လွင်ႈထုၵ်ႇလီႁူႉမိူဝ်ႈၽွင်းတေၵိၼ်မၢၵ်ႇလၢင်းလိၼ်

ၸူဝ်ႈၽွင်းၼႆႉ တေမီးမၢၵ်ႇမႆႉတင်းၼမ် ဢၼ်ဢွၵ်ႇၼႂ်းၶၢဝ်းမႆႈ မိူၼ်ၼင်ႇ မၢၵ်ႇလၢင်းလိၼ်(Durian) ၼႆႉၵေႃႈ ပဵၼ်မၢၵ်ႇမႆႉဢၼ်ဢွၵ်ႇၼႂ်းၶၢဝ်းမႆႈၼၼ်ႉယဝ်ႉ။ ၵူၺ်းၵႃႈ ၸွင်ႇႁူႉႁိုဝ်ဝႃႈ မၢၵ်ႇလၢင်းလိၼ်ၼႆႉ သမ်ႉဝႃႈမၼ်းဝၢၼ် မီးၽွၼ်းလီၼမ်ၼႆသေတႃႉၵေႃႈ  သင်ဝႃႈၵိၼ်ဢမ်ႇမႅၼ်ႈလၢႆးမၼ်း ပေႃးၼႆၸိုင်  ၸၢင်ႈထိုင်သၢႆၸႂ်လႆႈမိူၼ်ၵၼ်။ ယွၼ်ႉၼၼ် ႁဝ်းမႃးတူၺ်းၸွမ်းၵၼ်ဝႃႈ လွင်ႈထုၵ်ႇလီႁူႉမိူဝ်ႈၽွင်းတေၵိၼ်မၢၵ်ႇလၢင်းလိၼ်ၼၼ်ႉ တေမီးသင်လၢႆလၢႆ- 

