တၢင်းပဵၼ်တိတ်းၸပ်းလႅၼ်းယႃႈ

လၢႆလၢႆၵေႃႉတေဝူၼ်ႉဝႃႈ လႅၼ်းယႃႈၼႆႉ ပဵၼ်ဢူၺ်းၵေႃႉဢၼ်ၼိုင်ႈ။ ၼႂ်းၶၢဝ်းယၢမ်းဢၼ်မီးလွင်ႈၶီငဝ်မွင်ၸႂ်၊ ဝူၼ်ႉၼမ်၊ ၸႂ်သုၵ်ႉ၊ ဢမ်ႇဝႃႈ မီးတၢင်းမူၼ်ႈသိူဝ်း၊ ယူႇၸွမ်းဢူၺ်းၵေႃႉဢူၺ်းသႄႈ၊ ၼႂ်းပၢင်လဝ်ႈ ၸိူဝ်းၼႆႉၵေႃႈ ဝူၼ်ႉထိုင်လႅၼ်းယႃႈ၊ မိူဝ်ႈတေၵိၼ်ၶဝ်ႈ လႄႈ မိူဝ်ႈၵိၼ်ၶဝ်ႈယဝ်ႉၼၼ်ႉၵေႃႈ ၶႂ်ႈလုတ်ႇလႅၼ်းယႃႈ၊ ၵႂႃႇၶဝ်ႈႁွင်ႈၼမ်ႉႁွင်ႈၽၢႆႈၵေႃႈ လူဝ်ႇလုတ်ႇလႅၼ်းယႃႈ ၸဵမ်ၸိူဝ်းၼႆႉသေ ထိုင်တီႈႁဵတ်းႁႂ်ႈပဵၼ်တၢင်းယၢမ်ႈၵႂႃႇ။ ၵူၺ်းလွင်ႈႁဵတ်းသၢင်ႈၸိူဝ်းၼႆႉ ပဵၼ်လွင်ႈႁဵတ်းသၢင်ႈဢၼ်ႁွင်ႉဝႃႈ “တၢင်းပဵၼ်တိတ်းၸပ်းလႅၼ်းယႃႈ” ဢၼ်ၼိုင်ႈၼၼ်ႉယဝ်ႉ။

တေဢွၼ်ၵၼ်ႁူႉၵၼ်လီယူႇဝႃႈ လႅၼ်းယႃႈၼႆႉ တေမီးသၢၼ်ၼီႇၵူဝ်ႇတိၼ်း Nicotine သေ သင်ဝႃႈတူဝ်ၶိင်းၵူၼ်းႁဝ်း လႆႈႁပ်ႉသၢၼ်ဢၼ်ၼႆႉႁိုင်ႁိုင်ပေႃးၼႆၸိုင် တေသူင်ႇၽွၼ်းတုမ်ႉယွၼ်ႈ ႁဵတ်းႁႂ်ႈပဵၼ်မႃး ၵႅၼ်ႇသႃႇပွတ်ႇ၊ တၢင်းပဵၼ်ႁူဝ်ၸႂ် လႄႈ သူင်ႇၽွၼ်းတုမ်ႉယွၼ်ႈတေႃႇတူဝ်ၶိင်းထႅင်ႈလၢႆလၢႆတီႈ ႁူမ်ႈထိုင်ပႃး ၵႂၼ်းလႅၼ်းယႃႈၼႆႉသမ်ႉ ႁဵတ်းႁၢႆႉၵူၼ်းႁိမ်းႁွမ်းထႅင်ႈ ဢမ်ႇၼၼ်တေႁွင်ႉၵၼ်ဝႃႈ ၵႂၼ်းလႅၼ်းယႃႈမိုဝ်းသွင်။ လႅၼ်းယႃႈၼိုင်ႈလႅၼ်းၼႆႉ မီးသၢၼ်ၶေးမီး 4,000 မဵဝ်းပၢႆ ပဵၼ်သၢၼ်ၵွင်ႉ  250 မဵဝ်း လွင်ႈလုတ်ႇလႅၼ်းယႃႈၼႆႉ ၼိုင်ႈလုတ်ႇႁိုင်ၵေႃႈ တေႁဵတ်းႁႂ်ႈဢႃႇယုပွတ်းလူင်း ၼၼ်ႉယဝ်ႉ။

