ၵူၼ်းၵႃႉယႃႈမဝ်းၵမ် ႁၢင်ႈႁႅၼ်းတေႃႉယႃႈၶဝ်ႈၵႂႃႇၼႂ်းမိူင်းထႆးၼပ်ႉႁူဝ်သိပ်းလၢၼ်ႉ

သိုၵ်းထႆး တီႉၺွပ်းလႆႈယႃႈမ ဢၼ်လၵ်ႉတေႃႉၶၢမ်ႈလႅၼ်လိၼ်သေ သူင်ႇၶဝ်ႈၵႂႃႇၼႂ်း မိူင်းထႆးထႅင်ႈၼပ်ႉႁူဝ်လၢၼ်ႉမဵတ်ႉ လႄႈ ၽၢႆႇၵူၼ်းၵႃႉယႃႈၵေႃႈ ႁၢင်ႈႁႅၼ်း သူင်ႇယႃႈ ၶဝ်ႈၼႂ်းမိူင်းထႆးထႅင်ႈ ၼပ်ႉႁူဝ်သိပ်းလၢၼ်ႉ ၼႆယဝ်ႉ။

မိူဝ်ႈၼႆႉဝၼ်းထီႉ 31 May 2024 (လိူၼ်ႁူၵ်းလွင်ႈ 9 ၶမ်ႈ ပီႊတႆး 2118 ၼီႈ) ယူႇတီႈ ၸဝ်ႈၼႃႈတီႈသိုၵ်းထႆး ဢိၵ်ႇတင်း ၽူႈမီးပုၼ်ႈၽွၼ်းထႅင်ႈလၢႆလၢႆၽၢႆႇ လႆႈႁပ်ႉၶၢဝ်ႇ တေမီးလွင်ႈတေႃႉသူင်ႇယႃႈမဝ်းၵမ် ၸွမ်းလႅၼ်လိၼ် တႆး−ထႆး ၼႂ်းပိုၼ်ႉတီႈ ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆးၼႆလႄႈ ၸင်ႇလႆႈဢွၵ်ႇၵႂႃႇပႂ်ႉၵူတ်ႇထတ်း ထူပ်းႁၼ် ၵွင်ထူင်ၵေႃႇၸၢၼ်ႈတႂ်ႈၵေႃမႆႉႁူၵ်း ဢၼ်မီးယူႇတီႈႁိမ်းၶၢင်ႈတၢင်း ၼႂ်းပိုၼ်ႉတီႈဝၢၼ်ႈမႄႈသလွင်းၼႂ်း ဢိူင်ႇသီၶမ်ႉ ၸႄႈဝဵင်းမႄႈၸၼ်း 10 ထူင် ၼႂ်းမၼ်း သႂ်ႇယႃႈမဝႆႉတင်းမူတ်း 2,000,000 မဵတ်ႉ ၵူၺ်းဢမ်ႇထူပ်းႁၼ်ၵူၼ်းသေၵေႃႉ ၼႆယဝ်ႉ။

ၽၢႆႇတၢင်းၸဝ်ႈၼႃႈတီႈထႆး ၸင်ႇလႆႈၵူတ်ႇထတ်းတူၺ်းလီလီသေ ႁူႉဝႃႈ ဢွၼ်တၢင်းၼႆႉ မီးၵႃးဢၼ်ထၢင်ႇထိူမ်လမ်းၼိုင်ႈ ႁေႃႈၶဝ်ႈၶဝ်ႈဢွၵ်ႇဢွၵ်ႇ ၼႂ်းၸႄႈဝဵင်းမႄႈၾႃႉလူင် တင်း ၸႄႈဝဵင်းမႄႈၸၼ်းလႄႈ ယၢမ်းလဵဝ် တိုၵ်ႉၸွမ်းႁႃၵႃးလမ်းၼၼ်ႉယူႇ ဝႃႈၼႆ။