လွင်ႈထုၵ်ႇလီႁူႉမိူဝ်ႈၽွင်းတေၵိၼ်မၢၵ်ႇလၢင်းလိၼ်

1. မၢၵ်ႇလၢင်းလိၼ်ၼႆႉ ပဵၼ်မၢၵ်ႇမႆႉမဵဝ်းဢၼ်မီး Calorie သုင် ယွၼ်ႉပိူဝ်ႈမၢၵ်ႇလၢင်းလိၼ် 4−6 မဵတ်ႉၼႆႉ ပၼ် Calorie ထိုင် 400 kilocalories ပဵင်းၵၼ်တင်းၼမ်ႉဢၢတ်းလူမ်း 2 ဢႅပ်ႇ ဢမ်ႇၼၼ် ၶဝ်ႈ ၼိုင်ႈဝၢၼ်ႇတဵၼ်တဵမ်။ ယွၼ်ႉၼၼ် သင်ဝႃႈၵိၼ်ၼမ်ၼႆ ထုၵ်ႇလီၾၢင်ႉယူႇ ယွၼ်ႉၼမ်ႉၼၵ်းတေၸၢင်ႈၶိုၼ်ႈ။
2. မၢၵ်ႇလၢင်းလိၼ်ၼႆႉ မီးထၢတ်ႈၵိူဝ်ဝၢၼ်သုင်ပႃးထႅင်ႈလႄႈ ယွၼ်ႉၼၼ် ၵူၼ်းပဵၼ်တၢင်းပဵၼ်ယဵဝ်ႈဝၢၼ်ၶဝ် ထုၵ်ႇလီငိူင်ႉဝႄႈ။
3. လိူဝ်သေၵူၼ်းပဵၼ်တၢင်းပဵၼ်ယဵဝ်ႈဝၢၼ်ယဝ်ႉ ၵူၼ်းဢၼ်မီးတၢင်းပဵၼ်ၵိုၵ်းတူဝ် မိူၼ်ၼင်ႇ ၵူၼ်းပဵၼ်လိူတ်ႈသုင် လႄႈ ၶႆမၼ်းၼႂ်းလိူတ်ႈသုင် ၸိူဝ်းၼႆႉ ဢမ်ႇထုၵ်ႇလီၵိၼ်ၼမ်။
4. မၢၵ်ႇလၢင်းလိၼ်ၼႆႉ ပဵၼ်မၢၵ်ႇမႆႉဢၼ်ဢွၵ်ႇၼႂ်းၶၢဝ်းမႆႈသေ ပဵၼ်တၢင်းၵိၼ်ဢၼ်ၵိၼ်လဵၼ်ႈမဵဝ်းၼိုင်ႈလႄႈ မၼ်းမီးထၢတ်ႈမႆႈယူႇယဝ်ႉ သင်ဝႃႈဢဝ်မႃးၵိၼ်ၸွမ်း Alcohol ဢမ်ႇဝႃႈတေပဵၼ် လဝ်ႈ၊ ပီႇယႃႇ လႄႈ ၼမ်ႉဢၼ်မီး Alcohol တင်းလၢႆ ၼႆၸိုင် ၼိုင်ႈၶႅၼ်းႁဵတ်းႁႂ်ႈပဵၼ်ၽေးတေႃႇတူဝ်ၶိင်း ယွၼ်ႉတေႁဵတ်းႁႂ်ႈတူဝ်ၶိင်း လႆႈႁပ်ႉတၢင်းမႆႈႁႅင်းပူၼ်ႉတီႈသေ တေၸၢင်ႈထိုင်သၢႆၸႂ်လႆႈၼၼ်ႉယဝ်ႉ။
5. ယွၼ်ႉပိူဝ်ႈဝႃႈမၢၵ်ႇလၢင်းလိၼ်ၼႆႉ မၼ်းပဵၼ်ထၢတ်ႈဢၼ်ႁႅင်းဝႆႉယဝ်ႉလႄႈ ယွၼ်ႉၼၼ် မိူဝ်ႈၽွင်းယၢမ်းၵိၼ်မၢၵ်ႇလၢင်းလိၼ်ၼၼ်ႉ ထုၵ်ႇလီငိူင်ႉဝႄႈ တၢင်းၵိၼ်ဢၼ်မီးထၢတ်ႈဢၼ်ပၼ်ဢဵၼ်ႁႅင်းသုင် မိူၼ်ၼင်ႇ တၢင်းၵိၼ်ဢၼ်ၶူဝ်ႈ၊ တၢင်းၵိၼ်မဵဝ်းဢၼ်သႂ်ႇၼမ်ႉမၢၵ်ႇဢုၼ်၊ တၢင်းၵိၼ်ဢၼ်ၸဵမ်းဝၢၼ် လႄႈ တၢင်းၵိၼ်ဢၼ်မီးၶႆမၼ်း ၸိူဝ်းၼႆႉ။ သင်ပဵၼ်လႆႈၼႆၸိုင် ထုၵ်ႇလီဢွၵ်ႇပၼ်ဢဵၼ်ႁႅင်း တွၼ်ႈတႃႇလူတ်းယွမ်း ဢၼ်ၵိၼ်ၶဝ်ႈၵႂႃႇၸိူဝ်းၼၼ်ႉယဝ်ႉ။

လွင်ႈတၢင်းၸိူဝ်းၼႆႉ ဢမ်ႇၸႂ်ႈဝႃႈ ႁၢမ်ႈၵိၼ်မၢၵ်ႇလၢင်းလိၼ်။ ၵူၺ်းၵႃႈ မိူဝ်ၽွင်းတေၵိၼ်ၼၼ်ႉ ထုၵ်ႇလီမီးသတိၼမ်ၼမ် ထုၵ်ႇလီႁူႉတူဝ်ဝႃႈ ၵိၼ်ၵႂႃႇၼမ်ၵႃႈႁိုဝ်ယဝ်ႉ ထုၵ်ႇလီမေႃႁၢမ်ႈၸႂ်ၸဝ်ႈၵဝ်ႇ ဢမ်ႇၵိၼ်ၼမ်လူၼ်ႉပူၼ်ႉတီႈ လႄႈ ထုၵ်ႇလီဢွၵ်ႇဢဵၼ်ႁႅင်းပၼ်ယူႇတႃႇသေႇ။ သင်ဝႃႈႁဵတ်းၸွမ်းလႆႈၸိူဝ်းၼႆႉပေႃးၼႆၸိုင် ၵိၼ်မၢၵ်ႇလၢင်းလိၼ်လႆႈ လူၺ်ႈဢမ်ႇမီးၽေး ဢမ်ႇမီးလွင်ႈထုၵ်ႇလီမႆႈၸႂ်သင်ၼၼ်ႉယဝ်ႉ။

ပိၼ်ႇတႅမ်ႈ − ယိင်းၼွင်ႉ

တႆးလွတ်ႈလႅဝ်း

ဢၢင်ႈဢိင် − Snook