RCSS/SSA ၸွႆႈထႅမ်ၵူၼ်းထူပ်းၽေးၼမ်ႉထူမ်ႈ တီႈမိူင်းပၼ်ႇ၊ လၢင်းၶိူဝ်း

မိူဝ်ႈဝၼ်းထီႉ 3 October 2024 (လိူၼ်သိပ်းဢဵတ်းမႂ်ႇ 1 ၶမ်ႈ ပီႊတႆး 2118 ၼီႈ) ၽူႈမီးပုၼ်ႈၽွၼ်း RCSS/SSA တၢင်တူဝ် မုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး လႆႈဢဝ်တင်းၶူဝ်းၶွင်ၸမ်ပဵၼ် ၸွႆႈထႅမ်ပၼ်တီႈပေႃႈမႄႈၵူၼ်းမိူင်း ဢၼ်လႆႈႁပ်ႉၽွၼ်းတုမ်ႉယွၼ်ႈယွၼ်ႉၽေးၼမ်ႉထူမ်ႈ ၼႆယူႇယဝ်ႉ။

လႆႈၸွႆႈထႅမ်ပၼ်တီႈၵူၼ်းမိူင်း ဢၼ်မီးယူႇၼႂ်းၸႄႈဝဵင်းမိူင်းပၼ်ႇ လင်ႁိူၼ်းၵူၼ်းတီႈၼႂ်း ပွၵ်ႉဝၢၼ်ႈမႂ်ႇ 200 လင်၊ ဢိူင်ႇႁူဝ်ၽၢႆလူင် 130 လင်၊ ဢိူင်ႇၼမ်ႉတိုင်း 16 လင်၊ ဢိူင်ႇၼႃးလေႃး 10 လင်၊ ဢိူင်ႇသၢဝ်းဝႃး 13 လင် လႄႈ တီႈၼႂ်းၸႄႈဝဵင်းလၢင်းၶိူဝ်းၵေႃႈ မီးယူႇတီႈ ဢိူင်ႇပုင်းထုၼ်လႄႈ ဢိူင်ႇဝၢၼ်ႈတႃႈ 320 လင်ယူႇယဝ်ႉ။

ၼႂ်းမိူင်းတႆးပွတ်းၸၢၼ်းလႄႈပွတ်းဢွၵ်ႇ လႆႈႁပ်ႉၽွၼ်းတုမ်ႉယွၼ်ႈတင်းၼမ် ယွၼ်ႉၽေးသၽႃႇဝ ၼမ်ႉထူမ်ႈႁၢဝ်ႈႁႅင်းသေ တေႃႇထိုင်ယၢမ်းလဵဝ်ၵေႃႈ ယင်းတိုၵ်ႉလူဝ်ႇတၢင်းၸွႆႈထႅမ်ယူႇလႄႈ ၼင်ႇႁိုဝ် ပေႃႈမႄႈပီႈၼွင်ႉ ၼႂ်းမိူင်းၼွၵ်ႈမိူင်း ႁႂ်ႈပေႃးၸၢင်ႈၸွႆႈထႅမ်လႆႈၼၼ်ႉ ယူႇတီႈ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး ၸင်ႇလႆႈမီးမႃး ၵေႃၵမ်ၵၢၼ်ၸွႆႈထႅမ်ၵူၼ်းထူပ်းၽေးၼမ်ႉထူမ်ႈၼႆ ယူႇယဝ်ႉ။

တႆးလွတ်ႈလႅဝ်း