RCSS ၸတ်းႁဵတ်းပၢင်ၵႅဝ်ႈဝၼ်းသၢၼ်ၶတ်းယႃႈမဝ်းၵမ် လႄႈ ပၢင်ၸုတ်ႇၽဝ်ယႃႈမဝ်းၵမ်

ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင်ၵႅဝ်ႈ ဝၼ်းသၢၼ်ၶတ်းယႃႈမဝ်းၵမ် လႄႈ ၵႃႉၶၢႆၼွၵ်ႈမၢႆမီႈၵူႈမိူင်းမိူင်း တီႈငဝ်ႈၸိုင်ႈလွႆတႆးလႅင်း၊ ၼႃႈလိၼ်သိုၵ်းမၢႆ−1 လွႆၵေႃႇဝၼ်း လႄႈ ၵွင်းမုင်ႈမိူင်း ဢိၵ်ႇၼႂ်းၼႃႈတီႈဢုပ်ႉပိူင်ႇလၢႆလၢႆပိုၼ်ႉတီႈ ၼႆယဝ်ႉ။

မိူဝ်ႈၼႆႉဝၼ်းထီႉ 26 June 2024 (လိူၼ်ၸဵတ်းလွင်ႈ 5 ၶမ်ႈ ပီႊတႆး 2118 ၼီႈ) တူၵ်းမႅၼ်ႈ ဝၼ်းသၢၼ်ၶတ်းယႃႈမဝ်းၵမ် လႄႈ ၵႃႉၶၢႆၼွၵ်ႈမၢႆမီႈၵူႈမိူင်းမိူင်း ဢၼ်လုမ်ႈၾႃႉမၵ်းမၼ်ႈဝႆႉၼၼ်ႉလႄႈ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) လႆႈၸတ်းႁဵတ်းပၢင်ၵႅဝ်ႈပၼ်တၢင်းႁူႉ ၵူၼ်းသိုၵ်း၊ ၵူၼ်းမိူင်း၊ လုၵ်ႈႁဵၼ်း ၼေႃႇတႅၼ်းၶိူဝ်း ၵဵဝ်လူၺ်ႈၽွၼ်းၸႃႉယႃႈမဝ်းၵမ် ဢၼ်ပၼ်ၽေးတေႃႇ ၵူၼ်းၼႂ်းလုမ်ႈၾႃႉၸိူဝ်းၼၼ်ႉသေ မီးလွင်ႈၸုတ်ႇၽဝ်ပႅတ်ႈယႃႈမဝ်းၵမ် ဢၼ်ၸဝ်ႈၼႃႈတီႈတပ်ႉသိုၵ်းၸိုင်ႈတႆး တီႉၺွပ်းလႆႈမႃးၸိူဝ်းၼၼ်ႉ ဝႃႈၼႆ။

ပၢင်ၵႅဝ်ႈဝၼ်းသၢၼ်ၶတ်းယႃႈမဝ်းၵမ် တီႈငဝ်ႈၸိုင်ႈလွႆတႆးလႅင်းၼၼ်ႉ မီးၽူႈယႂ်ႇၵူၼ်းလူင်ၼႂ်းမုၵ်ႉၸုမ်း လႄႈ ၵူၼ်းသိုၵ်း၊ ၵူၼ်းမိူင်း ဢိၵ်ႇပီႈၼွင်ႉၶႅၵ်ႇ ၶိုၼ်ႈႁွတ်ႈတင်းၼမ်သေ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA မွၵ်ႇလၢတ်ႈၶေႃႈၵႂၢမ်းၵႂႃႇဝႃႈ “မိူဝ်ႈၼႆႉ ပဵၼ်ဝၼ်းသၢၼ်ၶတ်းယႃႈမဝ်းၵမ် လႄႈ ၵႃႉၶၢႆၼွၵ်ႈမၢႆမီႈၵူႈမိူင်းမိူင်း တင်းၵမ်ႇၽႃႇ ၵွပ်ႈၼၼ်လႄႈ မုၵ်ႉၸုမ်းႁဝ်းၼႆႉ တင်ႈတႄႇႁဝ်းၵေႃႇတင်ႈၶွတ်ႇၽွတ်ႈမႃးၶွင်ႇသီႇဢဝ်ၶိုၼ်းၸိုင်ႈတႆး ၶတ်းၸႂ်ႁဵတ်းမႃး ပေႃႇလသီႇၽဵဝ်ႈမူၺ်ႉယႃႈမဝ်းၵမ်တႅၵ်ႇလႅင်း၊ ယွၼ်ႉသင်လႄႈ ႁဝ်းလႆႈသၢၼ်ၶတ်းယႃႈမဝ်းၵမ်ၼႆၼၼ်ႉ ႁႂ်ႈၽူႈဢွၼ်ႁူဝ် လႄႈၽူႈႁၵ်ႉၸၢတ်ႈ ဢိၵ်ႇပေႃႈမႄႈၵူၼ်းမိူင်းႁဝ်းၶဝ် ဝူၼ်ႉတူၺ်းလီလီ ယႃႈမဝ်းၵမ်ဢၼ်ဝႃႈၼၼ်ႉ မၼ်းပဵၼ်ၽေးတေႃႇၸိူဝ်ႉၸၢတ်ႈ ၵူၼ်းမိူင်းတႆးႁဝ်းတိတ်းၸပ်းယႃႈမဝ်းၵမ်သေ လူႉသုမ်းၽဝၵႂႃႇၼၼ်ႉ မီးတင်းၼမ်တင်းလၢႆ” ၼႆယဝ်ႉ။

