ဢၵျၢင်ႉတၢင်းယၢမ်ႈၵူၼ်းၼုမ်ႇသၢဝ် ၸၢင်ႈႁဵတ်းႁႂ်ႈႁူဝ်ၸႂ်ၵိုင်ႉၵၢင်ႉဝၢႆးတၢႆလႆႈ

မေႃယႃၶဝ်လၢတ်ႈဝႃႈ ၽူႈၸၢႆး ဢႃႇယု 30 ပီႊ ၵေႃႉၼိုင်ႈ ႁူဝ်ၸႂ်ၵိုင်ႉၵၢင်ႉဝၢႆး (လွင်ႈႁဵတ်းၵၢၼ်ႁူဝ်ၸႂ်ၵိုင်ႉၵၢင်ႉၽိတ်းပိူင်ႈ)သေ လူႉတၢႆၵႂႃႇ ယွၼ်ႉဢၵျၢင်ႉတၢင်းယၢမ်ႈဢမ်ႇလီ ဢၼ်ၵူၼ်းၼုမ်ႇသၢဝ်ၶဝ် လႆႈၸႂ်ႁဵတ်းၼၼ်ႉ ၼႆယဝ်ႉ။

တၢင်းပဵၼ်ၵၢမ်ႈၼိူဝ်ႉႁူဝ်ၸႂ်ဢမ်ႇႁဵတ်းၵၢၼ် ဢမ်ႇၼၼ် ႁူဝ်ၸႂ်ဝၢႆးၼၼ်ႉ တေမီးၵူၼ်းလၢႆလၢႆၵေႃႉ ပွင်ႇၸႂ်ဝႃႈ ပဵၼ်တၢင်းပဵၼ်ၵူၼ်းထဝ်ႈၵူၺ်းၼႆသေတႃႉ ၼႂ်းၵၢပ်ႈပၢၼ်ယၢမ်းလဵဝ် တေလႆႈႁၼ်ၵူၼ်းၼုမ်ႇသၢဝ် ပဵၼ်ၼမ်ၶိုၼ်ႈမႃး မိူၼ်ၼင်ႇ ၽူႈၸၢႆး ဢႃႇယု 30 ပီႊ ပဵၼ်ၵူၼ်းႁဵတ်းၵၢၼ် ၽၢႆႇ IT လႄႈ မၼ်းၸၢႆးပဵၼ်ၵူၼ်းႁဵတ်းၵၢၼ်ၼၵ်းၼႃ၊ ၼင်ႈယူႇတီႈၵဝ်ႇႁိုင်ႁိုင် ယဝ်ႉဢမ်ႇၵႃး သမ်ႉၼွၼ်းလိုၵ်းထႅင်ႈသေ ႁဵတ်းႁႂ်ႈပဵၼ်ႁူဝ်ၸႂ်ဝၢႆး ၼႆယဝ်ႉ။

