သိုၵ်းထႆး သိုပ်ႇတီႉၺွပ်းလႆႈယႃႈမဝ်းၵမ်တင်းၼမ်

ၵူၼ်းၵႃႉၶၢႆယႃႈမဝ်းၵမ် လၵ်ႉလွမ်တေႃႉယႃႈၶၢမ်ႈလိၼ်လႅၼ်တႆး-ထႆးသေ သူင်ႇၶဝ်ႈၵႂႃႇ ၼႂ်းမိူင်းထႆးၼၼ်ႉ ထုၵ်ႇသိုၵ်းထႆး တီႉၺွပ်းလႆႈထႅင်ႈတင်းၼမ်။

မိူဝ်ႈဝၼ်းထီႉ 22 May 2024 (ဝၼ်းလိူၼ်ႁူၵ်းမူၼ်း ပီႊတႆး 2118 ၼီႈ) ၼၼ်ႉ ၽၢႆႇတၢင်းၸဝ်ႈၼႃႈတီႈထႆး တီႉၺွပ်းလႆႈယႃႈမ 2,200,000 မဵတ်ႉ ႁူမ်ႈပႃး တီႈၵူဝ်ႇတွင်ႇ ဢၼ်မီးၼႂ်းပိုၼ်ႉတီႈ ဝၢၼ်ႈပႃႇယၢင်းမႂ်ႇ ပွၵ်ႉ 4 ဢိူင်ႇဝဵင်းၽၢင်းၶမ်း ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆး ဢၼ်လုၵ်ႉတီႈ လႅၼ်လိၼ် တႆး−ထႆး လၵ်ႉတေႃႉတၢင်ႇၵႂႃႇၼၼ်ႉသေ တီႉၺွပ်းလႆႈပႃးၵူၼ်းတေႃႉသူင်ႇ 1 ၵေႃႉ ပဵၼ်ပႃးၸဝ်ႈၶွင်ၵူဝ်ႇတွင်ႇ လႄႈ မၼ်းၸၢႆးလႆႈငိုၼ်းၵႃႈဝႆႉယႃႈမဝ်းၵမ် 20,000 ဝၢတ်ႇ ဝႃႈၼႆ။

ၼွၵ်ႈလိူဝ်သေၼႆႉ ၽၢႆႇတၢင်းၸဝ်ႈၼႃႈတီႈထႆး ယင်းတီႉၺွပ်းလႆႈၽူႈၵဵဝ်ႇၶွင်ႈ ၼႂ်းၵၢၼ်တေႃႉသူင်ႇယႃႈမဝ်းပွၵ်ႈၵမ်းၼႆႉထႅင်ႈ 2 ၵေႃႉ လႄႈ ၶႃသွင်ၵေႃႉၼႆႉ လႆႈငိုၼ်းၵႃႈၸၢင်ႈ ၼႂ်းၵၢၼ်တေႃႉသူင်ႇယႃႈမဝ်းၵမ်ၼိုင်ႈၵေႃႉလႂ် 50,000 ဝၢတ်ႇ ၼႆယဝ်ႉ။

တေႃႈၼင်ႇၼၼ် မိူဝ်ႈၼႂ်းဝၼ်းထီႉ 21 May 2024 ၼၼ်ႉၵေႃႈ ၽၢႆႇတၢင်းၸဝ်ႈၼႃႈ တီႈထႆး တီႉၺွပ်းလႆႈယႃႈမ 2,000,000 မဵတ်ႉ ႁူမ်ႈပႃးၵူၼ်းတေႃႉသူင်ႇ 1 ၵေႃႉ တီႈၼႂ်း ဢိူင်ႇမႄႈသၢဝ် ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ လႄႈ ယႃႈမဝ်းၵမ်ၼႆႉၵေႃႈ လုၵ်ႉတီႈလႅၼ်လိၼ် တႆး−ထႆး သေ တေႃႉတၢင်ႇၶဝ်ႈၼႂ်းမိူင်းထႆးမိူၼ်ၵၼ် ဝႃႈၼႆ။

တႆးလွတ်ႈလႅဝ်း