လိူဝ်သေၼၼ်ႉ ၼႂ်းတွၼ်ႈလူပ်းလင်ပၢင်ၵႅဝ်ႈၼၼ်ႉၵေႃႈ ႁူဝ်ပဝ်ႈလူင် ၶွင်ႇသီႇဢဝ်ၶိုၼ်းၸိုင်ႈတႆး ၸွမ်သိုၵ်းလူင် ယွတ်ႈသိုၵ်း ယင်းမွၵ်ႇလၢတ်ႈၵႂႃႇဝႃႈ “ဢၼ်ႁဝ်းတီႉလႆႈယႃႈမဝ်းၵမ်ၼႆႉ ယွၼ်ႉၽူႈမီးပုၼ်ႈၽွၼ်းႁဝ်းၵူႈႁွင်ႈၵၢၼ် ၵူႈၼႃႈတီႈ ၶတ်းၸႂ်ႁဵတ်းသၢင်ႈမႃး ဢၼ်ၼႆႉပဵၼ်ၽွၼ်းၵၢၼ်ၽူႈဢွၼ်ႁူဝ်ႁဝ်း၊ တႄႇၼႆႉၵႂႃႇၵေႃႈ ႁဝ်းလူဝ်ႇဢွၼ်ၵၼ်ၶတ်းၸႂ်ၵႂႃႇထႅင်ႈ လွင်ႈၽေးယႃႈမဝ်းၵမ်ၼႆႉ ႁဝ်းလူဝ်ႇဢွၼ်ၵၼ်လဵပ်ႈႁဵၼ်း၊ ဢွၼ်ၵၼ်သင်ႇသွၼ်ၵၼ်၊ ဢွၼ်ၵၼ်တူၺ်း ႁႂ်ႈပဵၼ်ႁူပဵၼ်တႃ ပဵၼ်လႆႈၵႃႈႁိုဝ်ၵေႃႈၶတ်းၸႂ်ႁဵတ်းၵႂႃႇ၊ ၵႅတ်ႇၶႄလႆႈၵႃႈႁိုဝ်ၵေႃႈ ႁဝ်းလူဝ်ႇၵႅတ်ႇၶႄၵႂႃႇ ဢမ်ႇဝႃႈတေၵႅတ်ႇၶႄၼႂ်းႁိူၼ်းယေးႁဝ်း၊ ၵႅတ်ႇၶႄၼႂ်းဝၢၼ်ႈ ၼႂ်းဢိူင်ႇႁဝ်း၊ ၵႅတ်ႇၶႄၼႂ်းၼႃႈတီႈႁဝ်း လႄႈၼႂ်းမိူင်းႁဝ်းၸိူဝ်းၼႆႉ ပေႃႇလသီႇႁဝ်းၼၼ်ႉ ယႃႇပၼ်ႁႂ်ႈမၼ်းမီးၼႂ်းၸႄႈၼႂ်းပပ်ႉၵူၺ်း” ၼႆယဝ်ႉ။

