ၸုမ်းၸူၼ် ပႃးၵွင်ႈၶဝ်ႈၸူၼ်ႁိူၼ်းၵူၼ်းမိူင်း ၼႂ်းဝဵင်းလၢႆးၶႃႈ လႆႈၵႂႃႇငိုၼ်းသႅၼ်ပွင်း 2 ႁဵင်ပၢႆ

မိူဝ်ႈၼႂ်းဝၼ်းထီႉ 03 October 2024 (လိူၼ်သိပ်းဢဵတ်းမႂ်ႇ 2 ၶမ်ႈ ပီႊတႆး 2118 ၼီႈ) ၶၢဝ်းယၢမ်းမွၵ်ႈ 16:00 မူင်းပၢႆ မီးၸုမ်းၵူၼ်းၸူၼ် ဢဵၼ်ႁႅင်းၵူၼ်း 5 ၵေႃႉ ပႃးၵွင်ႈၵၢင်ႇၶဝ်ႈၸူၼ် ၼႂ်းႁိူၼ်း လုင်းမွင်ႇလႃႉ + ပႃႈၶႅၵ်ႇ တီႈပွၵ်ႉ 3  ဝဵင်းလၢႆးၶႃႈသေ လႆႈၵႂႃႇၶမ်းတင်းၼမ်လႄႈ ၾူၼ်း 2 ၶိူင်ႈ တင်းမူတ်းတေတူၵ်းမႅၼ်ႈ သၢင်ႉငိုၼ်းမၢၼ်ႈ သႅၼ်ပွင်းမၼ်း 2,000 ပၢႆ ၼႆယဝ်ႉ။

ၵူၼ်းမိူင်းပိုၼ်ႉတီႈလၢတ်ႈၼႄဝႃႈ “ၸႂ်ႈယဝ်ႉၶႃႈ ၸူၼ်ၼႆႉၶဝ်ၶီႇၵႃးမႃး တေမီး 5 ၵေႃႉဢေႃႈ မိူဝ်ႈၶဝ်မႃးၸူၼ်ၼၼ်ႉ တႃႇ 2 ၵေႃႉ ၶိုၼ်ႈမိူဝ်းၼိူဝ်ႁိူၼ်းသေ မိူဝ်းဢဝ်ၵွင်ႈငႃၸဝ်ႈႁိူၼ်းသေ တဵၵ်းယွၼ်းသေႃးတီႈၸဝ်ႈႁိူၼ်းၼႆဢေႃႈ ထႅင်ႈ 3 ၵေႃႉ ဢၼ်ယူႇတီႈတႂ်ႈသမ်ႉ တႃႇၵေႃႉၼိုင်ႈ သွၵ်ႈၸွမ်းၼႂ်းလၢၼ်ႉ၊ ထႅင်ႈၵေႃႉၼိုင်ႈသမ်ႉ သွၵ်ႈတဝ်ႈၸွမ်းၼႂ်းႁွင်ႈထၢပ်ႈတႂ်ႈၶႃႈ လိူဝ်သေၼၼ်ႉတေပႂ်ႉၼႂ်းၵႃးဝႆႉ 1 ၵေႃႉၶႃႈဢေႃႈ ႁိူၼ်းဢၼ်ထုၵ်ႇၸူၼ်ၼၼ်ႉ ၶဝ်တေပိုတ်ႇၶၢႆဝႆႉ ၶူဝ်းၶွင်ဢၼ်ၵဵဝ်ႇၵပ်းၸွမ်း သူၼ်ႁႆႈၼႃး မိူၼ်ၼင်ႇ ၸိူဝ်ႉၽၼ်းၵူႈမဵဝ်း လႄႈၽုၼ်ႇ (မေႇဢေႃးၸႃႇ) ၸိူဝ်းၼႆႉဢေႃႈ လႆႈႁူႉဝႃႈၶဝ်သုမ်းၵႂႃႇ ၶမ်း 10 ၵျၢပ်ႈ၊ တူဝ်ငိုၼ်း 1,200 သႅၼ်၊ ၾူၼ်း လုၼ်ႈ iphone 2 ၶိူင်ႈ တင်းမူတ်းမႅၼ်ႈငိုၼ်းသႅၼ်ပွင်း 2 ႁဵင်ပၢႆၼႆဢေႃႈ” လၢတ်ႈၼႄၼင်ႇၼႆ။

ၼႂ်းၸႄႈဝဵင်းလၢႆးၶႃႈၼႆႉ လိူဝ်သေၵႆႉမီးလွင်ႈလၵ်ႉၵၼ်ၸူၼ်ၵၼ်ယဝ်ႉ ယၢမ်းလဵဝ်မီးပႃး ၸုမ်းဢၼ်ႁဵတ်းၵၢၼ်လႅၼ်ငိုၼ်းပိူၼ်ႈတၢင်းဢွၼ်ႇလၢႆး (ၵျႃးၽႅၼ်ႉ) ၸိူဝ်းၼႆႉပႃးလႄႈ ၵူၼ်းမိူင်းၼႂ်းပိုၼ်ႉတီႈမႆႈၸႂ် ယွၼ်ႉဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။

တႆးလွတ်ႈလႅဝ်း