်ႈၼႃႈတီႈသိုၵ်းထႆး ပိုတ်းယိုဝ်းၵၼ်တင်း ၵူၼ်းၵႃႉၶၢႆယႃႈမဝ်းၵမ် လၵ်ႉလွမ်တေႃႉ ယႃႈၶမ်ႈလႅၼ်လိၼ် ၶဝ်ႈၵႂႃႇၼႂ်းမိူင်းထႆးၼၼ်ႉသေ တီႉၺွပ်းလႆႈယႃႈမတင်းၼမ်။

သိုဝ်ႇၶၢဝ်ႇထႆး ဢွၵ်ႇဝႆႉ မိူဝ်ႈဝႃးဝၼ်းထီႉ 12 May 2024 (လိူၼ်ႁူၵ်းမႂ်ႇ 5 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းသိုၵ်းထႆး လႆႈဢွၵ်ႇလဵပ်ႈယၢမ်းၸွမ်းလႅၼ်လိၼ် တႆး−ထႆး သေ ထူပ်းႁၼ်ၵူၼ်းဢၼ်ပႃးတင်းထူင်ၵေႃႇၸၢၼ်ႈ 3−5 ၵေႃႉ ပႆယူႇၼႂ်းထိူၼ်ႇ ပိုၼ်ႉတီႈဝၢၼ်ႈၽႃမီ ပွၵ်ႉ 6 ဢိူင်ႇဝဵင်းၽၢင်းၶမ်း ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး လႄႈ တေဢၢၼ်းၶဝ်ႈၵူတ်ႇထတ်း ၵူၺ်းၵူၼ်းၸိူဝ်းၼၼ်ႉ သမ်ႉပိုတ်းယိုဝ်းသႂ်ႇ သိုၵ်းထႆးဢွၼ်တၢင်းလႄႈ သွင်ၽၢႆႇပိုတ်းယိုဝ်းၵၼ်ႁိုင်မွၵ်ႈ 5 မိၼိတ်ႉၼႆႉ ၼႆယဝ်ႉ။

ဝၢႆးသေသဵင်ႈၵွင်ႈယဵၼ်ၵႂႃႇယဝ်ႉၼၼ်ႉ ၽၢႆႇတၢင်းသိုၵ်းထႆး လႆႈၶဝ်ႈၵူတ်ႇထတ်း ၼႂ်းပိုၼ်ႉတီႈဢၼ်ပိုတ်းယိုဝ်းၵၼ်ၼၼ်ႉသေ ထူပ်းႁၼ် ထူင်ၵေႃႇၸၢၼ်ႈ 4 ထူင် ၼႂ်းမၼ်းသႂ်ႇယႃႈမဝႆႉႁူမ်ႈတင်းမူတ်း 480,000 မဵတ်ႉ၊ ၵူၼ်းတေႃႉသူင်ႇတႄႉတၼ်းပၢႆႈ လွတ်ႈၵႂႃႇလႆႈ ဝႃႈၼႆ။

တေႃႈၼင်ႇၼၼ် ၼႂ်းဝၼ်းထီႉ 12 May 2024 ဝၼ်းလဵဝ်ၵၼ်ၵူၺ်းၼင်ႇၵဝ်ႇ ၽၢႆႇတၢင်းၸဝ်ႈၼႃႈတီႈထႆး သပ်းၸႅင်ႈၶၢဝ်ႇ တီႉၺွပ်းလႆႈယႃႈမ ဢၼ်လုၵ်ႉတီႈ မိူင်းလၢဝ်းသေ တေႃႉတၢင်ႇၶၢမ်ႈမႄႈၼမ်ႉၶွင် ဢၢၼ်းသူင်ႇၶဝ်ႈၼႂ်းမိူင်းထႆးၼၼ်ႉ တင်းမူတ်း 7,560,000 မဵတ်ႉ၊ ၵူၼ်းတေႃႉသူင်ႇၵေႃႈ ပၢႆႈလွတ်ႈၵႂႃႇလႆႈမိူၼ်ၵၼ် ဝႃႈၼႆ။

တႆးလွတ်ႈလႅဝ်း