ဢိတ်ႇသရေး လွၵ်ႇငိူတ်ႈ တေၵႂၢတ်ႇလၢင်ႉလေႇပႃႇၼွၼ်ႇ မိူၼ်ၵႃႇၸႃႇ

မိူဝ်ႈၼႂ်းဝၼ်းထီႉ 8 October 2024 (လိူၼ်သိပ်းဢဵတ်းမႂ်ႇ 6 ၶမ်ႈ ပီႊတႆး 2118 ၼီႈ) ယူႇတီႈ ပႅၼ်ႇၵျမိၼ်ႇ ၼေႇတၼ်ႇယႃႇႁူႇ(Benjamin Netanyahu) ၸွမ်ၽွင်းလူင် ဢိတ်ႇသရေး လႆႈပၼ်ၾၢင်ႉဝႃႈ မိူင်းလေႇပႃႇၼွၼ်ႇ တေၸၢင်ႈထုၵ်ႇပိုတ်းယိုဝ်း မိူၼ်ပိုၼ်ႉတီႈၵႃႇၸႃႇသေ လၢတ်ႈဝႃႈ “ၸူဝ်ႈလေႇပႃႇၼွၼ်ႇ ပႆႇလုပင်းယဵၼ်းပဵၼ် လုမ်ငရၢႆးၼႂ်းပၢင်တိုၵ်း မိူၼ်ၵႃႇၸႃႇၵႂႃႇၼၼ်ႉ သူတိုၵ်ႉမီးတိုဝ်ႉတၢင်း ၵႅတ်ႇၶႄ ႁႄႉၵင်ႈ လေႇပႃႇၼွၼ်ႇယူႇ ဝႃႈၼႆ။

တႃႇသေၵိုတ်းယိုတ်းပၢင်တိုၵ်းလႆႈၼၼ်ႉၵေႃႈ ၵူၼ်းမိူင်းလေႇပႃႇၼွၼ်ႇ ထုၵ်ႇလီ ပူတ်းပွႆႇၸိုင်ႈမိူင်း ဢွၵ်ႇယၢၼ်ပႅတ်ႈၸုမ်းသိုၵ်း Hezbollah ၼႆ ၼေႇတၼ်ႇယႃႇႁူႇ သိုပ်ႇလၢတ်ႈထႅင်ႈၼင်ႇၼႆ။

ၼေႇတၼ်ႇယႃႇႁူႇ ပၼ်ၾၢင်ႉၼင်ႇၼႆပဵၼ်ၽွင်းယၢမ်းဢၼ် တပ်ႉသိုၵ်း ဢိတ်ႇသရေး ၽိူမ်ႉႁႅင်းသိုၵ်းၶဝ်ႈၵႂႃႇၼႂ်းမိူင်းလေႇပႃႇၼွၼ်ႇထႅင်ႈသေ တုၵ်းယွၼ်းႁႂ်ႈ ၵူၼ်းမိူင်း ၶၢႆႉဢွၵ်ႇပၢႆႈၸွမ်းၽင်ႇပၢင်ႇလၢႆႇ ယွၼ်ႉဢိတ်ႇသရေး တေတူင်ႉၼိုင် ၶဝ်ႈတၢင်းပၢင်ႇလၢႆႇ ထႅင်ႈ ၼႆယဝ်ႉ။

ၸုမ်းသိုၵ်းႁႃးမၢတ်ႉသ် လႄႈ ၸုမ်းသိုၵ်း Hezbollah ပိုၼ်ၽၢဝ်ႇဢမ်ႇယွမ်းတေႃႇ ဢိတ်ႇသရေးသေ ၼႂ်းဝၼ်းထီႉ 8 October 2024 ၼၼ်ႉ ယူႇတီႈၵႅမ်ႁူဝ်ပဝ်ႈ ၸုမ်းသိုၵ်း Hezbollah လႆႈလၢတ်ႈဝႃႈ ၸုမ်းသိုၵ်း Hezbollah တေႁဵတ်းႁႂ်ႈၵူၼ်းမိူင်း ဢိတ်ႇသရေး ဢၼ်ပၢႆႈၽေးဢွၵ်ႇၼႂ်းမိူင်းဢိတ်ႇသရေးပွတ်းႁွင်ႇၼၼ်ႉ ဢမ်ႇၸၢင်ႈ ပွၵ်ႈၶိုၼ်းႁိူၼ်း ဝႃႈၼႆ။

