ပၼ်ႁႃမိူင်းႁူမ်ႈတုမ်မၢၼ်ႈယၢမ်းလဵဝ် ၸွင်ႇပဵၼ်ယၢင်ႈတိၼ်တႃႇပူၵ်းတင်ႈၸိုင်ႈမိူင်းမႂ်ႇၽႂ်မၼ်း  ( တွၼ်ႈ −1)

ငဝ်းလၢႆး မိူင်းႁူမ်ႈတုမ် ဝၼ်းမိူဝ်ႈၼႆႉ တူင်ႇၶွပ်ႇၵၢၼ်သိုၵ်းၵႂၢင်ႈမႃးလိူဝ် တူင်ႇၶွပ်ႇၵၢၼ်မိူင်း ၼႆလႄႈ ပၢင်တိုၵ်းသိုၵ်းသိူဝ်ၵေႃႈ မီးၵူႈဝၼ်း၊ ၵူၼ်းမိူင်းၵေႃႈ ထူပ်းၺႃးတၢမ်ႇသိုၵ်းသိူဝ်ၵၼ်ၼပ်ႉႁူဝ်သႅၼ်ၵေႃႉမၼ်း ၼႆယဝ်ႉ။

တႄႇဢဝ်ဝၼ်းဢၼ် ၶွင်ႇသီႇသိုၵ်းမၢၼ်ႈ ယိုတ်းဢၢမ်းၼၢတ်ႈၸိုင်ႈမိူင်းႁူမ်ႈတုမ်မႃး 01 February 2021 ၼၼ်ႉ မီးၽူႈႁၢပ်ႇထၢမ်းၵၢၼ်ၶုၼ် လုၵ်ႈႁဵၼ်း ၵူၼ်းမိူင်း တင်းၼမ် ဢွၼ်ၵၼ်သၢၼ်ၶတ်း ၵၢၼ်ယိုတ်းဢၢမ်းၼၢတ်ႈ လူၺ်ႈလၢႆးၵတ်းယဵၼ် ၼႄၵၢင်ၸႂ်လွင်ႈဢမ်ႇယွမ်းႁပ်ႉၼင်ႇၵတ်းၵတ်းယဵၼ်ယဵၼ်သေတႃႉၵေႃႈ ၵမ်းလိုၼ်းသုတ်း ၶွင်ႇသီႇသိုၵ်းမၢၼ်ႈ ၼမ်းဢဝ်ၶေႃႈၵႂၢမ်းၸဝ်ႈသြႃႇတူၼ်ၼိုင်ႈလၢတ်ႈတီႈ ႁူဝ်ပဝ်ႈၶွင်ႇသီႇ သိုၵ်းမၢၼ်ႈဝႃႈ “ ပေႃးၶႂ်ႈလႅၵ်ႈလၢႆႈၵၢပ်ႈပၢၼ်ၵေႃႈ ႁႂ်ႈယိုဝ်းႁူဝ်ပႅတ်ႈ  − ခေတ်ကိုပြောင်းချင်ရင် ခေါင်းကိုပစ် ” ၼႆလႄႈ ၶွင်ႇသီႇသိုၵ်းမၢၼ်ႈ ၸႂ်ႉမိုဝ်းမႅၼ်ႈၶဝ် ယိုဝ်းၵွၵ်းႁူဝ် ၵူၼ်းၼႄၵၢင်ၸႂ်ၶဝ်သေ ႁဵတ်းႁႂ်ႈၵိူတ်ႇၶိုၼ်ႈ လွင်ႈၶႃႈႁႅမ်တၢႆ ၸႂ်ႉလၢႆးႁုၵ်ႉႁၢႆႉၵူၼ်ႇလူမ်ႉ ၵူၼ်းၶွမ်ႈၶတ်းလႄႈ လိုၼ်းသုတ်း ၵူၼ်းၼုမ်ႇၸိူဝ်းၼႄၵၢင်ၸႂ်လႆႈလိူၵ်ႈသဵၼ်ႈတၢင်း တႃႇတေယိပ်းၵွင်ႈၵၢင်ႇတေႃႇသူႈ ၵူၼ်ႇလူမ်ႉၶိုၼ်းၸဝ်ႈဢႃႇၼႃႇ ၸၵၸ။