လိူဝ်ၼၼ်ႉ ပၢင်ၵႅဝ်ႈဝၼ်းသၢၼ်ၶတ်းယႃႈမဝ်းၵမ် တီႈၼႃႈလိၼ်သိုၵ်းမၢႆ−1 လွႆၵေႃႇဝၼ်း ၵေႃႈ ယူႇတီႈ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ−1/ၵႅမ်ၽူႈပွင်ၵၢၼ်သိုၵ်း တပ်ႉသိုၵ်းၸိုင်ႈတႆး လႆႈမွၵ်ႇလၢတ်ႈၶေႃႈၵႂၢမ်းပၼ်တၢင်းႁူႉ လွင်ႈၽေးၶဵၼ်ယႃႈမဝ်းၵမ်ၵႂႃႇဝႃႈ “လွင်ႈလႆႈၽဝ်ယႃႈမဝ်းၵမ်ၸိူဝ်းၼႆႉ ပဵၼ်တီႈမၢႆတွင်းၶေႃႈၸုၵ်းမၼ်ႈၶွင်ႁဝ်း ၵူၺ်းၵႃႈ ပဵၼ်ပွတ်းဢွၼ်ႇတွၼ်ႈၼိုင်ႈ ၼႂ်းၵၢၼ်တေႃႇသူႈၸွမ်းပၼ်ႁႃယႃႈမဝ်းၵမ်ၵူၺ်း ၵၢၼ်သၢၼ်ၶတ်းလွင်ႈယႃႈမဝ်းၵမ်ၼႆႉ ႁဝ်းတၵ်းလႆႈႁဵတ်းသၢင်ႈ တႄႇဢဝ်ငဝ်ႈႁၢၵ်ႈတူၼ်ႈတေႃမၼ်း ပုၼ်ႈတႃႇတေၵႄႈလိတ်ႈပၼ်ႁႃၶၢဝ်းယၢဝ်းလႆႈ” ဝႃႈၼႆ။

မီးပေႃႈမႄႈၵူၼ်းမိူင်း၊ ၵူၼ်းသိုၵ်း လႄႈပီႈၼွင်ႇၶႅၵ်ႇ ဢိၵ်ႇၽူႈသိုဝ်ႇၶၢဝ်ႇၼႂ်းမိူင်းၼွၵ်ႈမိူင်း ၶဝ်ႈႁူမ်းတင်းၼမ်မိူၼ်ၵၼ်သေ ၸုတ်ႇၽဝ်ပႅတ်ႈယႃႈမဝ်းၵမ် ဢၼ်ၵိုင်ႇၶၼ်ငိုၼ်းထႆး မွၵ်ႈ 180 လၢၼ်ႉဝၢတ်ႇ တႃႇႁႂ်ႈၵူၼ်းမိူင်းလုမ်ႈၾႃႉ ႁူႉထိုင်ၽေးယႃႈမဝ်းၵမ် ဢၼ်ၽိတ်းပၵ်းပိူင်မၢႆမီႈၼၼ်ႉ ဝႃႈၼႆ။

တေႃႈၼင်ႇၼၼ် တီႈၵွင်းမုင်ႈမိူင်း တပ်ႉၸုမ်း (808) RCSS/SSA ၵေႃႈ လႆႈၸတ်းႁဵတ်းပၢင်ၵႅဝ်ႈ ၵဵဝ်ႇလူၺ်ႈဝၼ်းသၢၼ်ၶတ်းယႃႈမဝ်းၵမ် လႄႈ ၵႃႉၶၢႆၼွၵ်ႈမၢႆမီႈၵူႈမိူင်းမိူင်း မိူၼ်ၵၼ်သေ မီးၽူႈၵွၼ်းတပ်ႉၸုမ်း (808) လႄႈ ၵူၼ်းမိူင်း​​မႄႈ​​ဢေႃး ဝၢၼ်ႈမႂ်ႇႁူဝ်ႁႃႉ/ၵွင်းမုင်ႈမိူင်း၊ ရၵ်းထႆး လႄႈ​​ၵေႃႉသိုၵ်းၵေႃႉႁၢၼ် ဢိၵ်ႇလုၵ်ႈႁဵၼ်းၸိူဝ်းၼႆႉ ၶိုၼ်ႈႁွတ်ႈတင်းၼမ် မိူၼ်ၵၼ်။

