ၸၢၵ်ႈလၢတ်ႈ ၸုမ်း Hezbollah တႅၵ်ႇ မီးၵူၼ်းလူႉတၢႆမၢတ်ႇ ၸဵပ်းၼမ်

မိူဝ်ႈၼႂ်းဝၼ်းထီႉ 18 September 2024 (လိူၼ်သိပ်းလွင်ႈ 1 ၶမ်ႈ  ပီႊတႆး 2118 ၼီႈ) တီႈၼႂ်းပၢင်မႃႇသႃႇ လုၵ်ႈၸုမ်း Hezbollah ၼႂ်းဝဵင်းလူင်ပေႇရုတ်ႉ မိူင်းလေႇပႃႇၼွၼ်ႇၼၼ်ႉ ဢၼ်ပဵၼ်ၸၢၵ်ႈလၢတ်ႈ Walkie Talkies ၶွင်ၸုမ်း Hezbollah လႆႈတႅၵ်ႇသေ ႁဵတ်းႁႂ်ႈမီးၵူၼ်းလူႉသဵင်ႈတၢႆ 20 ၵေႃႉ၊ မၢတ်ႇၸဵပ်းဢမ်ႇယွမ်း 450 ၵေႃႉ ၼႆယဝ်ႉ။

လွင်ႈဢၼ်ၼႆႉၵေႃႈ လႆႈမီးမႃးဝၢႆးသေ မိူဝ်ႈၼႂ်းဝၼ်းထီႉ 17 September 2024 ၶိူင်ႈသူင်ႇၶေႃႈၵႂၢမ်း Pager ၶွင် ၸုမ်းလုၵ်ႉၽိုၼ်ႉ Hezbollah လၢႆပၢၵ်ႇၶိူင်ႈ လႆႈတႅၵ်ႇ ထပ်းၵၼ် ၸွတ်ႇတူဝ်ႈၼႂ်းမိူင်းလေႇပႃႇၼွၼ်ႇသေ ႁဵတ်းႁႂ်ႈမီးၵူၼ်းလူႉသဵင်ႈတၢႆ 12 ၵေႃႉ ၼႂ်းၼႆႉပဵၼ်လုၵ်ႈဢွၼ်ႇ 2 ၵေႃႉ၊ မၢတ်ႇၸဵပ်းမွၵ်ႈ 2,800 ၵေႃႉ ဝႃႈၼႆ။

ၵဵဝ်ႇလူၺ်ႈလွင်ႈၼႆႉသေ ၽၢႆႇတၢင်းၸုမ်း Hezbollah ၵၢဝ်ႇၼႄး ပဵၼ်ႁွႆးမိုဝ်း ဢိတ်ႇသရေးၼႆသေတႃႉ ၽၢႆႇတၢင်းဢိတ်ႇသရေးၵေႃႈ ဢမ်ႇပႆႇလႆႈဢွၵ်ႇမႃးလၢတ်ႈ ပၼ်တၢင်းႁၼ်ထိုင်သင် ၵဵဝ်ႇလူၺ်ႈလွင်ႈၼႆႉ ၼႆယူႇ။

သိုဝ်ႇၶၢဝ်ႇ New York Times လႆႈလၢႆးငၢၼ်း မိူဝ်ႈဝၼ်းထီႉ 17 September 2024 လူၺ်ႈ ဢၢင်ႈဢိင်ဢၼ်ၽူႈမီးပုၼ်ႈၽွၼ်းဢမေႇရိၵၢၼ်ႇ လၢႆလၢႆၵေႃႉလၢတ်ႈဝႃႈ ဢိတ်ႇသ ရေး လႆႈလၵ်ႉၽင်မၢၵ်ႇတႅၵ်ႇဝႆႉၼႂ်းၶိူင်ႈသူင်ႇၶေႃႈၵႂၢမ်း Pager လၢႆႁဵင်ၶိူင်ႈ ဢၼ်သူင်ႇ ၶဝ်ႈၵႂႃႇတီႈ ၼႂ်းမိူင်းလေႇပႃႇၼွၼ်ႇ ၽၢၼ်ႇတၢင်းၶွမ်ႇပၼီႇ Gold Apollo ၶွင် ထႆႇဝၼ်ႇ ၼႆယဝ်ႉ။

ၸိူင်ႉႁိုဝ်ၵေႃႈလီ မိူဝ်ႈၼႂ်းဝၼ်းထီႉ 18 September 2024 ၼၼ်ႉ ယူႇတီႈၽူႈၵေႃႇတင်ႈ ၶွမ်ႇပၼီႇ Gold Apollo လႆႈဢွၵ်ႇမႃးလၢတ်ႈဝႃႈ ၶွမ်ႇပၼီႇမၼ်းဢမ်ႇၸႂ်ႈ ၽူႈၶူင်သၢင်ႈ ႁဵတ်းဢွၵ်ႇ Pager ၸိူဝ်းၼႆႉ လႄႈ ၵူၼ်းႁဵတ်းဢွၵ်ႇမၼ်းပဵၼ် BAC ဢၼ်တင်ႈဝႆႉယူႇ ၼႂ်းဝဵင်းလူင် Budapest မိူင်းႁင်ႇၵေႇရီႇၼၼ်ႉ ဝႃႈၼႆ။

ဝၢႆးသေၸုမ်းသိုၵ်းႁႃးမၢတ်ႉသ် ပိုတ်းယိုဝ်းသႂ်ႇဢိတ်ႇသရေး မိူဝ်ႈၼႂ်းဝၼ်းထီႉ 7 October 2023 ၼၼ်ႉယဝ်ႉ ႁဵတ်းႁႂ်ႈဢိတ်ႇသရေး ၶဝ်ႈပိုတ်းယိုဝ်းတုမ်ႉတွပ်ႇ ၼႂ်းပိုၼ်ႉ တီႈၵႃႇၸႃႇသေ ၶႃႈႁႅမ်ၵူၼ်းမိူင်းပႃႇလႅတ်ႉသတၢႆး ဢိၵ်ႇတင်း ၸုမ်းသိုၵ်းႁႃးမၢတ်ႉသ် ၵႂႃႇယဝ်ႉဢမ်ႇယွမ်း 41,000 ၵေႃႉ လႄႈ တႄႇဢဝ်ၼၼ်ႉမႃး ၸုမ်းသိုၵ်း Hezbollah တင်း ဢိတ်ႇသရေးၵေႃႈ လႆႈမီးလွင်ႈပိုတ်းယိုဝ်းၵၼ်ၵူႈဝၼ်း ၼႆယဝ်ႉ။

တႆးလွတ်ႈလႅဝ်း