ထိုင် ၼုမ်ႇၸၢႆးယိင်းတႆး ၸိူဝ်းပၢႆႈၶိူဝ်းပၢႆႈမိူင်း

ဢိင်ၼိူဝ်လွင်ႈငဝ်းလၢႆးဝၢၼ်ႈမိူင်းႁဝ်း လုၵ်ႉႁွၼ်ႉလိူတ်ႇမႆႈ ယွၼ်ႉၽေးသိုၵ်းသိူဝ်လႄႈ ၽွၼ်းယွၼ်ႈၵၢၼ်မိူင်းၼၼ်ႉ ႁဵတ်းႁႂ်ႈၵူၼ်းမိူင်းႁဝ်း လွမ်ၶီမႆႈၸႂ်ၸွမ်းဢၼႃႇၵၢတ်ႈမိူဝ်းၼႃႈ ၶွင်ၸိုင်ႈတႆးႁဝ်းယူႇ ႁင်းၽႂ်ႁင်းမၼ်းယူႇ၊ ၼၼ်ႉသေဢမ်ႇၵႃး ယူႇတီႈႁဝ်းပဵၼ်သင်ႇၶႃႇ ၵူၼ်းႁဵတ်းၵၢၼ်သႃႇသၼႃႇ ၼုင်ႈလိူင်သၢင်ႇၵၢၼ်းယူႇၼိူဝ်ၵၢၼ်ႇၼိူဝ်ၵျွင်းၵေႃႈ မီးလွင်ႈမႆႈၸႂ်ၸွမ်း ဝၢၼ်ႈမိူင်းႁဝ်းမိူၼ်ၵၼ်ယူႇ ၼၼ်ႉယဝ်ႉ။

မႃးယၵ်ႉဝၢႆႇတူၺ်းၶိုၼ်း ၼႂ်းမိူင်းၸိုင်ႈတႆးႁဝ်းၶႃႈ ဝၼ်းမိူဝ်ႈၼႆႉ ၵွပ်ႈငဝ်းလၢႆးၵၢၼ်မိူင်းဢမ်ႇလီလႄႈ ၵူၼ်းၼုမ်ႇၸၢဝ်းၶိူဝ်းႁဝ်းၶဝ် ဢမ်ႇဝႃႈဢၼ်ယူႇၼွၵ်ႈမိူင်းၼႂ်းမိူင်း ပႃးဢွၼ်ၵၼ် ၶဝ်ႈႁၢပ်ႇၵၢၼ်သိုၵ်း ၼႂ်းၸုမ်းၸိူဝ်ႉၶိူဝ်းၶဝ် ပဵၼ်ယိုတ်ႈပဵၼ်သၢႆ ထၢၼ်ႈပေႃးလီဢၢမ်းဢေႃးယုၵ်ႉယွင်ႈၼမ်ႉၸႂ်ၶဝ်တႄႉယဝ်ႉ၊ ယၢမ်းၼင်ႇၼၼ်ႉ ၼုမ်ႇတႆးႁဝ်းတႄႉပၢႆႈဝၢၼ်ႈပၢႆႈမိူင်း ပၢႆႈၵၢၼ်ၸိူဝ်ႉၵၢၼ်ၶိူဝ်းသေ ဢဝ်တူဝ်လွတ်ႈႁင်းၽႂ်ႁင်းမၼ်းသေ ၵႂႃႇယူႇဝၢၼ်ႈပိူၼ်ႈမိူင်းပိူၼ်ႈ မီးတၢင်းၼမ်ယဝ်ႉ ဢၼ်ႁူႉပွင်ႇၸႂ်ၵၢၼ်ၸိူဝ်ႉၸၢတ်ႈသေ ၶဝ်ႈႁၢပ်ႇၵၢၼ်သိုၵ်းၵၢၼ်မိူင်းၼၼ်ႉ ႁူဝ်ပၢၵ်ႇလႂ် ဢမ်ႇထိုင်လႆႈ 20% ၼႆလႅပ်ႈတေဢမ်ႇၽိတ်း။

