သိုၵ်းထႆး တီႉၺွပ်းလႆႈယႃႈဢၢႆႉသ်တင်းၼမ်

ၸဝ်ႈၼႃႈတီႈသိုၵ်းထႆး တီႉၺွပ်းလႆႈ ယႃႈဢၢႆႉသ် ဢၼ်လုၵ်ႉတီႈလႅၼ်လိၼ် တႆး−ထႆး သေ လၵ်ႉတေႃႉတၢင်ႇၶဝ်ႈၵႂႃႇၼႂ်းမိူင်းထႆးၼၼ်ႉတင်းၼမ် ဝႃႈၼႆ။

မိူဝ်ႈဝၼ်းထီႉ 3 July 2024 (လိူၼ်ၸဵတ်းလွင်ႈ 12 ၶမ်ႈ ပီႊတႆး 2118 ၼီႈ) ၽၢႆႇတၢင်း သိုၵ်းထႆး လႄႈ ၽူႈမီးပုၼ်ႈၽွၼ်းထႅင်ႈလၢႆလၢႆၽၢႆႇ လႆႈႁပ်ႉၶၢဝ်ႇဝႃႈ တေမီးလွင်ႈ တေႃႉသူင်ႇယႃႈ လုၵ်ႉတီႈလႅၼ်လိၼ် တႆး−ထႆး ၼႂ်းပိုၼ်ႉတီႈ ၸႄႈဝဵင်းမႄႈသၢႆ ၸႄႈတွၼ်ႈၵဵင်းႁၢႆးၼႆလႄႈ ၽၢႆႇတၢင်းၸဝ်ႈၼႃႈတီႈထႆး ၸင်ႇလႆႈၵႂႃႇတင်ႈလၢၼ်ႇ  တီႈၼႂ်းပိုၼ်ႉတီႈ ဝၢၼ်ႈသၼ်သလီ  ပွၵ်ႉ 4 ဢိူင်ႇသီတွၼ်းမုၼ်း ၸႄႈဝဵင်းၵဵင်းသႅၼ် ၼၼ်ႉသေ ၵူတ်ႇထတ်းတီႉၺွပ်းလႆႈ ယႃႈဢၢႆႉသ်တင်းမူတ်း 100 ၵီႇလူဝ်ႇၵရမ်ႇ ႁူမ်ႈပႃး ၵူၼ်းတေႃႉသူင်ႇထႅင်ႈ 2 ၵေႃႉ ၼႆယဝ်ႉ။

ယႃႈမဝ်းၵမ် လႄႈ ၵူၼ်းတေႃႉသူင်ႇ ဢၼ်ထုၵ်ႇၸဝ်ႈၼႃႈတီႈထႆးၶဝ်တီႉၺွပ်းလႆႈ ပွၵ်ႈၵမ်းၼႆႉ ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် တေႁဵတ်းသၢင်ႈပၼ်တၢမ်ႇတၢင်း ၽိတ်းၵႂႃႇ ၸွမ်းၼင်ႇမၢႆမီႈၸိုင်ႈမိူင်းမီးၼၼ်ႉ ဝႃႈၼႆ။

တႆးလွတ်ႈလႅဝ်း