ၵူၼ်းမိူင်းယဵပ်ႇၺႃးမၢၵ်ႇတီႈဝဵင်းၼမ်ႉၶမ်း

မိူဝ်ႈဝႃးဝၼ်းထီႉ 30 September 2024 (လိူၼ်သိပ်းလွင်ႈ 13 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ်မွၵ်ႈ 10:00 မူင်း မီးၵူၼ်းမိူင်းၵေႃႉၼိုင်ႈ ၵႂႃႇႁႃတႅပ်းၽိုၼ်း တီႈၵွင်း (ၸၶၢၼ်းတိတ်ႉ) ဝဵင်းၼမ်ႉၶမ်း လႄႈ ၵိုင်ႉၵၢင်ႉယဵပ်ႇၺႃးမၢၵ်ႇသေ ၶႃလႆႈပုတ်းၵႂႃႇၶွၼ်ၼိုင်ႈ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ၵေႃႉယဵပ်ႇၺႃးမၢၵ်ႇၼၼ်ႉ ပဵၼ်ၵူၼ်းၸၢႆး တေမီးဢႃႇယုမွၵ်ႈ 40 ပီႊၼႆႉၶႃႈဢေႃႈ မၼ်းယူႇတီႈလႂ် ၸိုဝ်ႈသင်ၼႆတႄႉၶႃႈႁဝ်းဢမ်ႇႁူႉ ၵူၼ်းမိူင်းၵမ်ႈၽွင်ႈဝႃႈ လႆႈႁၼ်မၼ်း ၵႂႃႇတႅပ်းၽိုၼ်းဢွင်ႈတီႈ ၸၶၢၼ်းတိတ်ႉ မီး 2−3 ဝၼ်းၼႆႉယဝ်ႉ၊ ယွၼ်ႉမၼ်းလႆႈတၢင်းၸဵပ်းမၢတ်ႇႁၢဝ်ႈႁႅင်းလႄႈ ၵူၼ်းႁိမ်းႁွမ်းၸွႆႈၵၼ် ဢဝ်သူင်ႇယူတ်းယႃတူဝ်ဝႆႉတီႈႁူင်းယႃ ဝဵင်းၼမ်ႉၶမ်းယဝ်ႉ ဝႃႈၼႆ။

မိူဝ်ႈၽွင်းပၢင်တိုၵ်း ၸုမ်းသိုၵ်းလုၵ်ႉၽိုၼ်ႉၶဝ်ႈသိမ်းဝဵင်းၼမ်ႉၶမ်းၼၼ်ႉ ဢွင်ႈတီႈ ၵွင်းၸၶၢၼ်းတိတ်ႉၼႆႉ  ၸုမ်းသိုၵ်းမၢၼ်ႈ လႄႈ ၸုမ်းသိုၵ်း TNLA ယၢမ်ႈပဵၼ်ပၢင်တိုၵ်းၵၼ်ႁၢဝ်ႈႁႅင်း ယူႇယဝ်ႉ။

တႆးလွတ်ႈလႅဝ်း