တၢင်းပဵၼ်ဢၼ်မႃးၸွမ်းလႅၼ်းယႃႈ

လႅၼ်းယႃႈႁဵတ်းႁၢႆႉၵူၼ်းၼႂ်းလုမ်ႈၾႃႉ ၼိုင်ႈပီႊၼႆႉ မွၵ်ႈ 6 လၢၼ်ႉၵေႃႉ ၵူၺ်းၵႃႈ ၼႂ်း 6 လၢၼ်ႉၵေႃႉၼႆႉ တႃႇ 6  သႅၼ်ၵေႃႉသမ်ႉ လူႉတၢႆယွၼ်ႉဢၢႆၵႂၼ်းလႅၼ်းယႃႈ ၼႆယူႇ။ ယွၼ်ႉၼၼ် တၢင်းပဵၼ်ဢၼ်တေမႃးၸွမ်းလႅၼ်းယႃႈၼႆႉ တေမီးယူႇမိူၼ်ၼင်ႇ –

1. တၢင်းပဵၼ်ႁူဝ်ၸႂ်။
2. တၢင်းပဵၼ်ၵႅၼ်ႇသႃႇပွတ်ႇ။
3. တၢင်းပဵၼ်ၵႅၼ်ႇသႃႇၼႂ်းသူပ်း။
4. သူင်ႇၽွၼ်းတုမ်ႉယွၼ်ႈတေႃႇလွတ်ႇလိူတ်ႈ။
5. တၢင်းပဵၼ်လိူတ်ႈသုင်။
6. သူင်ႇၽွၼ်းတုမ်ႉယွၼ်ႈတေႃႇလုၵ်ႈဢွၼ်ႇၼႂ်းတွင်ႉ လႄႈ မႄႈလုၵ်ႈဢွၼ်ႇ တေၸၢင်ႈတူၵ်းလုၵ်ႈ ဢမ်ႇၼၼ် လုၵ်ႈဢွၼ်ႇတၢႆၼႂ်းတွင်ႉ။
7. ႁဵတ်းႁႂ်ႈၸႂ်ၶႂ်ႈႁူမ်ႈၵႃႇမယွမ်းလူင်း။

သင်ဝႃႈၶႂ်ႈတိုတ်းလႅၼ်းယႃႈ တေလႆႈႁဵတ်းၸိူင်ႉႁိုဝ်

လွင်ႈတိတ်းၸပ်းလႅၼ်းယႃႈၼႆႉ မီးၽေးထိုင်သၢႆၸႂ်လႆႈ ဝႃႈၼႆသေတႃႉ ၼင်ႇႁိုဝ်တေလူတ်းယွမ်းလႆႈလွင်ႈလူႉတၢႆ ယွၼ်ႉလုတ်ႇလႅၼ်းယႃၼႆႉ မီးတိုဝ်ႉတၢင်းတႃႇတေႁႄႉၵင်ႈလႆႈ လူၺ်ႈလွၵ်းလၢႆး ႁႂ်ႈမေႃယႃ ဢမ်ႇၼၼ် ၵူၼ်းဢၼ်မီးပၢႆးႁူႉလွင်ႈပၢႆးယူႇလီၼၼ်ႉလီလီၸွႆႈၼၼ်ႉ လႆႈယူႇ။ ၵူၺ်းၵႃႈ မီးၵူၼ်းတိတ်းၸပ်းလႅၼ်းယႃႈ  ဢၼ်ဢမ်ႇၵႂႃႇႁႃမေႃယႃ ဢမ်ႇၼၼ် ၽူႈမီးပၢႆးႁူႉလွင်ႈတိုတ်းလႅၼ်းယႃႈ ၸိူဝ်းၼႆႉသေ တိုတ်းလိပ်းတိုတ်းလႅင်ႁင်းၽႂ်မၼ်းၵေႃႈ မီးတင်းၼမ်ယူႇ။ လူၺ်ႈလွၵ်းလၢႆးဢၼ်ၼႆႉ ၵမ်ႈၼမ်ယဝ်ႉ တေဢမ်ႇတိုတ်းလႅၼ်းယႃႈလႆႈ ၵမ်ႈပႃႈၼမ်ၵေႃႈ တေမႃးလုတ်ႇလႅၼ်းယႃႈၶိုၼ်းသေ တိတ်းၸပ်းယိၼ်ႉမၼ်းၶိုၼ်း ၼႃႇလိူဝ်ၵဝ်ႇ ၼၼ်ႉယဝ်ႉ။ ၵူၼ်းဢၼ်ယၢမ်ႈလုတ်ႇလႅၼ်းယႃႈသေ ၵိုင်ႉၵၢင်ႉမႃးတိုတ်းၵမ်းလဵဝ် လူၺ်ႈဢမ်ႇၸႂ်ႉလွၵ်းလၢႆးသင်ၼႆႉ တေၸၢင်ႈႁဵတ်းႁႂ်ႈ မီးၾၢင်ႁၢင်ႈ ၸႂ်ပိတ်းၸႂ်ပွတ်း၊  ဝူၼ်ႉၼမ်၊ ၸႂ်လမ်ငၢႆႈ၊ ဢမ်ႇမီးသမႃႇထိ၊ မီးလွင်ႈၶႂ်ႈၵိၼ်တၢင်းၵိၼ်ၼမ်မႃးလိူဝ်ၵဝ်ႇ၊ ငဝ်မိုင်၊ ၼွၼ်းဢမ်ႇလပ်း ၸဵမ်ၸိူဝ်းၼႆႉယဝ်ႉ။ ယွၼ်ႉပိူဝ်ႈၼၼ်လႄႈ လွင်ႈတိုတ်းလႅၼ်းယႃႈ လူၺ်ႈႁႂ်ႈမေႃယႃၸွႆႈၼႆႉ တေလႆႈဝႃႈ ပဵၼ်လွင်ႈဢၼ်တေၸၢင်ႈတိုတ်းလႅၼ်းယႃႈလႆႈလီလိူဝ်ပိူၼ်ႈၼၼ်ႉယဝ်ႉ။