တႃႇမိူင်းတႆး လႄႈၵူၼ်းၶိူဝ်းတႆး ပေႃးတေယူႇလွတ်ႈၵႂႃႇလႆႈၶၢဝ်းယၢဝ်းၼၼ်ႉ မၼ်းယူႇတီႈၸိူဝ်းသူပဵၼ်ၵူၼ်းၼုမ်ႇ တေမီးဢဵၼ်မီးႁႅင်း မီးပၺ်ႇၺႃႇပၢႆးဝူၼ်ႉ လႄႈႁတ်းႁၢၼ်မွၵ်ႈၵႃႈႁိုဝ်ၼၼ်ႉယဝ်ႉ၊ မိူဝ်ႈလဵဝ် ပၢင်တိုၵ်းသိုၵ်းသိူဝ် မၢၵ်ႇမိူဝ်တူဝ်ႈမိူင်းလႄႈ တႃႇၵႅတ်ႇၶႄလႆႈပိုၼ်ႉတီႈၽႂ်မၼ်း လႄႈၶိူဝ်းၸဝ်ႈၵဝ်ႇၼၼ်ႉ ၽႂ်ၵေႃႈၵိူဝ်းဝႃႈမၼ်းယူႇတီႈႁႅင်းသိုၵ်းၵူၺ်းယဝ်ႉၼႆသေ ၸူႉဢဵၼ်ႁႅင်းသိုၵ်းႁင်းၽႂ်ႁင်းမၼ်း ဢမ်ႇလိုဝ်ႈဢမ်ႇသဝ်း ၼင်ႇႁၼ်ၵၼ်ယူႇၼႆႉယဝ်ႉ၊ ၶိူဝ်းပိူၼ်ႈၼႆႉ ၼမ်ႉၸႂ်ႁၵ်ႉၶိူဝ်းၶဝ်မၼ်ႈၵႅၼ်ႇၼႃႇ တူဝ်ၵဝ်ႇၵႂႃႇမီးယူႇ ဝၢၼ်ႈလႂ်မိူင်းလႂ်ၵေႃႈ ပေႃးပိုၼ်ၽၢဝ်ႇႁွင်ႉႁႂ်ႈမႃးႁၢပ်ႇၵၢၼ်ၶိုၼ်းၵေႃႈ တိုၼ်းမႃးႁပ်ႉပုၼ်ႈၽွၼ်းၽႂ်မၼ်းယဝ်ႉ။

တူၺ်းလူး တႆးႁဝ်းၼႆႉမီးဝၢၼ်ႈ မီးမိူင်းႁင်းၶေႃ ဢမ်ႇလူဝ်ႇၵႂႃႇတိုၵ်းႁိမ်ဢဝ်တီႈၽႂ် ႁဝ်းၵူၺ်းလူဝ်ႇၶွတ်ႇလိူတ်ႈၽွမ်ႉသဵင်ၵၼ်သေ ၵႅတ်ႇၶႄဝႆႉၵူၺ်း ၸိူဝ်းဢမ်ႇမီးမိူင်းၼႆႉ ၵူၼ်းၼုမ်ႇၸၢဝ်းပိူၼ်ႈၶတ်းၸႂ်ၶဝ်ႈႁၢပ်ႇၵၢၼ်သိုၵ်းသေ ဢၢၼ်းတိုၵ်းဢဝ်ႁႂ်ႈပေႃးမီးမိူင်းတူဝ်ၵဝ်ႇမႃး။ ၵူၼ်းၼုမ်ႇတႆးႁဝ်းၵေႃႈ ၵိၼ်ၶဝ်ႈသုၵ်းမိူၼ်ပိူၼ်ႈၵူၺ်းလႄႈ ယုမ်ႇဝႃႈတၢင်းႁတ်းႁၢၼ်ၼၼ်ႉ တေဢမ်ႇယွမ်းတၢင်ႇၶိူဝ်းၼင်ႇၵဝ်ႇ။