တေႃႈၼင်ႇၼၼ် မိူဝ်ႈၼႂ်းဝၼ်းထီႉ 30 May 2024 တီႈၼႂ်းဝၢၼ်ႈပူင်းၶွင် ပွၵ်ႉ 5 ဢိူင်ႇ မႄႈငိုၼ်း ၸႄႈဝဵင်းၵဵင်းသႅၼ် ၸႄႈတွၼ်ႈၵဵင်းႁၢႆးၼၼ်ႉ ၽၢႆႇတၢင်းၸဝ်ႈၼႃႈတီႈထႆး တီႉၺွပ်းလႆႈယႃႈမ ဢၼ်လုၵ်ႉတီႈ မိူင်းလၢဝ်းသေ တေႃႉတၢင်ႇႁိူဝ်းၶၢမ်ႈမႄႈၼမ်ႉၶွင် သူင်ႇၶဝ်ႈၼႂ်းမိူင်းထႆးၼၼ်ႉတင်းမူတ်း 8,300,000 မဵတ်ႉ ၵူၺ်းၵႃး ၵူၼ်းတေႃႉသူင်ႇ တၼ်းပၢႆႈလွတ်ႈလႆႈမူတ်း ၼႆယဝ်ႉ။

တႄႇၸဵမ်မိူဝ်ႈလိူၼ် December 2023 တေႃႇထိုင် ၼႂ်းလိူၼ် May 2024 ၼႆႉ ၽၢႆႇတၢင်း ၸဝ်ႈၼႃႈတီႈထႆး တီႉၺွပ်းလႆႈယႃႈမ 146,866,721 မဵတ်ႉ၊ ယႃႈဢၢႆႉသ် 1,890 ၵီႇလူဝ်ႇ ၵရမ်ႇ၊ ယႃႈၾိၼ်ႇၽိူၵ်ႇ 246 ၵီႇလူဝ်ႇၵရမ်ႇ၊ ယႃႈလမ် 188 ၵီႇလူဝ်ႇၵရမ်ႇ၊ တီႉၺွပ်း လႆႈၵူၼ်းၸိူဝ်းၵဵဝ်ႇၶွင်ႈ 1,521 ၵေႃႉ၊ မီးလွင်ႈပိုတ်းယိုဝ်းၸွမ်းၵူၼ်းတေႃႉသူင်ႇယႃႈ 33 ပွၵ်ႈ ၵူၼ်းတေႃႉယႃႈ တၢႆ 25 ၵေႃႉ လႄႈ သင်မႃးတႅၵ်ႈၼိူင်းၵၼ်တင်းပီႊပူၼ်ႉမႃး ၼၼ်ႉၼႆၸိုင် တေလႆႈဝႃႈ ယႃႈမတိူဝ်းၶိုၼ်ႈမႃးပဵၼ် 1 ပုၼ်ႈ၊ ယႃႈဢၢႆႉသ် သမ်ႉတိူဝ်း ၶိုၼ်ႈမႃး ႁူဝ်ပၢၵ်ႇ 47.43% ဝႃႈၼႆ။

ၼွၵ်ႈလိူဝ်သေၼႆႉ ၽၢႆႇတၢင်းၸဝ်ႈၼႃႈတီႈထႆး လႆႈႁပ်ႉၶၢဝ်ႇဝႃႈ ၵူၼ်းၵႃႉၶၢႆယႃႈမဝ်း ၵမ် ႁၢင်ႈႁႅၼ်းတေႃႉသူင်ႇယႃႈမၶဝ်ႈၵႂႃႇၼႂ်းမိူင်းထႆးထႅင်ႈ ဢမ်ႇယွမ်း 70 လၢၼ်ႉမဵတ်ႉ၊ ယႃႈဢၢႆႉသ်ထႅင်ႈ 2 တၢၼ်ႇ ႁူမ်ႈပႃး ယႃႈၾိၼ်ႇၽိူၵ်ႇၸိူဝ်းၼႆႉထႅင်ႈသေ ၽၢႆႇတၢင်း ၸဝ်ႈၼႃႈတီႈထႆးၵေႃႈ တိူဝ်းၵူတ်ႇထတ်းၸွမ်းလႅၼ်လိၼ် ၼႅၼ်ႈၼႃမႃးလိူဝ်ၵဝ်ႇ 24 ၸူဝ်ႈမူင်း ၼႆယဝ်ႉ။

တႆးလွတ်ႈလႅဝ်း