ဝႅပ်ႉသၢႆႉၼွၵ်ႈမိူင်း Nguoiduatin လၢႆးငၢၼ်းဝႃႈ မိူဝ်ႈပူၼ်ႉမႃးဢမ်ႇႁိုင်ၼႆႉ ၼုမ်ႇၸၢႆးဢႃႇယုဢႃႈသၢၵ်ႈတိုၵ်ႉလဵၵ်ႉယူႇၼၼ်ႉ ပဵၼ်ဢူၵ်းသတ်ႉဢူၵ်းၵပ်ႉသေ ၵႂႃႇၵူတ်ႇတူဝ်တီႈႁူင်းယႃ​​ မေႃယႃၶဝ်​​ၵူတ်ႇၸႅတ်ႈတူၺ်းသေ ထူပ်းႁၼ်ဝႃႈ မၼ်းၸၢႆး ပဵၼ်တၢင်းပဵၼ်ၵၢမ်ႈၼိူဝ်ႉမၢၵ်ႇႁူဝ်ၸႂ်ၵိုင်ႉၵၢင်ႉတၢႆ (Acute Myocardial lnfarction) လိူဝ်သေၼၼ်ႉ လႆႈၵူတ်ႇၸႅတ်ႈထူပ်းႁၼ်ပႃးဝႃႈ မၼ်းၸၢႆးမီးၽၢင်ႁၢင်ႈလွတ်ႇလိူတ်ႈတိပ်ႇမႃးၶၢဝ်းႁိုင်ယဝ်ႉၼႆလႄႈ ပွင်ႇဝႃႈမၼ်းၸၢႆးမီးၽၢင်ႁၢင်ႈလွတ်ႇလိူတ်ႈႁူဝ်ၸႂ်ပိၵ်ႉတၼ်ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ​​မေႃယႃၶဝ်လႆႈပၼ်ၾၢင်ႉ တွၼ်ႈတႃႇၵူၼ်းမီးဢႃႈသၢၵ်ႈယႂ်ႇၶဝ်ဝႃႈ သင်ၵႆႉၵႆႉပဵၼ်ၼႃႈဢူၵ်းၸဵပ်း ထူၺ်ႈၸႂ်ၵပ်ႉၸိုင် ႁႂ်ႈၵႂႃႇၵူတ်ႇထတ်းတၢင်းပဵၼ် တီႈႁူင်းယႃၵမ်းလဵဝ် ယႃႇပွႆႇပႅတ်ႈဝႆႉလႃးလႃး ၵွပ်ႈတၢင်းပဵၼ်ဢၼ်ၼႆႉ ၵူၼ်းထဝ်ႈပဵၼ်ၼမ်လိူဝ်ၵူၼ်းၼုမ်ႇ။ ဝႃႈၼၼ်သေတႃႉ ယွၼ်ႉလွင်ႈယူႇသဝ်း လွင်ႈၵိၼ်ယမ်ႉသေ ၵူၼ်းၼုမ်ႇၵေႃႈ မီးတိုဝ်ႉတၢင်းပဵၼ် တၢင်းပဵၼ်ၵၢမ်းၼိူဝ်ႉႁူဝ်ၸႂ်ၵိုင်ႉၵၢင်ႉတၢႆၼႆႉယူႇ မိူၼ်ၵၼ်ၼင်ႇၵဝ်ႇ။ လုၵ်ႈဢွၼ်ႇၼုမ်ႇႁၢႆးၸၢႆးယိင်းၵမ်ႈၼမ်​​သမ်ႉ ဢမ်ႇ​​ပေႃးသႂ်ႇၸႂ်ၼိူဝ်ပၢႆးယူႇလီၵႃႈႁိုဝ်  မိူဝ်ႈပဵၼ်ဢူၵ်းၸဵပ်းမႃးၼၼ်ႉ​​ ​​တေဝူၼ်ႉဝႃႈဢမ်ႇၸႂ်ႈလွင်ႈႁၢႆႉႁႅင်းသင် လႄႈဝူၼ်ႉဝႃႈ ဢမ်ႇမီးတိုဝ်ႉတၢင်းတႃႇ​​တေပဵၼ်တၢင်းပဵၼ်ၵဵဝ်ႇၵပ်းမၢၵ်ႇႁူဝ်ၸႂ် ၼႆသေ ယူႇမဝ်မၢင်ၵႂႃႇ ၽိူဝ်ႇၵူတ်ႇၸႅတ်ႈႁူႉဝႃႈ ပဵၼ်တၢင်းပဵၼ်ၵၢမ်ႈၼိူဝ်ႉႁူဝ်ၸႂ်ၵိုင်ႉၵၢင်ႉတၢႆၼႆၵေႃႈ သမ်ႉပေႃးႁၢႆႉႁႅင်းၼႃႇယဝ်ႉ ဝႃႈၼႆ။