ၼႂ်းဝၼ်းထီႉ05 May 2021 ၶွတ်ႇၽွတ်ႈမီးမႃးတပ်ႉၵႅတ်ႇၶႄၵူၼ်းမိူင်း People’s Defence Force (PDF) ၼႆသေ တူင်ႉၼိုင်ၵိုၵ်းၵပ်းၸွမ်းသိုၵ်း ၸၢဝ်းၶိူဝ်းယိပ်းၵွင်ႈၵၢင်ႇ မိူၼ်ၼင်ႇ KIA , TNLA, MNDAA, PNLA, KNU ,  KNPP လႄႈ တူင်ႉၼိုင်ၸွမ်းၼႂ်းထုင်ႉပဵင်း မိူင်းမၢၼ်ႈ။ လုၵ်ႈဢွၼ်ႇၼုမ်ႇတင်းၼမ် လႆႈႁပ်ႉလွင်ႈၵမ်ႉၸွႆႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်းလွၵ်းလၢႆးၵၢၼ်သိုၵ်း ၊ ၶိူင်ႈၵမ်ႉၵႅမ်သိုၵ်း ၵွင်ႈၵၢင်ႇၸိူဝ်းၼႆႉပႃးလႄႈ ၶဝ်ႈတိုၵ်းၸွမ်း ၼႂ်းၽႅၼ်ၵၢၼ်သိုၵ်း ( Operation ) ပႃး။ ၶဝ်လႆႈတၢင်းႁူႉၵၢၼ်တူဝ်ထူပ်းၼမ်ႉၵတ်ႉ တၢင်းၵၢၼ်သိုၵ်းၼမ်ၵႂႃႇ။

သိုၵ်းမၢၼ်ႈ သုမ်းသိုၵ်း မိူင်းတႆးပွတ်းႁွင်ႇ ၵူၼ်းမိူင်းဢမ်ႇလႆႈယူႇသႃႇ

သိုၵ်းမၢၼ်ႈ တႄႇၺႃးပိုတ်ႇပၢင်တိုၵ်း ဢၼ်ၸုမ်းဢူၺ်းလီသၢမ်ပီႈၼွင်ႉ ၽႅၼ်တိုၵ်း(1027 Operation ပွၵ်ႈ1−2)ၼၼ်ႉသေ ၼႂ်းမိူင်းတႆး ပွတ်းႁွင်ႇ ၼွၵ်ႈလိူဝ်သေ ၸႄႈဝဵင်းမူႇၸႄႈ ၊ တၢင်ႉယၢၼ်း၊ သီႇပေႃႉ၊ မိူင်းယႆ ၼၼ်ႉ သိုၵ်းTNLA လႄႈ သိုၵ်းၵဝ်ႈၵၢင်ႉ ၵုမ်းၵမ်လႆႈသေ တႄႇတမ်းဝၢင်းၵၢၼ်ဢုပ်ႉပိူင်ႇ၊ ၵၢၼ်ပူၵ်း ပွင်မႃးၼႆ လႆႈႁၼ်ၼႂ်းၶေႃႈပိုၼ်ၽၢဝ်ႇမူႇၸုမ်း ၽႂ်မၼ်းၼႄ ဝႆႉယူႇယဝ်ႉ။

