ၵူၼ်းၼုမ်ႇတႆး တင်ႈပဵၼ်ၸုမ်း လႄႇႁႃၽၼ်းၵူၼ်း ၼႂ်းမိူင်းထႆး

ၸုမ်းသႃႇမူႇရၢႆး ဢၼ်ပဵၼ်ၵူၼ်းၼုမ်ႇတႆး ဢွၵ်ႇလႄႇႁႃဢဝ်မိတ်ႈလႅဝ်း ၽၼ်းၵူၼ်း ယၢမ်းၵၢင်ၶမ်ႈၵၢင်ၶိုၼ်း ႁဵတ်းႁႂ်ႈမီးၵူၼ်းမၢတ်ႇၸဵပ်း တီႈၼႂ်းဝဵင်းၵဵင်းမႆႇ မိူင်းထႆး။

သိုဝ်ႇၶၢဝ်ႇထႆးဢွၵ်ႇဝႆႉဝႃႈ မိူဝ်ႈဝၼ်းထီႉ 24 July 2024 (လိူၼ်ပႅတ်ႇလွင်ႈ 4 ၶမ်ႈ ပီႊတႆး 2118 ၼီႈ) ယၢမ်း 03:20 မူင်း (ၶၢဝ်းယၢမ်းမိူင်းထႆး) ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် လႆႈႁပ်ႉလွင်ႈပွင်ႇလႅင်းဝႃႈ မီးၵူၼ်းၼုမ်ႇၸၢႆး တင်း ယိင်း ၶီႇလူတ်ႉၶိူင်ႈသေ လႄႇႁႃၽၼ်းၵူၼ်းၸွမ်းၶူဝ်လဵၵ်း ၼႂ်းဝဵင်းၵဵင်းမႆႇ ၼႆလႄႈ ၸင်ႇလႆႈၵႂႃႇၵူတ်ႇထတ်း ထူပ်းႁၼ်ၵူၼ်းလႆႈတၢင်းမၢတ်ႇၸဵပ်းပဵၼ်ၵူၼ်းၸၢႆး 1 ၵေႃႉ လႄႈ ၵူၼ်းၼုမ်ႇထႅင်ႈၵေႃႉၼိုင်ႈ ဝႃႈၼႆ။

ၸူဝ်ႈၶၢဝ်းၼႆႉ မီးၸုမ်းသႃႇမူႇရၢႆး ဢၼ်ပဵၼ်ၵူၼ်းၼုမ်ႇတႆး တေမီးတင်းၽူႈၸၢႆး လႄႈ ၽူႈယိင်း ၶီႇလူတ်ႉၶိူင်ႈလႄႇၸွမ်းတၢင်းသေ ပေႃးႁၼ်ၵူၼ်းၼုမ်ႇ ဢၼ်ႁဵတ်းၵၢၼ်ၵၢင်ၶိုၼ်း ဢမ်ႇၼၼ် ၼင်ႈလဵၼ်ႈၸွမ်းၽင်ႇၶၢင်ႈတၢင်း ၽင်ႇၼမ်ႉ ၸိူဝ်းၼႆႉၼႆၸိုင် တေလမ်းဢဝ်မိတ်ႈလႅဝ်းၽၼ်း ပႅၵ်ႉသမ်ႉဢမ်ႇယၢမ်ႈႁူႉၸၵ်းၵၼ် လႄႈ ဢမ်ႇယၢမ်ႈမီးပၼ်ႁႃၵၼ်မႃးဢွၼ်တၢင်းၵေႃႈယဝ်ႉၼႆ ၽူႈသိုဝ်ႇၶၢဝ်ႇထႆးၶဝ် ဢွၵ်ႇၶၢဝ်ႇဝႆႉၼင်ႇၼႆ။