လိူဝ်​​သေၼၼ်ႉ ​​မေႃယႃၶဝ်ယင်းပၼ်ၾၢင်ႉဝႆႉဝႃႈ သင်ဢမ်ႇၶႂ်ႈပဵၼ်တၢင်းပဵၼ် ႁူဝ်ၸႂ်ၵိုင်ႉၵၢင်ႉဝၢႆးတၢႆၼႆ ႁႂ်ႈမႄးလႅၵ်ႈလၢႆႈလွင်ႈယူႇသဝ်း လွင်ႈၵိၼ်ယႅမ်ႉ ႁႂ်ႈလီမႃးလိူဝ်ၵဝ်ႇ မိူၼ်ၼင်ႇ−

1. ဢမ်ႇလုတ်ႇလႅတ်းယႃႈ။
2. ဢမ်ႇၵိၼ်ၶိူင်ႈမဝ်းမိင်း ဢမ်ႇၼၼ် သၢၼ်ဢၼ်​​တေႁဵတ်းႁႂ်ႈပဵၼ်​​ၽေးႁၢႆႉ။
3. ၵိၼ်တၢင်းၵိၼ်ဢၼ်ပၼ်ၽွၼ်းလီတႃႇပၢႆးယူႇလီ။
4. ၵုမ်းထိင်းၼမ်ႉၼၵ်း တွၼ်ႈတႃႇငိူင်ႉဝႄႈတၢင်းပဵၼ်ပီး။
5. ဢွၵ်ႇလဵၼ်ႈဢဵၼ်ႁႅင်းတႃႇ​​သေႇ။
6. ၼွၼ်းလပ်းၵၼ်ႁႂ်ႈပဵင်း​​ပေႃး။
7. ငိူဝ်ႉဝႄႈလွင်ႈဝူၼ်ႉၼမ်ၶမ်ၸႂ်။
8. ၵူတ်ႇၸႅတ်ႈတူၺ်းပၢႆးယူႇလီယူႇတႃႇသေႇ တွၼ်ႈတႃ​​တေၶူၼ်ႉႁႃတၢင်းပဵၼ်။

ႁူႉၶိုၼ်းတၼ်း တၢင်းပဵၼ်ၵၢမ်ႈၼိူဝ်ႉမၢၵ်ႇႁူဝ်ၸႂ်ၵိုင်ႉၵၢင်ႉတၢႆ

တၢင်းပဵၼ်ၵၢမ်ႈၼိူဝ်ႉမၢၵ်ႇႁူဝ်ၸႂ်ၵိုင်ႉၵၢင်ႉတၢႆ  (Acute Myocardial lnfarction) ၼႆႉ ယွၼ်ႉဝႃႈ လွတ်ႇလိူတ်ႈဢၼ်သူင်ႇလိူတ်ႈၵႂႃႇလဵင်ႉမၢၵ်ႇႁူဝ်ၸႂ် ၵိုင်ႉၵၢင်ႉပိၵ်ႉတၼ် သေ ၵၢမ်ႈၼိူဝ်ႉႁူဝ်ၸႂ်ဢမ်ႇမီးလိူတ်ႈၵႂႃႇလဵင်ႉလႄႈ ၸင်ႇပဵၼ်မႃး။ လႆႈဝႃႈပဵၼ်တၢင်းပဵၼ်ႁၢႆႉႁႅင်းဢၼ်ၼိုင်ႈ သင်ဢမ်ႇလႆႈႁပ်ႉၵၢၼ်ယူတ်းယႃၵမ်းလဵဝ် ၸိုင် ၵၢမ်ႈၼိူဝ်ႉမၢၵ်ႇႁူဝ်ၸႂ်တေလူႉၵွႆၵႂႃႇသေ ႁဵတ်းႁႂ်ႈထိုင်သၢႆၸႂ်လႆႈၼႆယူႇယဝ်ႉ။