ထိုင်တီႈဝႃႈ သိုၵ်းၵဝ်ႈၵၢင်ႉ လႄႈ သိုၵ်းTNLA ၵုမ်းထိင်းလႆႈၼႃႈတီႈလႄႈဝဵင်း ၼႆၵေႃႈ ၵူၼ်းမိူင်းဢမ်ႇပေႃးလႆႈယူႇသႃႇလူမ်ၸႂ် ယူႇယူႇၵေႃႈ ၶွင်ႇသီႇသိုၵ်းမၢၼ်ႈဢဝ်ႁိူဝ်းမိၼ် ၵႂႃႇပွႆႇမၢၵ်ႇသႂ်ႇ တီႈထၢင်ႇထိူမ်ဝႃႈ ပဵၼ်တီႈယူႇ တီႈၶွၼ်ႈသိုၵ်းၸၢဝ်းၶိူဝ်းၼႆသေ ႁဵတ်းႁႂ်ႈၵူၼ်းမိူင်းလႆႈလိူတ်ႇမႆႈ ၵူဝ်ႁႄ လုတၢႆ ယွၼ်ႉမၼ်းမႃး ဢမ်ႇဢေႇယဝ်ႉ။ ၼွင်ၶဵဝ် လႃႈသဵဝ်ႈ ၵျွၵ်ႉမႄး ၼမ်ႉသၼ်ႇ သႅၼ်ဝီ ၼမ်ႉၶမ်း ယူႇယူႇၵေႃႈ မီးၶၢဝ်ႇလွင်ႈသိုၵ်းမၢၼ်ႈဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇယၢမ်းၵၢင်ၶမ်ႈၵၢင်ၶိုၼ်း။

ၼွၵ်ႈလိူဝ်သေၼႆႉ ၼႂ်းၵႄႈသိုၵ်းၵဝ်ႈၵၢင်ႉ၊ သိုၵ်းၶၢင်၊ သိုၵ်းတႆး ၊ TNLA ၊ PDF ၵေႃႈ ၵႆႉမီးလွင်ႈပၼ်ႁႃ ႁိမ်ၼႃႈတီႈၵၼ်သေ ဢမ်ႇထုၵ်ႇမႅၼ်ႈၵၼ်ၼႂ်းၵႄႈၸုမ်းဢူၺ်းလီၶဝ်ၼင်ႇၵၼ်။

ဝၢႆးတိူင်းသိုၵ်းလႃႈသဵဝ်ႈတႅၵ်ႇယဝ်ႉ သိုၵ်းၵဝ်ႈၵၢင်ႉၵေႃႈ ပိုၼ်ၽၢဝ်ႇ ၵၢၼ်ဢုပ်ႉပိူင်ႇလႄႈ တႃႇပဵၼ်လွင်ႈ ၵိုတ်းတိုၵ်းၵၼ်တင်း ၶွင်ႇသီႇသိုၵ်းမၢၼ်ႈၼၼ်ႉ ပိုၼ်ၽၢဝ်ႇ ၼႂ်းလိူၼ် September,04 ဝၼ်း ဝႃႈ တေဢမ်ႇတိုၵ်းတိူင်းသိုၵ်းပွတ်းၵၢင် (ဝဵင်းလိူဝ်ႇ) ၊ တိူင်းသိုၵ်းဝၼ်းဢွၵ်ႇ(တူၼ်ႈတီး) လႄႈ ဢမ်ႇၵပ်းသိုပ်ႇႁဵတ်းၵေႃႉ ၸုမ်း NUG ၊ ၵူၺ်းၵႃႈ မီးသုၼ်ႇတႃႇၶိုၼ်းတိုၵ်းၵႅတ်ႇၶႄတူဝ်ၵဝ်ႇၵႂႃႇ ဝႃႈၼႆ။

ယွၼ်ႉလွင်ႈတၢင်းႁဵတ်းသၢင်ႈသိုၵ်းၵဝ်ႈၵၢင်ႉၼႆႉသေ ၸိူဝ်းႁၼ်လီၵေႃႈလၢတ်ႈဝႃႈ ယွၼ်ႉၶဝ်မီးလွင်ႈၵမ်ၵိၼ်းတင်းမိူင်းၶႄႇမိပ်ႇငႅၼ်းႁၢဝ်ႈႁႅင်းလႄႈ ၸင်ႇပဵၼ်မႃး၊ ၵမ်ႈၽွင်ႈၸိူဝ်းဢမ်ႇႁၼ်လီၵေႃႈဝႃႈ သိုၵ်းၵဝ်ႈၵၢင်ႉ ႁၵ်းလင်ၸုမ်းNUG ၼႆဝႆႉ။ ၸိူင်ႉႁိုဝ်ၵေႃႈယဝ်ႉ မၼ်းပဵၼ်ၵၢၼ်ယူႇလွတ်ႈတႃႇသိုၵ်းၵဝ်ႈၵၢင်ႉၶဝ်လႄႈ ၸမ်ပဵၼ်ၶဝ်ၸင်ႇပိုၼ်ၽၢဝ်ႇလွင်ႈၼၼ်ႉၼႆၵေႃႈဝႃႈ။

