ၸဝ်ႈၼႃႈတီႈထႆး တီႉၺွပ်းလႆႈယႃႈမဝ်းၵမ်တီႈလႅၼ်လိၼ် တႆး−ထႆး တင်းၼမ်

ၸဝ်ႈၼႃႈတီႈသိုၵ်းထႆး တီႉၺွပ်းလႆႈ ယႃႈမဝ်းၵမ်ဢၼ်လုၵ်ႉၼႂ်းမိူင်းတႆး လၵ်ႉလွမ် တေႃႉၶၢမ်ႈလႅၼ်လိၼ်သေ သူင်ႇၶဝ်ႈၼႂ်းမိူင်းထႆးၼၼ်ႉတင်းၼမ်။

မိူဝ်ႈၼႆႉဝၼ်းထီႉ 22 May 2024 (ဝၼ်းလိူၼ်ႁူၵ်းမူၼ်း ပီႊတႆး 2118 ၼီႈ) ၽၢႆႇတၢင်း သိုၵ်းထႆး လႆႈႁပ်ႉၶၢဝ်ႇ တေမီးလွင်ႈတေႃႉသူင်ႇယႃႈမဝ်းၵမ် တီႈလႅၼ်လိၼ် တႆး−ထႆး ၼႂ်းၸႄႈဝဵင်းမိူင်းၾၢင် ၸႄႈတွၼ်ႈၵဵင်းမႆႇ ၼႆသေ ၸင်ႇလႆႈဢွၵ်ႇပႂ်ႉၵူတ်ႇထတ်း ထူပ်းႁၼ်ၵႃးလမ်းၼိုင်ႈ ၵူၺ်းမိူဝ်ႈဢၼ်ၵူၼ်းႁေႃႈၵႃးႁၼ်သိုၵ်းထႆးယဝ်ႉ ၸင်ႇၶိုၼ်းႁေႃႈပၢႆႈ လႄႈၽၢႆႇသိုၵ်းထႆးၵေႃႈ ၸင်ႇလႆႈလမ်းၸွမ်း တေႃႇပေႃးထိုင်တီႈ ၼႂ်းဢိူင်ႇမႄႈသၢဝ် ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇၼၼ်ႉ ၸင်ႇတီႉၺွပ်းလႆႈ ၵူၼ်းႁေႃႈၵႃး ဢၼ်တၢင်ႇယႃႈမဝႆႉတင်းမူတ်း 2,000,000 မဵတ်ႉၼၼ်ႉ ဝႃႈၼႆ။

တေႃႈၼင်ႇၼၼ် မိူဝ်ႈၼႂ်းဝၼ်းထီႉ 21 May 2024 တီႈလႅၼ်လိၼ် တႆး−ထႆး ၼႂ်းပိုၼ်ႉတီႈ ဝၢၼ်ႈႁူၺ်ႈလိုၵ်ႉမႄႈယၢင်းၵုမ်း ဢိူင်ႇပဵင်းလူင် ၸႄႈဝဵင်းဝဵင်းႁႅင် ၸႄႈတွၼ်ႈၵဵင်းမႆႇၼၼ်ႉ ၽၢႆႇတၢင်းသိုၵ်းထႆး လႆႈပိုတ်းယိုဝ်းၸွမ်းၵူၼ်းတေႃႉသူင်ႇ ယႃႈသေ တီႉၺွပ်းလႆႈယႃႈမ 1,200,000 မဵတ်ႉ ၵူၺ်းၵူၼ်းတေႃႉသူင်ႇပၢႆႈလွတ်ႈၵႂႃႇလႆႈ ၼႆယဝ်ႉ။

ၼွၵ်ႈလိူဝ်သေၼႆႉ ၽၢႆႇတၢင်းသိုၵ်းထႆး ယင်းတီႉၺွပ်းလႆႈယႃႈမတီႈ ဢိူင်ႇဝၢၼ်ႈတူႇ ၸႄႈဝဵင်းၵဵင်းႁၢႆး ၸႄႈတွၼ်ႈၵဵင်းႁၢႆး တင်းမူတ်း 6,000,000 မဵတ်ႉ ႁူမ်ႈပႃးၵူၼ်းတေႃႉ သူင်ႇ 2 ၵေႃႉ ၵႃး 2 လမ်း ဢၼ်လုၵ်ႉတီႈလႅၼ်လိၼ် တႆး−ထႆး ၼႂ်းပိုၼ်ႉတီႈ ၸႄႈဝဵင်း မႄႈၾႃႉလူင် ၸႄႈတွၼ်ႈၵဵင်းႁၢႆးသေ တေႃႉတၢင်ႇၵႂႃႇၼၼ်ႉ မိူၼ်ၵၼ် ဝႃႈၼႆ။

တႆးလွတ်ႈလႅဝ်း