ၵွပ်ႈၼၼ် သင်ႁူႉၶိုတ်းတၼ်း တၢင်းပဵၼ်ၵၢမ်ႈၼိူဝ်ႇမၢၵ်ႇႁူဝ်ၸႂ် ၼႂ်းပၢၼ်ၵူၼ်းၼုမ်ႇ (ဢၼ်လမ်ႇလွင်ႈသုတ်း တၢင်းပဵၼ်ၵၢမ်ႈၼိူဝ်ႉမၢၵ်ႇႁူဝ်ၸႂ်ၵိုင်ႉၵၢင်ႉတၢႆ) ပၼ်ၽၢင်ႁၢင်ႈၾၢင်ႉသတိဢွၵ်ႇမႃးၼၼ်ႉ လမ်ႇလွင်ႈၼႃႇၼႃႇ။ တၢင်းပဵၼ်ၵၢမ်ႈၼိူဝ်ႉမၢၵ်ႇႁူဝ်ၸႂ်ၵိုင်ႉၵၢင်ႉဢမ်ႇႁဵတ်းၵၢၼ် တၢႆၵႂႃႇၼင်ႇဝႆးၽႂ်းၼၼ်ႉ မၢင်ၵေႃႉ တူဝ်ၶိင်းတေၸၢင်ႈပၼ်ၾၢင်ႉဢွၼ်တၢင်း ပဵၼ်ၶၢဝ်းတၢင်း 1 ၸူဝ်ႈမူင်း၊ 1 ဝၼ်း ဢမ်ႇၼၼ် 1 ဝူင်ႈသေ ၸင်ႇပဵၼ်ၵႂႃႇ။ လွင်ႈမၼ်းပၼ်ၾၢင်ႉၼၼ်ႉ ပဵၼ်ႁိုဝ်လႃႇပေႃးဝႃႈၼႆၸိုင်-

1. ဢူၵ်းၸဵပ်းၽၢႆႇသၢႆႉ ဢမ်ႇၼၼ် လၢမ်းၵႂႃႇတီႈႁူဝ်မႃႇၽၢႆႇသၢႆႉ လႄႈ ၶႅၼ် ဢမ်ႇၼၼ် ​​တေၸၢင်ႈၸဵပ်းပႃးတီႈ ၵၢၼ်ႈၶေႃး၊ ၵၢင်း၊ ႁူဝ်မႃႇ၊ လင်၊ ၶႅၼ်ၽၢႆႇၶႂႃ လႄႈ ၽၢႆႇတႂ်ႈၼႃႈဢူၵ်း။
2. မီးႁိူဝ်ႇဢွၵ်ႇ ထူၺ်ႈၸႂ်ဢမ်ႇပုင်ႇမၢၼ်ႇ ဢမ်ႇၼၼ် ထူၺ်ႈၸႂ်မီးသဵင်။
3. ၸႂ်သၼ်ႇ။
4. တွင်ႉၶူၼ်ႉၶႂ်ႈႁၢၵ်ႈ။
5. မၢင်​​ၵေႃႉ​​တေၸၢင်ႈမီးၽၢင်ႁၢင်ႈႁူင်းၶဝ်ႈႁဵတ်းၵၢၼ်ဢမ်ႇပုင်ႇမၢၼ်ႇ။

ၸိူင်ႉႁိုဝ်​​ၵေႃႈလီ မၢင်ၸိူဝ်းဢၼ်ပဵၼ်တၢင်းပဵၼ်ႁူဝ်ၸႂ်ၵၢမ်ႈၼိူဝ်ႉၵိုင်ႉၵၢင်ႉတၢႆ (Silent myocardial infarction) ​​တေဢမ်ႇသူႈၸဵပ်း ဢမ်ႇၼၼ်​​ၵေႃႈ​​တေၸဵပ်းဢိတ်းဢိတ်း လႄႈ​​တေၵႆႉထူပ်းႁၼ်တီႈၵူၼ်းပဵၼ် ၸိူဝ်းဢၼ် ယၢမ်ႈၽႃႇတတ်း၊ ၵူၼ်းဢႃႇယုယႂ်ႇ ဢိင်ႇတင်း ၵူၼ်းပဵၼ်တၢင်းပဵၼ်ယဵဝ်ႈဝၢၼ် လႄႈ လိူတ်ႈသုင်ၼႆယဝ်ႉ။

ပိၼ်ႇတႅမ်ႈ – ၼွင်ႉလူႇ

တႆးလွတ်ႈလႅဝ်း

ဢၢင်ႈဢိင် – https://liff.line.me