သိုၵ်းTNLA တမ်းပိူင်ဢုပ်ႉပိူင်ႇလႄႈ ၶတ်းၸႂ်ၸႂ်ႉတိုဝ်းလိၵ်ႈလၢႆးပလွင်ႈမႃး ၼႂ်းပိုၼ်ႉတီႈၵုမ်းၵမ်

တႃႉၽူင်းၵျေႃႇ ၽူႈၼမ်းၼႂ်းၵူႈလွင်ႈလွင်ႈ TNLA မွၵ်ႇလၢတ်ႈ ၼႂ်းပၢင်ႁူပ်ႉထူပ်းၵူၼ်းမိူင်း မိူင်းမိတ်ႈ မိူင်းၵုတ်ႈဝႃႈ ပေႃးပီႊ2025 ၵႂႃႇ တေၶတ်းၸႂ်ႁႂ်ႈပွင်သၢင်ႈၶိုၼ်ႈမႃး လူင်ပွင်ၸိုင်ႈၸူဝ်ႈၶၢဝ်း ဢၼ်မီးတူဝ် တႅၼ်းၵူၼ်းမိူင်းပဵၼ်ၽူႈၶဝ်ႈပႃးၼႆၵေႃႈ ၵၢၼ်ဢုပ်ႉပိူင်ႇ TNLA ဢၼ်ၽေႃႇၼမ်ႉၼႄတူဝ်ယူႇ ၼႂ်းပိုၼ်ႉတီႈၵုမ်းၵမ်တေႉတေႉၼၼ်ႉ ၵူၼ်းမိူင်းဢမ်ႇမီးသုၼ်ႇတႅပ်းတတ်း ႁဵတ်းသၢင်ႈလႆႈဢီႈသင် ၼႆ ႁၼ်ၶၢဝ်ႇ BBC ဢွၵ်ႇၼႄပႃးဝႆႉ။

မိူဝ်ႈလဵဝ်ၵေႃႈ မီးၶၢဝ်ႇဢွၵ်ႇမႃးထႅင်ႈ ဝႂ်ၵူၼ်းၵိုၵ်းႁိူၼ်းၵူႈၸႄႈဝဵင်းဢၼ်သိုၵ်းTNLA ၵုမ်းၵမ်ဝႆႉၼၼ်ႉ တေၸႂ်ႉပဵၼ်လိၵ်ႈပလွင်ႈၵႂႃႇ ၼႆလႄႈ ႁၼ်ပဵၼ်ၽႅၼ်ၵၢၼ်မႁႃႇပွင်ၵၢၼ်ၸိူဝ်ႉၸၢတ်ႈလူင်တႃႇၸိူဝ်ႉၶိူဝ်းၼိုင်ႈယူႇ၊ ယုၵ်ႉၸၼ်ႉၵုင်ႇသိၵ်ႈၶႃႇၸိူဝ်ႉၶိူဝ်းတူဝ်ၵဝ်ႇမႃးၼၼ်ႉယဝ်ႉ။

တႃႇမိူင်းတႆးပွတ်းႁွင်ႇ ၸုမ်းသိုၵ်းတႆးပွတ်းႁွင်ႇ ယၢမ်ႈလၢတ်ႈသင်ဝႆႉ?

