ပေႃႈလဵင်ႉမႄႈလဵင်ႉထုၵ်ႇၶႃႈႁႅမ်တၢႆ ၽူႈထၢင်ႇထိူမ်ပဵၼ်ႁႅင်းၵၢၼ်ယၢၼ်မိူင်း

ၸဝ်ႈၼႃႈတီႈပလိၵ်ႈထႆး ထၢင်ႇထိူမ်ဝႃႈ ႁႅင်းၵၢၼ်ယၢၼ်မိူင်း မိူင်းႁူမ်ႈတုမ် ဢၼ်ၶဝ်ႈၵႂႃႇႁဵတ်းၵၢၼ်ၼႂ်းမိူင်းထႆးၼၼ်ႉ ၶႃႈႁႅမ်ၶိုၼ်းပေႃႈလဵင်ႉမႄႈလဵင်ႉယဝ်ႉ လၵ်ႉဢဝ်ငိုၼ်းၶမ်းၵႂႃႇ ဝႃႈၼႆ။

မိူဝ်ႈဝႃးဝၼ်းထီႉ 16 July 2024 (လိူၼ်ပႅတ်ႇမႂ်ႇ 11 ၶမ်ႈ ပီႊတႆး 2118 ၼီႈ) ယၢမ်းဝၢႆးဝၼ်း 13:30 မူင်းၼၼ်ႉ ၸဝ်ႈၼႃႈတီႈပလိၵ်ႈထႆး လႆႈၶဝ်ႈၵႂႃႇၵူတ်ႇထတ်းသေ ထူပ်းႁၼ်တူဝ်တၢႆ သွင်ၵေႃႉၽူဝ်မေး ၵေႃႉပဵၼ်ၽူဝ် ဢႃႇယု 64 ပီႊ ပဵၼ်ၵူၼ်းၶိူဝ်းဢီႇရၢၼ်ႇ လႄႈ မေးၼၢင်း ဢႃႇယု 49 ပီႊ ၵူၼ်းထႆး ၼႂ်းႁွင်ႈၼွၼ်း တီႈႁိူၼ်းလင်ၼိုင်ႈ ၼႆယူႇယဝ်ႉ။  ၶႃသွင်ၵေႃႉၽူဝ်မေးၼႆႉ ပဵၼ်ၸဝ်ႈၶွင်လၢၼ်ႉၶဝ်ႈၽၵ်း တီႈၼႂ်းဝဵင်းၽတ်ႉထယႃး၊ ၸဝ်ႈၼႃႈတီႈပလိၵ်ႈထႆး လၢမ်းၶၢတ်ႈဝႃႈ ၶႃၽူဝ်ႇမေးၼႆႉ တၢႆမႃးလႆႈမွၵ်ႈ 4 ဝၼ်းယဝ်ႉလႄႈ ဢမ်ႇႁူႉတႅတ်ႈတေႃးဝႃႈ ႁဵတ်းႁိုဝ်သေလႄႈ လူႉတၢႆၵႂႃႇ ၵူၺ်းထူပ်းႁၼ် တီႈၼႂ်းႁွင်ႈၼွၼ်းၶႃသွင်ၵေႃႉၽူဝ်မေးၼၼ်ႉ ထုၵ်ႇသွၵ်ႈတဝ်သေ ငိုၼ်းၶမ်းၵေႃႈ လႆႈႁၢႆၵႂႃႇၸွမ်းတင်းၼမ် ၼႆယဝ်ႉ။

ၵေႃႉပဵၼ်လုၵ်ႈယိင်း ၸဝ်ႈၶွင်လၢၼ်ႉဢၼ်လူႉတၢႆၵႂႃႇၼၼ်ႉ လၢတ်ႈဝႃႈ ပေႃႈမႄႈမၼ်းၼၢင်း လႆႈၶၢတ်ႇလွင်ႈၵပ်းသိုပ်ႇတိတ်းတေႃႇၵႂႃႇ ၸဵမ်မိူဝ်ႈၼႂ်းဝၼ်းထီႉ 11 July ၼၼ်ႉယဝ်ႉ မိူဝ်ႈပူၼ်ႉမႃးၸိူဝ်းၼၼ်ႉ ယွၼ်ႉဢမ်ႇတွၼ်ႉယၢမ်ႈၶၢတ်ႇ လွင်ႈၵပ်းသိုပ်ႇၵၼ်သေပွၵ်ႈလႄႈ ၸင်ႇမႆႈၸႂ်ႈသေ ယွၼ်းႁႂ်ႈၵူၼ်းႁူႉၸၵ်း ႁိမ်းႁွမ်းၼၼ်ႉ ၵႂႃႇတူၺ်းပၼ်လႄႈ ၸင်ႇလႆႈႁူႉဝႃႈ ပေႃႈမႄႈမၼ်းၼၢင်းလူႉတၢႆၵႂႃႇယဝ်ႉ ဝႃႈၼႆ။