သင်ဝႃႈၵႂႃႇၸူးမေႃယႃသေ ႁႂ်ႈမေႃယႃၸွႆႈတိုတ်းပၼ်ၼႆၸိုင် မေႃယႃၶဝ် တေတူၺ်းပႃးလွင်ႈဢၼ်တိတ်းၸပ်းလႅၼ်းယႃႈၼၼ်ႉ ၸွင်ႇမၼ်းႁၢႆႉႁႅင်းၼႆသေ တေၸွႆႈတူၺ်းထိုင် လႄႈ ယူတ်းယႃၵႂႃႇ ႁႂ်ႈမၼ်းထုၵ်ႇမႅၼ်ႈ  လႄႈ တေမီးလွင်ႈႁွင်ႉထူပ်းတႃႇတူၺ်းၾၢင်ႁၢင်ႈလႄႈ လွင်ႈတိုတ်းလႅၼ်းယႃႈၵႂႃႇတႃႇသေႇ။  လွင်ႈဢၼ်ၵူၼ်းတိတ်းၸပ်းလႅၼ်းယႃႈ ၶတ်းၸႂ်တိုတ်းလႅၼ်းယႃႈႁင်းၵူၺ်းၼၼ်ႉ သင်ဝႃႈဢမ်ႇပဵၼ်မႃး ၸွမ်းၼင်ႇၵၢင်ၸႂ်ၶဝ်ၼႆ တေၸၢင်ႈႁဵတ်းႁႂ်ႈၸႂ်တူၵ်းပႅတ်ႈလႆႈ ယွၼ်ႉပိူဝ်ႈ သၽႃႇဝၵူၼ်းပဵၼ်ၸိူင်ႉၼႆၼႆႉ တေပဵၼ်ပဵၼ်ႁၢႆႁၢႆ ၼၼ်ႉယဝ်ႉ။ ဢၼ်လွင်ႈယႂ်ႇသုတ်း တႃႇၵူၼ်းတိတ်းၸပ်းလႅၼ်းယႃႈ တေတိုတ်းယိၼ်ႉမၼ်းလႆႈၼၼ်ႉ တေလႆႈမီးလွင်ႈတင်ႈၸႂ်သေ ထွမ်ႇၶေႃႈၼႄႉၼမ်းတီႈမေႃယႃ ႁဵတ်းၸွမ်းၼင်ႇမေႃယႃၶဝ်လၢတ်ႈ ၵိၼ်ယႃႁႂ်ႈမႅၼ်ႈၸွမ်းၶၢဝ်းယၢမ်းၼႆၸိုင် ယုမ်ႇယမ်ဝႃႈ တေမီးတိုဝ်ႉတၢင်းႁၢႆလႆႈယူႇ။

ပိၼ်ႇတႅမ်ႈ − ယိင်းၼွင်ႉ

တႆးလွတ်ႈလႅဝ်း

https://www.sanook.com/health/16217/