မိူဝ်ႈၽွင်းပီႊ2019 ၼႂ်းၵႄႈၸုမ်းသိုၵ်းတႆးသွင်ၸုမ်း မီးလွင်ႈတွၵ်ႉတႅၵ်ႉၵၼ် ပဵၼ်မိူဝ်ႈပဵၼ်ပွၵ်ႈလႄႈ ၶိုၼ်းပိၼ်ႇပၢႆႇဢုပ်ႇဢူဝ်းၶဝ်ႈႁႃၵၼ်ၼၼ်ႉ ၵႆႉလႆႈငိၼ်း လွင်ႈသိုၵ်းတႆးပွတ်းႁွင်ႇ ၽူႈတၢင်လၢတ်ႈ ဢွၵ်ႇၶၢဝ်ႇ ႁႂ်ႈသိုၵ်းတႆးပွတ်းၸၢၼ်းထွႆထွၼ်ပၼ်ပွတ်းႁွင်ႇယဝ်ႉ ၶဝ်ၵေႃႉတေၵုမ်းၵမ်ဢုပ်ႉပိူင်ႇ ၸတ်းၵၢၼ်ၵႂႃႇ။

ၼင်ႇၵႂၢမ်းလၢတ်ႈၼႆႉ ယွၼ်ႉသိုၵ်းတႆးပွတ်းၸၢၼ်း ဢမ်ႇယွမ်းထွႆလႄႈ သိုၵ်းပွတ်းႁွင်ႇ ႁူမ်ႈမိုဝ်းသိုၵ်းပိူၼ်ႈသေ လေႃႇတိုၵ်းသိုၵ်းတႆးပွတ်းၸၢၼ်းဢွၵ်ႇပွတ်းႁွင်ႇ ပွတ်းၵၢင်ၵမ်ႈၽွင်ႈယဝ်ႉၵေႃႈ ဝၼ်းမိူဝ်ႈၼႆႉ ထိုင်တီႈသိုၵ်းတႆး ပွတ်းၸၢၼ်းဢမ်ႇမီးၼႂ်းမိူင်းတႆးပွတ်းႁွင်ႇယဝ်ႉ သိုၵ်းတႆးပွတ်းႁွင်ႇ ဢမ်ႇမီးဢႃႇၼႃႇ တႃႇတေၵုမ်းၵမ်လႆႈဢီႈသင်။

ထႅမ်ပၢႆၺႃး သိုၵ်းTNLA MNDAA လူလၢႆ တီႉၺွပ်ႉထုၵ်ႇယိုဝ်းတၢႆ ထႅင်ႈ။ လႆႈသုတ်ႉထွႆပၼ်ပိူၼ်ႈ တင်းပွတ်းႁွင်ႇ ၶႂ်ႈဝႃႈၵူႈၸႄႈဝဵင်းယဝ်ႉ ၼမ်ႉၶမ်း၊ သႅၼ်ဝီ ၊ ၼမ်ႉတူႈ၊ မိူင်းယဵၼ်၊ ၵျွၵ်ႉမႄး ၊ ၼွင်ၶဵဝ်၊ တၢင်ႉယၢၼ်း ဢမ်ႇၶႂ်ႈၵိုတ်းလိူဝ်သင်။ လွင်ႈၼႆႉႁၼ်ၸွမ်းၶၢဝ်ႇငဝ်းၼိူဝ်သိုဝ်ႇဢွၼ်ႇလၢႆးလႄႈ ၵူၼ်းပိုၼ်ႉတီႈ ယိုၼ်ယၼ်လၢတ်ႈၼႄၵေႃႈမီး။