ၼႂ်းဝၼ်းသၢၼ်ၶတ်းယႃႈမဝ်းၵမ် လႄႈ ၵႃႉၶၢႆၼွၵ်ႈမၢႆမီႈၵူႈမိူင်းမိူင်းၼႆႉ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး မီးလွင်ႈၸုတ်ႇၽဝ်ယႃႈမဝ်းၵမ် ဢၼ်တီႉလႆႈမႃးၸိူဝ်းၼၼ်တင်းမူတ်းၼႆယူႇယဝ်ႉ။ ၶေႃႈပိုၼ်ၽၢဝ်ႇ ၶွင်ႇသီႇဢဝ်ၶိုၼ်းၸိုင်ႈတႆး ၼႂ်းဝၼ်းသၢၼ်ၶတ်းယႃႈမဝ်ၵမ် ၼႂ်းၶေႃႈထီႉ 4 ၼၼ်ႉ ပႃးဝႆႉဝႃႈ “ၼႂ်းၶၢဝ်းတၢင်းၼိုင်ႈပီႊ (2023-2024) ၼႆႉ RCSS လႆႈႁဵတ်းသၢင်ႈၵၢၼ်ငၢၼ်း ၵဵဝ်ႇလူၺ်ႈၵၢၼ်ၽဵဝ်ႈမူၺ်ႉယႃႈမဝ်းၵမ်မႃး − လႆႈတီႉၺွပ်း ယႃႈလမ် (1.59) ၵီႇလူဝ်ႇၵရမ်ႇ၊ ယႃႈၾိၼ်ႇၽိူၵ်ႇ (27.6) ၵီႇလူဝ်ႇၵရမ်ႇ၊ ယႃႈမႃႉ (5,437,406) မဵတ်ႉ၊ ယႃႈဢၢႆး (105) ၵီႇလူဝ်ႇၵရမ်ႇ၊ ၵႅပ်ႉၾိၼ်း (51) ၵီႇလူဝ်ႇၵရမ်ႇ၊ ၼမ်ႉယႃႈ ႁဵတ်းဢွၵ်ႇယႃႈမဝ်းၵမ် (20) လိတ်ႉ လႄႈ ၽွင်သီတႃႇႁဵတ်းဢွၵ်ႇယႃႈမဝ်းၵမ် (10) ၵီႇလူဝ်ႇၵရမ်ႇ၊ လႆႈတီႉၺွပ်း ၵူၼ်းၵႃႉယႃႈမဝ်းၵမ် ၸၢႆး (39) ၵေႃႉ၊ လႆႈတီႉၺွပ်း ၵူၼ်းႁဵတ်းၵၢၼ်ႁူင်းႁဵတ်းယႃႈ (15) ၵေႃႉ၊ လႆႈမူၼ်ႉမႄးတၢင်းယၢမ်ႈ လႄႈပူၵ်းပွင်ပၼ် ၵူၼ်းတိတ်းၸပ်းယႃႈမဝ်းၵမ် ၸၢႆး (438) ၵေႃႉ၊ လႆႈပၼ်ပိုၼ်ႉႁူႉ ၵႅတ်ႇၶႄၽေးယႃႈမဝ်းၵမ် တီႈၵူၼ်းမိူင်း လႄႈၵေႃႉသိုၵ်း မီး (63) ပွၵ်ႈ၊ ၽူႈ ၶဝ်ႈႁူမ်ႈ ၵူၼ်းမိူင်း ၸၢႆး (3,698) ၵေႃႉ၊ ယိင်း (2,006) ၵေႃႉ၊ ၸၢႆးငၢၼ်ဝၢၼ်ႈ (12) ၵေႃႉ၊ သင်ႇၶႃႇၸဝ်ႈ (36) တူၼ် လႄႈ ၵူၼ်းသိုၵ်း (451) ၵေႃႉ – ႁူမ်ႈ (6,203) ၵေႃႉ၊  ၶူဝ်းၶွင်တီႉလႆႈပႃး လူတ်ႉပိၵ်ႉဢၢပ်ႉ(Pickup truck) ၼိုင်ႈလမ်း၊ ၶိူင်ႈႁဵတ်းယႃႈမႃႉ (2) ၶိူင်ႈ၊ ၸၢၵ်ႈၾႆး (2) ၶိူင်ႈ လႄႈ ၶိူင်ႈၵမ်ႉၵႅမ်ႁဵတ်းဢွၵ်ႇယႃႈမႃႉတင်းၼမ်” ၼႆယူႇယဝ်ႉ။

ပေႃးထိုင်မႃး ဝၼ်းသၢၼ်ၶတ်းယႃႈမဝ်းၵမ် လႄႈ ၵႃႉၶၢႆၼွၵ်ႈမၢႆမီႈၵူႈမိူင်းမိူင်း ၵူႈပီႊပီႊၼႆ ယူႇတီႈ RCSS/SSA လႆႈမီးပၢင်ၵႅဝ်ႈ ပၼ်ပိုၼ်ႉႁူႉ ၵဵဝ်ႇလူၺ်ႈယႃႈမဝ်းၵမ် လႄႈ မီးလွင်ႈၸုတ်ႇၽဝ်ယႃႈမဝ်းၵမ် ဢၼ်တီႉလႆႈမႃးၸိူဝ်းၼၼ်ႉ ၵူႈပီႊပီႊ ၼႆယဝ်ႉ။

တႆးလွတ်ႈလႅဝ်း