ၽူႈၼမ်းၽၢႆႇၵၢၼ်မိူင်း ၸုမ်းႁႃးမၢတ်ႉသ် ထုၵ်ႇၺႃးၶႃႈႁႅမ်တၢႆ ၼႂ်းမိူင်းဢီႇရၢၼ်ႇ

ၽူႈၼမ်းၽၢႆႇၵၢၼ်မိူင်း ၸုမ်းႁႃးမၢတ်ႉသ် ထုၵ်ႇပိုတ်းယိုဝ်းၶႃႈႁႅမ်တၢႆ တီႈၼႂ်း မိူင်းဢီႇရၢၼ်ႇ ၽွင်းၵႂႃႇၶဝ်ႈႁူမ်ႈပၢင်ပၼ်ၶေႃႈၵိၼ်ၵႅၼ်ႇၶဝ်ႈႁပ်ႉတၼ်းႁဵင်း ၸွမ်ၸိုင်ႈဢီႇရၢၼ်ႇၵေႃႉမႂ်ႇ ဝႃႈၼႆ။

ၸုမ်းသိုၵ်းႁႃးမၢတ်ႉသ် ဢွၵ်ႇသပ်းၸႅင်ႈၶၢဝ်ႇ မိူဝ်ႈၼႂ်းဝၼ်းထီႉ 31 July 2024 (လိူၼ်ပႅတ်ႇလွင်ႈ 11 ၶမ်ႈ ပီႊတႆး 2118 ၼီႈ) ၼၼ်ႉဝႃႈ ၼႂ်းၽွင်းယၢမ်း ဢိတ်ႉသ်မႃဢိဝ် ႁႃၼီယေ Ismail Haniyeh ၽူႈၼမ်းၽၢႆႇၵၢၼ်မိူင်း ၸုမ်းသိုၵ်းႁႃးမၢတ်ႉသ် ဢွၵ်ႇၶၢဝ်းတၢင်းၵႂႃႇၶဝ်ႈႁူမ်ႈပၢင်ပၼ် ၶေႃႈၵိၼ်ၵႅၼ်ႇ ၶဝ်ႈႁပ်ႉတၼ်းႁဵင်း ၸွမ်ၸိုင်ႈဢီႇရၢၼ်ႇၵေႃႉမႂ်ႇ မႃသုတ်ႉ ပေသႅတ်ႉသ်ၶဵၼ်း Masoud Peseshkian  ယူႇၼၼ်ႉ ထုၵ်ႇဢိတ်ႇသရေး ပိုတ်းယိုဝ်း လႄႈ လႆႈလူႉသဵင်ႈတၢႆ တီႈၼႂ်းဝဵင်းလူင်တေႇႁႃႇရၢၼ်ႇ မိူင်းဢီႇရၢၼ်ႇ ၼႆယဝ်ႉ။

Ismail Haniyeh ၼႆႉ ယၢမ်းပဵၼ်ၸွမ်ၽွင်းလူင်ပႃႇလႅတ်ႉသတၢႆး မိူဝ်ႈၼႂ်းပီႊ 2006 သေ ထုၵ်ႇလိူၵ်ႈပဵၼ် ၽူႈၼမ်းၽၢႆႇၵၢၼ်မိူင်းၸုမ်းသိုၵ်းႁႃးမၢတ်ႉသ် မိူဝ်ႈၼႂ်းပီႊ 2017 လႄႈ လွင်ႈၽူႈၼမ်းၽၢႆႇၵၢၼ်မိူင်း ထုၵ်ႇၶႃႈႁႅမ်တၢႆပွၵ်ႈၵမ်းၼႆႉၵေႃႈ ၽၢႆႇတၢင်းႁႃး မၢတ်ႉသ် တေဢမ်ႇပွႆႇပူၼ်ႉၵႂႃႇလၢႆလၢႆ ဝႃႈၼႆ။

ၼႂ်းဝၼ်းထီႉ 31 July 2024 ဝၼ်းလဵဝ်ၵၼ်ၼၼ်ႉၵူၺ်းၼင်ႇၵဝ်ႇ ယူႇတီႈၽူႈၼမ်းသုင် သုတ်းဢီႇရၢၼ်ႇ လႆႈဢွၵ်ႇၶေႃႈသင်ႇ ပိုတ်းယိုဝ်းသႂ်ႇဢိတ်ႇသရေးၵမ်းသိုဝ်ႈသေ လၢတ်ႈဝႃႈ တႃႇတွပ်ႇတႅၼ်းပၼ်ၽူႈၼမ်းၽၢႆႇၵၢၼ်မိူင်း ႁႃးမၢတ်ႉသ် ဢၼ်ထုၵ်ႇ ၶႃႈႁႅမ်တၢႆ ၼႂ်းမိူင်းဢီႇရၢၼ်ႇၼၼ်ႉ မၼ်းပဵၼ်ပုၼ်ႈၽွၼ်းႁဝ်း ယွၼ်ႉမၼ်းပဵၼ်ၼိူဝ်လိၼ်မိူင်းဢီႇရၢၼ်ႇ ၼႆယဝ်ႉ။