ယိူင်းဢၢၼ်းသိုၵ်းဝ မီးသင် ထိုင်တီႈ ဢဝ်ႁႅင်းသိုၵ်းၶၢမ်ႈမႃးၽၢႆႇတူၵ်းၶူင်း

ဝၢႆးၽႅၼ်ၵၢၼ်သိုၵ်းတႆးပွတ်းႁွင်ႇ တိုၵ်းသိုၵ်းတႆးပွတ်းၸၢၼ်းယဝ်ႉ သိုၵ်းဝ မႃးယူႇၸွမ်းသိုၵ်းတႆးပွတ်းႁွင်ႇ ၼုင်ႈၶူဝ်းသိုၵ်းတႆးပွတ်းႁွင်ႇ (မိူဝ်ႈဢွၼ်တၢင်း) ၵမ်းလိုၼ်းၵေႃႈ ပိုတ်ႇတူဝ်ၸႅင်ႈလႅင်း မႃးယူႇၸွမ်း သၢႆ လၢႆးၶႃႈ မိူင်းၵိုင် ပၢင်လူင် သၼဵၼ်း ထိုင်သၢႆလွၵ်ႉၸွၵ်ႇ။

သိုၵ်းၵဝ်ႈၵၢင်ႉတိုၵ်း တိူင်းသိုၵ်းလႃႈသဵဝ်ႈယဝ်ႉ ပဵၼ်ၶေႃႈၵႂၢမ်းႁၢင်ႈလီဝႃႈ တႃႇႁႄႉၵင်ႈၽေးသိုၵ်း ၵူဝ်လၢမ်းၶဝ်ႈထိုင်တၢင်ႉယၢၼ်း ၊ တႃႇႁူမ်ႇလူမ်ႈပုၼ်ႈပၢင်ႈၽွၼ်းလီ ၸၢဝ်းၶိူဝ်းဝႃႉ တီႈတၢင်ႉယၢၼ်းၼႆသေ ဢဝ်ႁႅင်းသိုၵ်းၼပ်ႉႁူဝ်ႁဵင် ၶဝ်ႈၵုမ်းထိင်းဝႆႉ ဝဵင်းတၢင်ႉယၢၼ်း တင်ႈတႄႇလိူၼ် July, 11 ဝၼ်း မႃး တေႃႇႁၢၼ်ႉၼႆႉ။ ဝၢႆးၼၼ်ႉဢမ်ႇႁိုင် သိုၵ်းတႆးပွတ်းႁွင်ႇၵေႃႈဝႃႈ ဢဝ်ႁူမ်ႇလူမ်ႈဝဵင်းမိူင်းယႆၼႆသေ ဢဝ်ႁႅင်းၵူၼ်းႁဵင်ပၢႆ ယူႇဝႆႉၼႂ်းဝဵင်းမိူင်းယႆဢမ်ႇႁိုင် ၵမ်းလိုၼ်းၵေႃႈ လႆႈထွႆဢွၵ်ႇၶိုၼ်းသိုၵ်းတင်းၼမ်ဝႃႈ ၼႆ။

ၶေႃႈယိူင်းဢၢၼ်း ၵၢၼ်မိူင်းၸုမ်းသိုၵ်းဝ ၼၼ်ႉ ပဵၼ်တႃႇႁႂ်ႈလႆႈၸႄႈမိူင်းဝႃႉ ၸွမ်းၼင်ႇ ၶႂ်ႈလႆႈမိူင်းတႆး ပွတ်းဢွၵ်ႇၶူင်းတင်းမူတ်းသေ တုၵ်းယွၼ်းတီႈ ၸုမ်းသိုၵ်းမၢၼ်ႈလႄႈ လူင်ပွင်ၸိုင်ႈမႃး ၵူႈပၢၼ်ပၢၼ်။