လွင်ႈၼႆႉၵေႃႈ လႆႈတႄႇႁၢႆႉႁႅင်းမႃးၶိုၼ်း မိူဝ်ႈၼႂ်းဝၼ်းထီႉ 19 July 2024 ယၢမ်း 04:45 မူင်း (ၶၢဝ်းယၢမ်းမိူင်းထႆး) ၽၢႆႇတၢင်းၽူႈမီးပုၼ်ႈၽွၼ်းထႆးၶဝ် လႆႈႁပ်ႉလွင်ႈပွင်ႇလႅင်း ဝႃႈ မီးၸုမ်းသႃႇမူႇရၢႆး ပေႃႉထုပ်ႉ လႄႈ ၽၼ်းၵူၼ်း တီႈၶူဝ်းလဵၵ်း ၸင်ႇလႆႈၵႂႃႇ ၵူတ်ႇထတ်းႁၼ် ၵူၼ်းမၢတ်ႇၸဵပ်း ပဵၼ်ၵူၼ်းၸၢႆး 1 ၵေႃႉ ၺႃးၽၼ်းတီႈၵွင်းလင် လႄႈ မၼ်းၸၢႆးလၢတ်ႈဝႃႈ ဢမ်ႇယၢမ်ႈမီးပၼ်ႁႃၸွမ်းၽႂ် ယၢမ်းၼၼ်ႉ တိုၵ်ႉၼင်ႈ လဵၼ်ႈၸွမ်းဢူၺ်းၵေႃႉမၼ်းယူႇလီလီ မီးၵူၼ်းၼုမ်ႇၸုမ်းၼိုင်ႈ ယိပ်းတင်းမိတ်ႈ တင်းလႅဝ်းသေ မႃးလမ်းၽၼ်းမၼ်း ၼႆယဝ်ႉ။

ၼွၵ်ႈလိူဝ်သေၼႆႉ မိူဝ်ႈၼႂ်းဝၼ်းထီႉ 22 July 2024 တီႈၽင်ႇၼမ်ႉပိင်း ၸွမ်းႁိမ်းႁွမ်းတႃႈၼမ်ႉဝတ်ႉသီၶူင် (တႃႈႁိူဝ်းမႅင်းပွင်ႇ) ဢိူင်ႇဝတ်ႉၵဵတ်ႇ ၸႄႈဝဵင်းၵဵင်းမႆႇ ၸႄႈတွၼ်ႈၵဵင်းမႆႇၼၼ်ႉၵေႃႈ မီးၸုမ်းသႃႇမူႇရၢႆး လႆႈၵႂႃႇႁႃၽၼ်းၵူၼ်းသေ မီးပီႈၼွင်ႉတႆးၵေႃႉၼိုင်ႈ ပဵၼ်ၽူႈၸၢႆး လႆႈတၢင်းမၢတ်ႇၸဵပ်းတီႈၵွင်းႁူဝ်ႁၢဝ်ႈႁႅင်း လႄႈ ၸွမ်းၼင်ႇၽူႈမီးပုၼ်ႈၽွၼ်းၶဝ် လႆႈတွင်ႈထၢမ်ၼၼ်ႉသေ လၢတ်ႈဝႃႈ မၼ်းမႃးၼင်ႈၵိၼ်တၢင်းၵိၼ် ၸွမ်းၸူႉမၼ်း 2 ၵေႃႉ ဝၢႆးၼၼ်ႉလႆႈမီးၸုမ်းၵူၼ်းၼုမ်ႇ ဢဝ်လႅဝ်းမႃးၽၼ်းသႂ်ႇတီႈၵွၵ်းႁူဝ်မၼ်း၊ သိုပ်ႇလၢတ်ႈဝႃႈ ဢမ်ႇယၢမ်ႈႁူႉၸၵ်းၵၼ် လႄႈ ဢမ်ႇယၢမ်ႈၽိတ်းမေႃးၵၼ်မႃးဢွၼ်တၢင်း ဝႃႈၼႆ။

