ၸဝ်ႈၼႃႈတီႈထႆး သိုပ်ႇတီႉၺွပ်းလႆႈယႃႈမထႅင်ႈ 1 လၢၼ်ႉမဵတ်ႉ

ၵူၼ်းတေႃႉသူင်ႇယႃႈမဝ်းၵမ် လုၵ်ႉတီႈလႅၼ်လိၼ် တႆး−ထႆး သေ တေႃႉယႃႈမဝ်းၵမ် ဢၢၼ်းသူင်ႇၸႅၵ်ႇၶၢႆၼႂ်းၶူးၼႂ်းဝဵင်းၼၼ်ႉ ထုၵ်ႇတီႉၺွပ်းတင်းၵူၼ်းတင်းယႃႈ။

မိူဝ်ႈၼႆႉဝၼ်းထီႉ 29 May 2024 (လိူၼ်ႁူၵ်းလွင်ႈ 7 ၶမ်ႈ ပီႊတႆး 2118 ၼီႈ) ၼၼ်ႉ ယူႇတီႈ ၸဝ်ႈၼႃႈတီႈ သိုၵ်းထႆး၊ ပလိၵ်ႈထႆး ဢိၵ်ႇတင်း ၽူႈမီးပုၼ်ႈၽွၼ်းထႅင်ႈလၢႆ လၢႆၽၢႆႇ လႆႈၶဝ်ႈၵူတ်ႇထတ်းၵႃးလမ်းၼိုင်ႈ ဢၼ်ၵႂႃႇၵိုတ်းဝႆႉယူႇတီႈႁၢင်ႉ Big C Supermarket ဝၢၼ်ႈတူႇ ဢိူင်ႇဝၢၼ်ႈတူႇ ၸႄႈဝဵင်းၵဵင်းႁၢႆး ၸႄႈတွၼ်ႈၵဵင်းႁၢႆးသေ ထူပ်းႁၼ်ယႃႈမ 1,000,000 မဵတ်ႉ လႄႈ တီႉၺွပ်းၵုမ်းၵမ်လႆႈပႃးၵူၼ်းတေႃႉသူင်ႇ 2 ၵေႃႉ ပဵၼ်ၸၢႆး 1 ၵေႃႉ လႄႈ ယိင်း 1 ၵေႃႉ ၼႆယဝ်ႉ။

ယႃႈမဢၼ်ၸဝ်ႈၼႃႈတီႈထႆးၶဝ်တီႉၺွပ်းလႆႈပွၵ်ႈၵမ်းၼႆႉၵေႃႈ လုၵ်ႉတီႈလႅၼ်လိၼ် တႆး−ထႆး ၼႂ်းပိုၼ်ႉတီႈ ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆးသေ တေႃႉတၢင်ႇၶဝ်ႈ ဝႃႈၼႆ။

မိူဝ်ႈၼႂ်းဝၼ်းထီႉ 27 May 2024 ပူၼ်ႉမႃးၼၼ်ႉၵေႃႈ ၽၢႆႇတၢင်းသိုၵ်းထႆး လႆႈမီးလွင်ႈ ပိုတ်းယိုဝ်းၸွမ်းၵူၼ်းတေႃႉသူင်ႇယႃႈမဝ်းတီႈႁိမ်း လႅၼ်လိၼ် တႆး−ထႆး ၼႂ်းပိုၼ်ႉတီႈ ဝၢၼ်ႈၼႃးမၢၵ်ႇဢိုၼ်ႈ ပွၵ်ႉ 14 ဢိူင်ႇမႄႈဢၢႆး ၸႄႈဝဵင်းမႄႈဢၢႆး ၸႄႈတွၼ်ႈၵဵင်းမႆႇ သေ တီႉၺွပ်းလႆႈယႃႈမ 300,000 မဵတ်ႉ တင်း ၵွင်ႈ 2 လဝ်း ၼႆယဝ်ႉ။

တႆးလွတ်ႈလႅဝ်း