ၽူႈလူင်ႉလႅၼ်ႇတင်းၵၢၼ်မိူင်း ၵၢၼ်သိုၵ်း လၢတ်ႈဝႃႈ မိူင်းႁူမ်ႈတုမ်ၼႆႉ ၵၢၼ်ယိုတ်းဢၢမ်းၼၢတ်ႈ 2 ပၢၼ် ( 1988 လႄႈ 2021 ) ၼႆႉ ၸုမ်းသိုၵ်းဝ လႆႈၼမ်ႉတွၼ်းၼႃႈတီႈၵုမ်းၵမ်ၼမ်မႃးလိူဝ်ၵဝ်ႇ၊ ပီႊ1989 ၼၼ်ႉ သိုၵ်းဝႃႉၽိုၼ်ႉဝၢႆႇပၵပသေ ဢဝ်ၵတ်းယဵၼ်တင်း သိုၵ်းမၢၼ်ႈ ၊ ၸွႆႈတိုၵ်းသိုၵ်းမၢၼ်ႈ လူင်းမႃးမိူင်းတႆးပွတ်းၸၢၼ်း တိုၵ်းတင်း MTA ၊ လႆႈၼႃႈတီႈၵုမ်းၵမ် သႂ်ႇၸိုဝ်ႈဝႃႈ ဝႃႉပွတ်းၸၢၼ်း ၼႆမႃး။ ဝၢႆးပီႊ2021 ၶွင်ႇသီႇသိုၵ်းမၢၼ်ႈ သိမ်းဢႃႇၼႃႇၼႆႉၵေႃႈ ၼႂ်းပီႊ2024 လႆႈၵုမ်းထိင်း ပၢင်လူင် ၊ ႁူဝ်ပၢင်ႇ ဢၼ်သိုၵ်းၵဝ်ႈၵၢင်ႉတိုၵ်းသိမ်းလႆႈသေ ဢၢပ်ႈပၼ်သိုၵ်းဝ ၊ တေႃႇထိုင် ၶဝ်ႈၵုမ်းထိင်း ဝဵင်းတၢင်ႉယၢၼ်း တင်းတူၵ်းၶူင်း၊ ၼႃႈတီႈၶဝ်ၵုမ်းၵမ်ၼမ်မႃးလိူဝ်ၵဝ်ႇလႄႈ ၽႄႈဢႃႇၼႃႇဢေႃးၸႃႇ ၼႂ်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ မိူၼ်ၼင်ႇ သိုၵ်းTNLA , AA , MNDAA ဝႃႈၼႆ။

လိူဝ်ၼၼ်ႉ သိုၵ်းဝ လႆႈပဵၼ်ၼႂ်းၸုမ်းဢွၼ်ႁူဝ်ၵၢၼ်မိူင်းၸၢဝ်းၶိူဝ်းယိပ်းၵွင်ႈၵၢင်ႇ 7 ၸုမ်း ( FPNCC ) သေ ဢမ်ႇၵဵဝ်ႇၶွင်ႈတင်းၵၢၼ်သိုၵ်းဝႃႈၼႆ။

မိူင်းႁူမ်ႈတုမ်ၼႆႉ ထိုင်ဝႆႉၸၼ်ႉၶၵ်ႉဢဝ်ဢဵၼ်ႁႅင်းသိုၵ်း ၵႅတ်ႇၶႄၸိူဝ်ႉၶိူဝ်း ပူၵ်းပွင်သုၼ်ႇလႆႈၸၢဝ်းၶိူဝ်းၽႂ်မၼ်းပဵၼ်လၵ်းသေ လဵၼ်ႈၵေႃႉႁဵတ်းဢူၺ်းလီၵၼ်လႄႈ ၽႂ်မေႃသၢင်ႈၵေႃႈ မၼ်းလႆႈၼမ်ႉမျၢတ်ႈၼမ်ႉတွၼ်း ၼမ် လႆႈႁၼ်ဝႆႉ ၼင်ႇၼႆ။

ပၢႆၵမ် − လိူတ်ႈတႆး (လွႆၸၢင်ႉ မိူင်းၵိုင်) ၊
တႅမ်ႈ − 19/September/2024 ။

ပွင်ႈၵႂၢမ်းၼႆႉ ပဵၼ်ၶေႃႈသဵင် တၢင်းႁၼ်ထိုင်သုၼ်ႇတူဝ် ၽူႈတႅမ်ႈလိၵ်ႈၵူၺ်းလႄႈ ဢမ်ႇၸႂ်ႈ ၶေႃႈၶၢၼ်ႇပၢၵ်ႇ သိုဝ်ႇၶၢဝ်ႇတႆးလွတ်ႈလႅဝ်း