ၾူၼ်လူင်လူမ်းလူင် ၽတ်ႉသႂ်ႇႁိူၼ်းၵူၼ်းမိူင်းလူႉၵွႆ

မိူဝ်ႈဝႃးဝၼ်းထီႉ 15 May 2024 (လိူၼ်ႁူၵ်းမႂ်ႇ 8 ၶမ်ႈ ပီႊတႆး 2118 ၼီႈ) ၾူၼ်လူင်လူမ်းလူင် ၽတ်ႉၶဝ်ႈတီႈဝၢၼ်ႈၵုင်းၺွင်ႇ ဢိူင်ႇလၢႆႈသၢၵ်ႇ ၸႄႈဝဵင်းႁူဝ်ပူင်းသေ မီးႁိူၼ်းၵူၼ်းမိူင်းလူႉၵွႆၵမ်ႈၽွင်ႈ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ၾူၼ်လူင်လူမ်းလူင်ၼႆႉ ပဵၼ်ၵႂႃႇ မိူဝ်ႈယၢမ်းဝၢႆးဝၼ်း 15:00 ပၢႆၼၼ်ႉၶႃႈဢေႃႈ လူမ်းၽတ်ႉဢဝ်မုင်းႁိူၼ်းၵူၼ်းဝၢၼ်ႈ ပိဝ်ၵႂႃႇ 5 လင်ႁိူၼ်း၊  တႃႇႁိူၼ်းၼိုင်ႈသမ်ႉ ၵူၼ်းဝၢၼ်ႈတိုၵ်ႉၼင်ႈၼႂ်းႁိူၼ်းယူႇလႄႈ မႆႉႁိူၼ်းတူၵ်းသႂ်ႇၵွၵ်းႁူဝ်မၼ်းသေ လႆႈတၢင်းမၢတ်ႇၸဵပ်းႁၢဝ်ႈႁႅင်းဝႆႉ ၵူၼ်းဝၢၼ်ႈၶိုၼ်းၸွႆႈၵၼ်ဢဝ်သူင်ႇယူတ်းယႃတူဝ် တီႈႁူင်းယႃဢိူင်ႇမိူင်းပဵင်း လႄႈ လွတ်ႈၽေးလီငၢမ်းယဝ်ႉ ဝႃႈၼႆ။

လွင်ႈမီးၾူၼ်လူင်လူမ်းလူင် ၽတ်ႉၶဝ်ႈတီႈၼႂ်းဝၢၼ်ႈၵုင်းၺွင်ႇ ၸိူင်ႉၼႆၼႆႉ ၵူၼ်းဝၢၼ်ႈတႄႉဝႃႈ မိူဝ်ႈဢွၼ်တၢင်းဢမ်ႇယၢမ်ႈႁူပ်ႉၺႃးသေပွၵ်ႈ ဢမ်ႇယၢမ်ႈလူႉသုမ်းမိူၼ်ၼႆသေပွၵ်ႈ တေလႆႈဝႃႈပွၵ်ႈၼႆႉ ပဵၼ်ပွၵ်ႈဢွၼ်တၢင်းသုတ်းယဝ်ႉ ဝႃႈၼႆ။

ၼႂ်းဝူင်ႈဝၢင်ႈၼႆႉၵူၺ်းၼင်ႇၵဝ်ႇ မၢင်ပိုၼ်ႉတီႈၼႂ်းၸိုင်ႈတႆးပွတ်းၸၢၼ်း ထႅင်ႈလၢႆလၢႆ ၸႄႈဝဵင်းၵေႃႈ လႆႈႁူပ်ႉၺႃးၽေး ၾူၼ်လူင်လူမ်းလူင်မိူၼ်ၵၼ်လႄႈ မၢင်ၸိူဝ်းလႆႈသုမ်းၶူဝ်းၶွင်ယွၼ်ႉမၼ်းၵေႃႈမီးၼႆ လႆႈႁူႉၸွမ်းၶၢဝ်ႇမီးၼင်ႇၼႆ။

တႆးလွတ်ႈလႅဝ်း