တႃႇထိင်းသိမ်း လႄႈပိုၼ်ၽႄႈသႃႇသၼႃႇပုတ်ႉထၸဝ်ႈၼၼ်ႉ၊ ဝႆႉပဵၼ်ပုၼ်ႈၽွၼ်းႁဝ်း ၸိူဝ်းယူႇၼႂ်းၽႃႈလိူင်ၼႆႉ ၼႆသေတႃႉ တႃႇတေၵႅတ်ႇၶႄဝၢၼ်ႈမိူင်းတိူင်းၵႃး တီႈယူႇတၼ်းသဝ်း ဢၼ်ပူႇမွၼ်ႇၼၢႆးယႃႈႁဝ်းဢဝ်လိူတ်ႈသၢႆၸႂ်သေ ၵႅတ်ႇၶႄမႃးပၼ်ႁဝ်းၼၼ်ႉတႄႉ ပုၼ်ႈၽွၼ်းမီးၼိူဝ်ႁူဝ်သူ ၵူၼ်းၼုမ်ႇၵူၼ်းၵမ်ၵူႈၵေႃႉၵူႈၵူၼ်းၼႆ ယႃႇလူင်လိုမ်းၵၼ် သေၵမ်း။

ၵူၼ်းၼုမ်ႇယိင်းၸၢႆးတႆးႁဝ်းၸိူဝ်း မီးၼမ်ႉၵတ်ႉတၢင်းၶႅၼ်ႇ လူင်ႉလႅၼ်ႇလိၵ်ႈလၢႆး ႁပ်ႉၸုမ်ႈႁပ်ႉၶူးသေ ၵႂႃႇမီးယူႇတၢင်ႇဝၢၼ်ႈတၢင်ႇမိူင်းၼၼ်ႉၵေႃႈမီးတၢင်းၼမ်၊ ဢမ်ႇမီးၸၼ်ႉလိၵ်ႈသေတႃႉ ၵူၼ်းဢၼ်မီးႁႅင်းတူဝ်လႅတ်းဝႆးၽႂ်းၽၢႆၼၼ်ႉၵေႃႈမီးၼမ်ၼႃႇ ယွၼ်ႉၼၼ်ႉတႃႇၶိူဝ်းတႃႇမိူင်းႁဝ်းၼႆႉ တိုၼ်းမုင်ႈမွင်းႁႅင်းတူဝ်းႁႅင်းၸႂ်၊ လႄႈႁႅင်းၺၢၼ်ႇပၢႆးဝူၼ်ႉသူယူႇၼႆၼၼ်ႉ ယႃႇပေလိုမ်း၊ လိူဝ်ၼၼ်ႉသေဢမ်ႇၵႃး ၵမ်းလိုၼ်းသုတ်းၼႆႉ ၸဝ်ႈယွၼ်းဢဝ်ၵုင်ႇမုၼ်ၵူၼ်းၼုမ်ႇႁဝ်း ၸိူဝ်းမီးၸႂ်ႁၵ်ႉၼိူဝ်ဝၢၼ်ႈမိူင်း ဢမ်ႇပၢႆႈဢဝ်တူဝ်လွတ်ႈသေ ၶဝ်ႈႁၢပ်ႇၵၢၼ် ႁပ်ႉႁၢမ်ပုၼ်ႈၽွၼ်းၽႂ်မၼ်းၸိူဝ်းၼၼ်ႉ ၵူႈၵေႃႉၵူႈၵူၼ်းသေ ၶွတ်ႇယွတ်ႈၶေႃႈၵႂၢမ်းဝႆႉ ၼင်ႇၼႆ။

ရႃႇၸိၼ်ႇတ
03/09/2024

ပွင်ႈၵႂၢမ်းႁူဝ်ၼႆႉ ပဵၼ်ပၢႆးဝူၼ်ႉ ၶေႃႈၵႂၢမ်း ၽူႈတႅမ်ႈလိၵ်ႈၵေႃႉလဵဝ်ၵူၺ်း ဢမ်ႇၸႂ်ႈၶေႃႈၶၢၼ်ပၢၵ်ႇ တႆးလွတ်ႈလႅဝ်း