မိူဝ်ႈဝၼ်းထီႉ 23 September 2024 ၼၼ်ႉ ဢိတ်ႇသရေး လႆႈပိုတ်းယိုဝ်းသႂ်ႇ ၸုမ်းသိုၵ်း Hezbollah ၼႂ်းမိူင်းလေႇပႃႇၼွၼ်ႇပွတ်းၸၢၼ်း တင်း ပွတ်းဝၼ်းဢွၵ်ႇ သေ တႄႇဢဝ်ဝၼ်းၼၼ်ႉမႃး ႁဵတ်းႁႂ်ႈမီးၵူၼ်းၼႂ်းမိူင်းလေႇပႃႇၼွၼ်ႇလူႉသဵင်ႈတၢႆ ၵႂႃႇယဝ်ႉ 1,150 ၵေႃႉ လႄႈ မီးၵူၼ်းပၢႆႈၽေးယူႇ 1 လၢၼ်ႉပၢႆ ဝႃႈၼႆ။

တႄႇၸဵမ်မိူဝ်ႈၸုမ်းသိုၵ်းႁႃးမၢတ်ႉသ် ပိုတ်းယိုဝ်းသႂ်ႇၼႂ်းမိူင်းဢိတ်ႇသရေး မိူဝ်ႈၼႂ်း ဝၼ်းထီႉ 7 October 2023 ၼၼ်ႉ မီးၵူၼ်းလူႉသဵင်ႈတၢႆမွၵ်ႈ 1,200 ၵေႃႉ လႄႈ ထုၵ်ႇ ၸုမ်းသိုၵ်းႁႃးမၢတ်ႉသ် တီႉၺွပ်းၵႂႃႇ 251 ၵေႃႉ၊ ၼႂ်းၼႆႉတႃႇ 97 ၵေႃႉ တိုၵ်ႉမီးယူႇၼႂ်း ၵႃႇၸႃႇ ၵူၺ်းၵႃႈ ၽၢႆႇဢိတ်ႇသရေး ယုမ်ႇယမ်ဝႃႈ ၼႂ်းၼၼ်ႉလူႉသဵင်ႈတၢႆၵႂႃႇ ယဝ်ႉ 34 ၵေႃႉ လႄႈ ႁဵတ်းႁႂ်ႈဢိတ်ႇသရေး လႆႈပိုတ်းယိုဝ်းတုမ်ႉတွပ်ႇၵႂႃႇၼႂ်းၵႃႇၸႃႇ ၶိုၼ်းသေ မီးၵူၼ်းမိူင်းပႃႇလႅတ်ႉသတၢႆး လႄႈ ၵူၼ်းသိုၵ်းႁႃးမၢတ်ႉသ် လူႉသဵင်ႈတၢႆ ၵႂႃႇယဝ်ႉတီႈဢေႇသုတ်း 41,965 ၵေႃႉသေ ႁိူၼ်းယေးၵေႃႈလူႉၵွႆးမူတ်း ၵူၼ်းမိူင်း ၼႂ်းၵႃႇၸႃႇၸမ်တင်းမူတ်း 2.4 လၢၼ်ႉၵေႃႉ လႆႈႁၢမ်းတီႈယူႇတၼ်းသဝ်းယဝ်ႉ ပွၵ်ႈ 1 ဝႃႈၼႆ။

ဝၢႆးသေၼၼ်ႉမႃး ၽၢႆႇတၢင်းဢိတ်ႇသရေး လႆႈပိုတ်းယိုဝ်းၸုမ်းယိပ်းၵွင်ႈၵၢင်ႇ ၸိူဝ်းဢၼ်လႆႈႁပ်ႉလွင်ႈၵမ်ႉၸွႆႈတီႈဢီႇရၢၼ်ႇ ၸဵမ်ဢဝ် ၼႂ်းမိူင်းလေႇပႃႇၼွၼ်ႇ၊ မိူင်းယေႇမႅၼ်ႇ လႄႈ မိူင်းသီးရီးယိူဝ်း ၼႆယဝ်ႉ။

တႆးလွတ်ႈလႅဝ်း