မိူဝ်ႈၼႂ်းလိူၼ် April 2024 ၼၼ်ႉ ၽၢႆႇတၢင်းဢီႇရၢၼ်ႇ လႆႈပိုတ်းယိုဝ်းသႂ်ႇဢိတ်ႇသ ရေးႁၢဝ်ႈႁႅင်းတီႈသုတ်း ၼႂ်းႁွပ်ႈလၢႆသိပ်းပီႊ လူၺ်ႈပဵၼ်ၵၢၼ်တုမ်ႉတွပ်ႇ လွင်ႈဢိတ်ႇသရေး ပိုတ်းယိုဝ်းသႂ်ႇလုမ်းၽွင်းတၢင်ဢီႇရၢၼ်ႇ ၼႂ်းမိူင်းသီးရီးယိူဝ်းသေ ၶႃႈႁႅမ်ၽူႈပွင်ၵၢၼ်သိုၵ်းဢီႇရၢၼ်ႇလၢႆၵေႃႉၼၼ်ႉ ဝႃႈၼႆ။

ၼွၵ်ႈလိူဝ်သေၼႆႉ ၽၢႆႇတၢင်းဢီႇရၢၼ်ႇ ယင်းလႆႈလၢတ်ႈဝႃႈ ၵၢၼ်ပိုတ်းယိုဝ်းၶႃႈႁႅမ် ၽူႈၼမ်းၽၢႆႇၵၢၼ်မိူင်းႁႃးမၢတ်ႉသ်ၼၼ်ႉၵေႃႈ ၽၢႆႇဢမေႇရိၵၢၼ်ႇၵေႃႈ မီးသုၼ်ႇ တႃႇႁပ်ႉဢဝ်ပုၼ်ႈၽွၼ်း ယွၼ်ႉပဵၼ်ၽူႈၵမ်ႉထႅမ် လႄႈ ႁူႉႁၼ်ၸွမ်းဢိတ်ႇသရေး ၼႆယဝ်ႉ။

Antony Blinken ၽွင်းလူင်ၽၢႆႇၼွၵ်ႈမိူင်းဢမေႇရိၵၢၼ်ႇ လႆႈတွပ်ႇလၢတ်ႈတီႈသိုဝ်ႇ ၶၢဝ်ႇဝႃႈ ဢမေႇရိၵၢၼ်ႇ ဢမ်ႇလႆႈႁူႉၸွမ်း လႄႈ ဢမ်ႇလႆႈၵဵဝ်ႇၶွင်ႈၸွမ်း ၵၢၼ်ၶႃႈ ႁႅမ်ပွၵ်ႈၵမ်းၼႆႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽၢႆႇတၢင်းဢိတ်ႇသရေး ဢမ်ႇပႆႇလႆႈဢွၵ်ႇမႃးယွမ်းႁပ်ႉ ဢမ်ႇၼၼ် ပၢၵ်ႈပႅတ်ႈ ၼႂ်းၵၢၼ်လၵ်ႉၶႃႈႁႅမ်ၽူႈၼမ်းၽၢႆႇၵၢၼ်မိူင်း ၸုမ်းႁႃးမၢတ်သ် ပွၵ်ႈၵမ်းၼႆသေတႃႉ ၽၢႆႇတၢင်းဢီႇရၢၼ်ႇ လႄႈ ၸုမ်းသိုၵ်းႁႃးမၢတ်ႉသ်တႄႉ ၵၢဝ်ႇၼႄးဢိတ်ႇသရေး ပဵၼ်ၵူၼ်းယူႇၽၢႆႇလင်ၼႂ်းၵၢၼ်ၶႃႈႁႅမ်ပွၵ်ႈၵမ်းၼႆႉ ၼႆယဝ်ႉ။

ၸိူင်ႉႁိုဝ်ၵေႃႈလီ တႄႇၸဵမ်မိူဝ်ႈၸုမ်းသိုၵ်းႁႃးမၢတ်ႉသ် ပိုတ်းယိုဝ်းသႂ်ႇဢိတ်ႇသရေး မိူဝ်ႈၼႂ်းဝၼ်းထီႉ 7 October 2023 ၼၼ်ႉသေ ႁဵတ်းႁႂ်ႈမီးၵူၼ်းလူႉသဵင်ႈတၢႆတီႈဢေႇ သုတ်း 1,197 ၵေႃႉ လႄႈ တီႉၺွပ်းၵႂႃႇထႅင်ႈ 251 ၵေႃႉယဝ်ႉ ၽၢႆႇတၢင်းဢိတ်ႇသရေး ၸင်ႇၶိုၼ်းလႆႈပိုတ်းယိုဝ်းတုမ်ႉတွပ်ႇသေ ႁဵတ်းႁႂ်ႈၸုမ်းသိုၵ်းႁႃးမၢတ်ႉသ် လႄႈ ၵူၼ်းမိူင်းပႃႇလႅတ်ႉသတၢႆး လူႉသဵင်ႈတၢႆၵႂႃႇၸမ် 40,000 ၵေႃႉ ဝႃႈၼႆ။

တႆးလွတ်ႈလႅဝ်း