သိုၵ်းထႆး ပိုတ်းယိုဝ်းၵၼ်တင်းၵူၼ်းၵႃႉယႃႈ တီႈႁိမ်းလႅၼ်လိၼ် တႆး−ထႆး

ၵူၼ်းၵႃႉၶၢႆယႃႈမဝ်းၵမ် ပႃးတင်းၵွင်ႈၵၢင်ႇသေ တေႃႉယႃႈၶၢမ်ႈလႅၼ်လိၼ် ၶဝ်ႈၵႂႃႇၼႂ်းမိူင်းထႆးလႄႈ မီးလွင်ႈပိုတ်းယိုဝ်းၸွမ်းသိုၵ်းထႆး ၼႅတ်ႈပႅတ်ႈတင်းၵွင်ႈတင်းယႃႈ ပၢႆႈဢဝ်တူဝ်လွတ်ႈ။

မိူဝ်ႈဝႃးဝၼ်းထီႉ 27 May 2024 (လိူၼ်ႁူၵ်းလွင်ႈ 5 ၶမ်ႈ ပီႊတႆး 2118 ၼီႈ) ၼၼ်ႉ ၽၢႆႇတၢင်းသိုၵ်းထႆး ဢွၵ်ႇလဵပ်ႈယၢမ်းၸွမ်းၼႂ်းပိုၼ်ႉတီႈဝၢၼ်ႈၼႃးမၢၵ်ႇဢိုၼ်ႈ ပွၵ်ႉ 14 ဢိူင်ႇမႄႈဢၢႆး ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ ဢၼ်ယၢၼ်ၵႆတင်းလႅၼ် လိၼ် တႆး−ထႆး မွၵ်ႈ 2 ၵီႇလူဝ်ႇမီႇတိူဝ်ႇၼၼ်ႉ လႆႈထူပ်းႁၼ်ၵူၼ်း 3−5 ၵေႃႉ ပႆယူႇၸွမ်းၼႂ်းထိူၼ်ႇလႄႈ တေဢၢၼ်းၶဝ်ႈၵူတ်ႇထတ်း ၵူၺ်းၵူၼ်းၸိူဝ်းၼၼ်ႉသမ်ႉ ပိုတ်းယိုဝ်းသႂ်ႇသိုၵ်းထႆးဢွၼ်တၢင်းသေ သွင်ၽၢႆႇပိုတ်းယိုဝ်းၵၼ်ႁိုင်မွၵ်ႈ 3 မိၼိတ်ႉ ၼႆယဝ်ႉ။

ဝၢႆးသေသဵင်ႈၵွင်ႈယဵၼ်ၵႂႃႇယဝ်ႉ ၽၢႆႇတၢင်းသိုၵ်းထႆး ၸင်ႇလႆႈၶဝ်ႈၵူတ်ႇထတ်း ၼႂ်းပိုၼ်ႉတီႈဢၼ်ပိုတ်းယိုဝ်းၵၼ်ၼၼ်ႉသေ ထူပ်းႁၼ်ၵွင်ႈ 2 လဝ်း လႄႈ ယႃႈမ 300,000 မဵတ်ႉ ဢၼ်ၵူၼ်းတေႃႉယႃႈပႅတ်ႈဝႆႉသေ ၼႅတ်ႈလႅၼ်ႈပၢႆႈဢဝ်တူဝ်လွတ်ႈ ၼၼ်ႉ ဝႃႈၼႆ။

တႆးလွတ်ႈလႅဝ်း