ၸွမ်းၼင်ႇၽၢႆႇတၢင်းၽူႈမီးပုၼ်ႈၽွၼ်းၶဝ် တွင်ႈထၢမ်တီႈၵူၼ်းႁဵတ်းၵၢၼ် လႄႈ ၵူၼ်းၼႂ်းပိုၼ်ႉတီႈၼၼ်ႉ လႆႈလၢတ်ႈဝႃႈ ပေႃးပူၼ်ႉတဵင်ႈၶိုၼ်းၵႂႃႇ ၵူႈၶမ်ႈၵူႈၶိုၼ်း တေၵႆႉမီးၸုမ်းၵူၼ်းၼုမ်ႇ ပႃးတင်းၵူၼ်းတႆး လႄႈ ၵူၼ်းထႆး ၶီႇလူတ်ႉၶိူင်ႈသွၼ်ႉၵၼ်မႃး  ပဵၼ်လၢႆလမ်း သင်ႁၼ်ၵူၼ်းၼုမ်ႇၸိူဝ်းဢမ်ႇၸႂ်ႈၸုမ်းၶဝ်ႈၼၼ်ႉ ၼင်ႈဢုပ်ႇၵၼ် ဢမ်ႇၼၼ် ၵိၼ်လဝ်ႈၸွမ်းၵၼ် ႁိမ်းၽင်ႇၼမ်ႉပိင်းၼႆၸိုင် ဢၼ်ပဵၼ်ၸုမ်းသႃႇမူႇရၢႆးၼၼ်ႉ တေလၢၵ်ႈတင်းမိတ်ႈတင်းလႅဝ်းသေ လမ်းၽၼ်း ဝႃႈၼႆ။

သိုပ်ႇလၢတ်ႈထႅင်ႈဝႃႈ ယွၼ်ႉယၢမ်ႈႁၼ်မႃးယဝ်ႉလၢႆပွၵ်ႈလၢႆၵမ်းလႄႈ မိူဝ်ႈပူၼ်ႉမႃး ဢမ်ႇပႆႇႁိုင်ၼႆႉၵေႃႈ မီးလုၵ်ႈႁဵၼ်းၵေႃႉၼိုင်ႈ ပႆႇမႃးတီႈၼႃႈဝတ်ႉသီၶူင် ၵေႃႉလဵဝ်သေ သမ်ႉၺႃးၸုမ်းသႃႇမူႇရၢႆး ဢဝ်လႅဝ်းၽၼ်း လႄႈ ပေႃႉထုပ်ႉ ထိုင်တီႈ လုၵ်ႈဢွၼ်ႇၵေႃႉၼၼ်ႉ လႆႈယွၼ်းသၢႆၸႂ် ဢွၼ်တၢင်းၸိူဝ်းၶဝ်တေလဵၼ်ႈပၢႆႈၵႂႃႇ ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၵူၼ်းမိူင်းၼႂ်းပိုၼ်ႉတီႈ ယင်းလႆႈတုၵ်းယွၼ်းႁႂ်ႈၽၢႆႇတၢင်း ပလိၵ်ႈထႆး ဢွၵ်ႇလဵပ်ႈယၢမ်းၸွမ်းၼႂ်းပိုၼ်ႉတီႈၸိူဝ်းၼၼ်ႉ ယွၼ်ႉမၼ်းလပ်းသိုင်ႇ လႄႈ မီးၽေးတႄႉတႄႉ၊ သင်မီးၵူၼ်းၵႂႃႇၼင်ႈသုတ်ႇလူမ်းၵတ်းလူမ်းယဵၼ် ႁိမ်းမႄႈၼမ်ႉပိင်းၼၼ်ႉ ပေႃးၸုမ်းသႃႇမူႇရၢႆးႁၼ်ၵေႃႈ တေၶဝ်ႈၵႂႃႇႁဵတ်းႁၢႆႉၵမ်းလဵဝ် လႄႈ ယင်းလႆႈပၼ်ၾၢင်ႉထိုင်ပေႃႈမႄႈၵူၼ်းမိူင်း ပႃးဝႃႈ ယႃႇပေပၼ် လုၵ်ႈလၢၼ်ၵႂႃႇလႄႇၸွမ်းၸိူဝ်းၼၼ်ႉ ယၢမ်းၵၢင်ႈၶမ်ႈၵၢင်ၶိုၼ်း ဝႃႈၼႆ။

တႆးလွတ်ႈလႅဝ်း