ၵေႃႉပဵၼ်လုၵ်ႈယိင်းၸဝ်ႈၶွင်လၢၼ်ႉ လႄႈ ဢူၺ်းၵေႃႉၸမ်ၸႂ်ၸဝ်ႈၶွင်လၢၼ်ႉ လၢတ်ႈၼႄထႅင်ႈဝႃႈ မိူဝ်ႈပူၼ်ႉမႃးၼၼ်ႉ  ၸဝ်ႈၶွင်လၢၼ်ႉယၢမ်ႈလၢတ်ႈၼႄဝႃႈ ငိုၼ်းတီႈလၢၼ်ႉၵႆႉၵႆႉႁၢႆ လႄႈထၢင်ႇထိူမ်ၵေႃႉပဵၼ်လုၵ်ႈၸၢင်ႈ ဢၼ်ပဵၼ် ၵူၼ်းမိူင်းႁူမ်ႈတုမ် ၸိုဝ်ႈႁွင်ႉဝႃႈ  မိၼ်းလုၼ်ႇဢူး (Min Lwin Oo) ဢႃႇယု 21 ပီႊ လႄႈလုၵ်ႈၸၢင်ႈၵေႃႉၼႆႉသမ်ႉ ၵႆႉၵႆႉႁွင်ႉၵေႃႉႁၵ်ႉမၼ်း ဢၼ်ပဵၼ် ၵူၼ်းမိူင်းႁူမ်ႈတုမ်ၼင်ႇၵၼ် မႃးၼွၼ်းတီႈလၢၼ်ႉ ယူႇတႃႇသေႇ ၵူၺ်းၽူႈယိင်းၵေႃႉၼႆႉ ဢမ်ႇလႆႈႁဵတ်းၵၢၼ်တီႈလၢၼ်ႉၼၼ်ႉ ၼႆယဝ်ႉ။

ၽူႈမီးပုၼ်ႈၽွၼ်းၽၢႆႇပလိၵ်ႈထႆးၶဝ် ၸင်ႇလႆႈၵႂႃႇၸႅတ်ႈတူၺ်း ၵွင်ႈထၢႆႇ CCTV သေ ထူပ်းႁၼ်ဝႃႈ မိူဝ်ႈၼႂ်းဝၼ်းထီႉ 11 July 2024 ၼၼ်ႉ ၵေႃႉပဵၼ်လုၵ်ႈၸၢင်ႈၸိုဝ်ႈ မိၼ်းလုၼ်ႇဢူး ၼႆႉ ၶီႇလူတ်ႉၶိူင်ႈၶဝ်ႈၵႂႃႇတီႈၼႂ်းလၢၼ်ႉ မိူဝ်ႈၶၢဝ်းယၢမ်းၵၢင်ၶိုၼ်း 20:19 မူင်း သေ ဢွၵ်ႇမႃးၶိုၼ်းၽွင်းၵၢင်ၼႂ်ၸဝ်ႉ 06:20  မူင်း တင်းၼၢင်းယိင်းၵေႃႉၼိုင်ႈ လႅပ်ႈတေပဵၼ်ၵေႃႉႁၵ်ႉမၼ်း၊ ၶႃသွင်ၵေႃႉ ဢဝ်တင်းထူင်ၶူဝ်းသေ တၢင်ႇလူတ်ႉၶိူင်ႈဢွၵ်ႇၵႂႃႇ ၼႆယဝ်ႉ။

လွင်ႈၼႆႉ ၸဝ်ႈၼႃႈတီႈပလိၵ်ႈထႆးၶဝ်လၢမ်းၶၢတ်ႈဝႃႈ ၵေႃႉဢၼ်ထုၵ်ႇလီထၢင်ႇထိူမ် လိူဝ်သေပိူၼ်ႈ ပဵၼ် မိၼ်းလုၼ်ႇဢူး ဢႃႇယု 21 ပီႊ လုၵ်ႈၸၢင်ႈဢၼ်ပဵၼ် ၵူၼ်းမိူင်းႁူမ်ႈတုမ် လႄႈ ၼၢင်းယိင်းဢၼ်ၶီႇလူတ်ႉၶိူင်ႈဢွၵ်ႇၵႂႃႇၸွမ်းၼၼ်ႉသမ်ႉ ၸိုဝ်ႈ ဢိ တီႇသႅမ်ႇပႃႇ (Ei December) ဢႃႇယု 19 ပီႊ ပဵၼ်ၵူၼ်းမိူင်းႁူမ်ႈတုမ်မိူၼ်ၵၼ် ၼႆယူႇယဝ်ႉ။

တႆးလွတ်ႈလႅဝ်း