ယူႇၶရဵၼ်းပိုတ်းယိုဝ်းႁိူဝ်းလမ်ၼမ်ႉ ရၢတ်ႉသျႃး

ယူႇၶရဵၼ်း တိူဝ်းၽိူမ်ႉၵၢၼ်တိုၵ်းတေႃးပိုတ်းယိုဝ်းၶဝ်ႈၼႂ်းရၢတ်ႉသျႃးထႅင်ႈလႄႈ တိုၵ်းယိုဝ်းႁိူဝ်းလမ်ၼမ်ႉရၢတ်ႉသျႃး ဢိၵ်ႇတင်း ယိုဝ်းသႂ်ႇဝၢင်းႁိူဝ်းမိၼ်တီႈၼိုင်ႈၼႂ်း မိူင်းရၢတ်ႉသျႃးၵႂႃႇ ယူႇယဝ်ႉ။

မိူဝ်ႈၼႂ်းဝၼ်းထီႉ 3 August 2024 (လိူၼ်ပႅတ်ႇလွင်ႈ 14 ၶမ်ႈ ပီႊတႆး 2118 ၼီႈ) ၽၢႆႇတၢင်းလူင်ပွင်ၸိုင်ႈယူႇၶရဵၼ်း ဢွၵ်ႇမႃးလၢတ်ႈဝႃႈ တပ်ႉသိုၵ်းယူႇၶရဵၼ်း လႆႈတိုၵ်းယိုဝ်းသႂ်ႇႁိူဝ်းလမ်ၼမ်ႉရၢတ်ႉသျႃးလမ်းၼိုင်ႈလႄႈ ပိုတ်းယိုဝ်းသႂ်ႇ ၶိူင်ႈႁႄႉၵင်ႈၽေးၵၢင်ႁၢဝ် S-400 ၼိုင်ႈၸုမ်ႇ ဢၼ်မီးယူႇတီႈၼႂ်းၸႄႈတွၼ်ႈ ၶရၢႆးမီးယႃး တီႈရၢတ်ႉသျႃးဝႆႉပဵၼ်သုၼ်ၵၢင် တေႃႉသူင်ႇၶိူင်ႈၵွင်ႈၵၢင်ႇ ပၼ်တပ်ႉသိုၵ်းရၢတ်ႉသျႃး ဢၼ်တူင်ႉၼိုင်ယူႇၼႂ်းယူႇၶရဵၼ်းၼၼ်ႉ ဝႃႈၼႆ။

ယင်းသိုပ်ႇလၢတ်ႈထႅင်ႈဝႃႈ တပ်ႉသိုၵ်းယူႇၶရဵၼ်းယင်းလႆႈၸႂ်ႉတရူၼ်းပိုတ်းယိုဝ်းသႂ်ႇ ဝၢင်းႁိူဝ်းမိၼ် Morozovsk ၼၼ်ႉထႅင်ႈလႄႈ မီးလၢႆးငၢၼ်းမႃးထႅင်ႈဝႃႈ ဢွင်ႈတီႈၵဵပ်းၶိူင်ႈၵွင်ႈၵၢင်ႇၵေႃႈ ထုၵ်ႇပိုတ်းယိုဝ်းသႂ်ႇ ဝႃႈၼႆ။

လိူဝ်သေၼၼ်ႉ ယင်းမီးလၢႆးငၢၼ်းထႅင်ႈဝႃႈ ယူႇၶရဵၼ်း လႆႈၸႂ်ႉၵွင်ႈလူင်လႄႈတရူၼ်း ယိုဝ်းသႂ်ႇၼႂ်းမိူင်းရၢတ်ႉသျႃးလၢႆလၢႆတီႈ ႁဵတ်းႁႂ်ႈၵူၼ်းလႆႈမၢတ်ႇၸဵပ်းတင်းၼမ် ဝႃႈၼႆ။

ၽၢႆႇတၢင်းရၢတ်ႉသျႃးၼၼ်ႉၵေႃႈ လႆႈဢွၵ်ႇမႃးလၢတ်ႈဝႃႈ တရူၼ်းယူႇၶရဵၼ်း တိုၵ်းယိုဝ်းသႂ်ႇတီႈႁိူၼ်းတိူၵ်ႈလူင်တီႈၼိုင်ႈသေ မီးၽူႈယိင်းၵေႃႉၼိုင်ႈလႆႈလူႉတၢႆလႄႈ လင်ႁိူၼ်းႁိမ်းႁွမ်းၼၼ်ႉၵေႃႈ လူႉသုမ်းယူႇလၢႆလင် ဝႃႈၼႆ။

တႆးလွတ်ႈလႅဝ်း