ၽူႈမီးပုၼ်ႈၽွၼ်း RCSS/SSA လူင်းပိုၼ်ႉတီႈၵူတ်ႇထတ်းလွင်ႈလူႉသုမ်း ဝၢႆးၼမ်ႉထူမ်ႈ

မိူဝ်ႈဝၼ်းထီႉ 15 September 2024 (လိူၼ်သိပ်းမႂ်ႇ 13 ၶမ်ႈ ပီႊတႆး 2118 ၼီႈ)  ၽူႈမီးပုၼ်ႈၽွၼ်း ဢိၵ်ႇတင်း ၵေႃႉသိုၵ်းၵေႃႉႁၢၼ် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) လႆႈဢွၼ်ၵၼ်ၵႂႃႇၵူတ်ႇထတ်းတူၺ်း ဢွင်ႈတီႈၸိူဝ်းလႆႈႁပ်ႉၽွၼ်းတုမ်ႉယွၼ်ႈၽေးၼမ်ႉထူမ်ႈ။

တႄႇဢဝ်ဝၢၼ်ႈၼမ်ႉပႃမၼ်း ဢိူင်ႇဝဵင်းၽုၺ်း ထိုင်ဝၢၼ်ႈၵဵင်းလူမ်း ၼၼ်ႉ လႆႈႁၼ်ဝႃႈ သဵၼ်ႈတၢင်းလူႉၵွႆ ၶူဝ်ၵွႆ၊ သူၼ်ၶဝ်ႈၵၢပ်ႇ လူမ်ႉလႄႈၼမ်ႉထူမ်ႈလူၵ်ႈ တင်းၼမ်၊ ၼႃးၵူၼ်းမိူင်းၵေႃႈ လႆႈလူႉသုမ်းၼမ်တႄႉတႄႉ။

ၵဵဝ်ႇလူၺ်ႈလွင်ႈတၢင်းယၢပ်ႇၵူၼ်းမိူင်း ၸိူဝ်းလႆႈထူပ်းယူႇၼၼ်ႉၵေႃႈ တေႁႃလၢႆးတၢင်းသေၸွႆႈထႅမ်ၵႂႃႇ ယူႇယဝ်ႉ။

ၼႂ်းဝၼ်းထီႉ 14 September 2024 ၼၼ်ႉၵေႃႈ ၽူႈမီးပုၼ်ႈၽွၼ်း RCSS/SSA ဢွၼ်ၵၼ်လူင်းပိုၼ်ႉတီႈ ၸွႆႈထႅမ်ၵူၼ်းမိူင်း ၸႄႈဝဵင်းလၢင်းၶိူဝ်း တႃႇသၢမ်ဝၢၼ်ႈ ႁူမ်ႈလင်ႁိူၼ်းတင်းမူတ်း 177 လင် ၵႂႃႇမိူၼ်ၵၼ် ယူႇယဝ်ႉ။

တႆးလွတ်ႈလႅဝ်း