ၵူဝ်းရီးယႃးႁွင်ႇ သူင်ႇၶိူင်ႈယိုဝ်းမၢၵ်ႇမိတ်ႉသႆး တူင်ႉၼိုင်ၸွမ်းလႅၼ်လိၼ်

ၵူဝ်းရီးယႃးၸၢၼ်း လၢတ်ႈဝႃႈ ၶိူင်ႈယိုဝ်းမၢၵ်ႇမိတ်ႉသႆး ဢၼ်ၵူဝ်းရီးယႃးႁွင်ႇ သူင်ႇမႃးတူင်ႉၼိုင် ၸွမ်းလႅၼ်လိၼ်ၼၼ်ႉ ပဵၼ်တႃႇပူၼ်ႉပႅၼ်ၵူဝ်းရီးယႃးၸၢၼ်း။

မိူဝ်ႈၼႆႉဝၼ်းထီႉ 5 August 2024 (လိူၼ်ၵဝ်ႈမႂ်ႇ 1 ၶမ်ႈ ပီႊတႆး 2118 ၼီႈ) သိုဝ်ႇၶၢဝ်ႇ KCNA လၢႆးငၢၼ်းဝႃႈ ၶိမ်း ၵျွင်းဢိုၼ်း ၽူႈၼမ်းသုင်သုတ်းၵူဝ်းရီးယႃးႁွင်ႇ လႆႈယိုၼ်ႈမွပ်ႈၶိူင်ႈယိုဝ်း မၢၵ်ႇမိတ်ႉသႆးသႅၼ်းမႂ်ႇ 250 ၶိူင်ႈ တႃႇသူင်ႇၵႂႃႇတူင်ႉၼိုင်ၸွမ်းလႅၼ်လိၼ်ၵူဝ်းရီးယႃးႁွင်ႇ ဢၼ်ယူႇတိတ်းၸပ်းၸွမ်း ၵူဝ်းရီးယႃးၸၢၼ်းၼၼ်ႉ လႄႈ ၶိူင်ႈယိပ်းမၢၵ်ႇမိတ်ႉသႆး သႅၼ်းမႂ်ႇၼႆႉၵေႃႈ ၽၢႆႇတၢင်းၵူဝ်းရီးယႃးႁွင်ႇ လႆႈၸၢမ်းယိုဝ်း မိူဝ်ႈလိူၼ် July 2024 ပူၼ်ႉမႃးၼၼ်ႉယဝ်ႉ ဝႃႈၼႆ။

ဢမေႇရိၵၢၼ်ႇ ယင်းတိုၵ်ႉၵေႃႈတင်ႈ ၸုမ်းသိုၵ်းဢၼ်ၸႂ်ႉတိုဝ်းမၢၵ်ႇၼိဝ်းၶလီးယႃးသေ မိပ်ႇဢီး ႁႂ်ႈၵူဝ်းရီးယႃးႁွင်ႇ လႆႈၽိူမ်ႉၼမ်ႉၵတ်ႉတပ်ႉသိုၵ်းႁႂ်ႈၵႅၼ်ႇၶႅင်ၶိုၼ်ႈမႃး လႄႈ ၽၢႆႇတၢင်းၵူဝ်းရီးယႃး ႁွင်ႇၵေႃႈ တေယုၵ်ႉၸၼ်ႉ လွင်ႈၽွမ်ႉတူဝ်ႈတၼ်း တႃႇၸႂ်ႉတိုဝ်းမၢၵ်ႇၼိဝ်းၶလီးယႃး ပိူဝ်ႈတႃႇႁႄႉၵင်ႈၽေးဢၼ်တေမႃးပူၼ်ႉပႅၼ် တင်း ၵႅတ်ႇၶႄႁႄႉၵင်ႈတူဝ်ၵဝ်ႇ ၼႆ ၽူႈၼမ်းသုင်သုတ်း ၵူဝ်းရီးယႃးႁွင်ႇ လၢတ်ႈၼင်ႇၼႆ။

ၵဵဝ်ႇလူၺ်ႈလွင်ႈၼႆႉသေ ၽၢႆႇတၢင်းၵူဝ်းရီးယႃးၸၢၼ်း ဢွၵ်ႇမႃးလၢတ်ႈဝႃႈ ႁဝ်းယုမ်ႇယမ်ဝႃႈ ယိူင်းဢၢၼ်းဢၼ်လႆႈသူင်ႇၶိူင်ႈယိုဝ်းမၢၵ်ႇမိတ်ႉသႆးမႃးတူင်ႉၼိုင်ၸွမ်းလႅၼ်လိၼ်ၼၼ်ႉ ပဵၼ်တႃႇပိုတ်းယိုဝ်း ဢမ်ႇၼၼ် တႃႇလွၵ်ႇငိူတ်ႈၵူဝ်းရီးယႃးၸၢၼ်း လႄႈ လွင်ႈသူင်ႇမႃးတူင်ႉၼိုင်ၸွမ်းလႅၼ်လိၼ်ၼၼ်ႉၵေႃႈ ပွင်ႇဝႃႈဢမ်ႇၸႂ်ႈၶိူင်ႈယိုဝ်းမၢၵ်ႇမိတ်းသႆး သႅၼ်းယိုဝ်းၵႆ ၼႆယဝ်ႉ။

ၼွၵ်ႈလိူဝ်သေၼႆႉ ၼႂ်းပၢင်သူင်ႇဢၢပ်ႈၶိူင်ႈယိုဝ်းမၢၵ်ႇမိတ်ႉသႆးၼၼ်ႉ ယင်းလႆႈမီးပႃး Kim Ju-ae ၵေႃႉပဵၼ်လုၵ်ႈယိင်းၽူႈၼမ်းသုင်သုတ်းၵူဝ်းရီးယႃးႁွင်ႇ လႄႈ ၵူၼ်းလဵၼ်ႈၵၢၼ်မိူင်း ၵူဝ်းရီးယႃးၸၢၼ်းၵေႃႈ လႆႈလၢတ်ႈမိူဝ်ႈၼႂ်းလိူၼ် July 2024 ၼၼ်ႉဝႃႈ Kim Ju-ae လႆႈထုၵ်ႇၽိုၵ်းသွၼ် တႃႇႁပ်ႉတၼ်းႁဵင်းပဵၼ်ၽူႈၼမ်းၵူဝ်းရီးယႃးႁွင်ႇ ဝႃႈၼႆ။

ၸိူင်ႉႁိုဝ်ၵေႃႈလီ ပႅၵ်ႉသမ်ႉဝႃႈသိုဝ်ႇၶၢဝ်ႇၵူဝ်းရီးယႃးႁွင်ႇ တေလၢႆးငၢၼ်းၶၢဝ်ႇ လွင်ႈတူင်ႉၼိုင်ၶွင် Kim Ju-ae ၼႆသေတႃႉ ၵူၺ်းဢမ်ႇလႆႈလၢတ်ႈပၼ်တၢင်းႁၼ်ထိုင် ၵဵဝ်ႇလူၺ်ႈလွင်ႈၵၢၼ်မိူင်းၶွင် Kim Ju-ae ၼႂ်းဝၼ်းမိူဝ်းၼႃႈ ၼႆယူႇယဝ်ႉ။

တႆးလွတ်ႈလႅဝ်း