ၸဝ်ႈၼႃႈတီႈထႆး ၶဝ်ႈယိုတ်းသိမ်းၶွင်ၵိၼ်မိူင်းမၢၼ်ႈ ဢၼ်ၽိတ်းမၢႆမီႈ

ဝၼ်းထီႉ 8 October 2024 (လိူၼ်သိပ်းဢဵတ်းမႂ်ႇ 6 ၶမ်ႈ ပီႊတႆး 2118 ၼီႈ) ၼၼ်ႉ ယူႇတီႈၵႅမ်ၽူႈၼမ်းၼႂ်းၵူႈလွင်ႈလွင်ႈ ၸုမ်းၵေႃႇမတီႇ ၽၢႆႇၶဝ်ႈၼမ်ႉတၢင်းၵိၼ် လႄႈ ဢီႈယႃ လႆႈလၢတ်ႈဝႃႈ မိူဝ်ႈဝၼ်းထီႉ 7 October 2024 ၼၼ်ႉ ၽူႈမီးပုၼ်ႈၽွၼ်း ၼႂ်းၸိုင်ႈထႆးလၢႆလၢႆၽၢႆႇႁူမ်ႈမိုဝ်းၵၼ်သေ ၶဝ်ႈၵူတ်ႇထတ်းလၢၼ်ႉၶၢႆတၢင်းၶၢႆ ဢၼ် ဢဝ်တၢင်းၵိၼ်မိူင်းမၢၼ်ႈၵႂႃႇၶၢႆၼႂ်းမိူင်ထႆး (2)လၢၼ်ႉ ၼႂ်းဢိူင်ႇၶူၵ်ႉၶၢမ် ၸႄႈဝဵင်း သမုတ်ႇသႃၶွၼ်း ၸႄႈတွၼ်ႈသမုတ်ႇသႃၶွၼ်း သေ ၼႂ်းလၢၼ်ႉထီႉ 1 ထူပ်းႁၼ် တၢင်းၵိၼ် ဢၼ်ဢမ်ႇမီးလိၵ်ႈထႆး တင်း တူဝ်ၼပ်ႉၶေႃႈၸီႉၼႄ ဝၼ်းလိူၼ်ပီႊ လႄႈတီႈႁဵတ်းဢွၵ်ႇတၢင်းၵိၼ်(เลขสารบบอาหาร) ႁူမ်ႈတင်းမူတ်း 5,530 ဢၼ်၊ ဢီႈယႃဢၼ်ဢမ်ႇတၢင်ႇသဵၼ်ႈမၢႆပဵၼ်တၢင်းၵၢၼ် 21 မဵဝ်း ႁူမ်ႈ 2,401 ဢၼ်၊ ယႃထိူၼ်ႇယႃၶိူဝ်း ဢၼ်ဢမ်ႇတၢင်ႇသဵၼ်ႈမၢႆပဵၼ်တၢင်းၵၢၼ် လႄႈ ဢမ်ႇမီးလွၵ်းလၢႆးပွင်းဢီႈယႃ 36 မဵဝ်း ႁူမ်ႈ 5,435 ဢၼ်၊ ၶိူင်ႈ ႁဵတ်းႁၢင်ႈၸႃႉပွမ် ဢၼ်ဢမ်ႇလႆႈပွင်ႇလႅင်း၊  ဢၼ်ဢမ်ႇဢမ်ႇမီးလိၵ်ႈထႆး 13 မဵဝ်း ႁူမ်ႈ 810 ဢၼ်၊ ယႃႈႁႄႉယုင်း တင်း ၼမ်ႉယႃႈလွႆးၶူဝ်း 5 မဵဝ်း ႁူမ်ႈ 156 ဢၼ် ၼႆယဝ်ႉ။

လၢၼ်ႉထီႉ 2 သမ်ႉမီး တၢင်းၵိၼ်ဢမ်ႇမီးလိၵ်ႈထႆး လႄႈ တူဝ်ၼပ်ႉၶေႃႈၸီႉၼႄ ဝၼ်းလိူၼ်ပီႊလႄႈတီႈႁဵတ်းဢွၵ်ႇတၢင်းၵိၼ် 6 မဵဝ်း ႁူမ်ႈ 1,302 ဢၼ်၊ ယႃဢမ်ႇတၢင်ႇသဵၼ်ႈမၢႆပဵၼ်တၢင်းၵၢၼ် 2 မဵဝ်း ႁူမ်ႈ 130 ဢၼ်၊ ယႃထိူၼ်ႇယႃၶိူဝ်း ဢမ်ႇတၢင်ႇသဵၼ်ႈမၢႆပဵၼ်တၢင်းၵၢၼ် လႄႈ ဢမ်ႇမီးလွၵ်းလၢႆးပွင်းဢီႈယႃ 2 မဵဝ်း ႁူမ်ႈ 386 ဢၼ်၊ ၶိူင်ႈႁဵတ်းႁၢင်ႈ ဢမ်ႇမီးလိၵ်ႈထႆး 2 မဵဝ်း ႁူမ်ႈ 29 ဢၼ်၊ ယႃႈႁႄႉယုင်း 1 မဵဝ်း 70 ဢၼ် ဝႃႈၼႆ။

ၸွမ်းၼင်ႇမၢႆမီႈမိူင်းထႆးမီးၼၼ်ႉသေ ၽၢႆႇတၢင်းၸဝ်ႈၶွင်လၢၼ်ႉ မီးတၢင်းၽိတ်း မိူၼ်ၼင်ႇ − 1. ၶၢႆဢီႈယႃ လူၺ်ႈဢမ်ႇလႆႈႁပ်ႉဢၶႂၢင်ႉ မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 5 ပီႊ ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 10,000 ဝၢတ်ႇ ႁိုဝ် ၺႃးတၢမ်ႇတင်းသွင်မဵဝ်း လႄႈ ၶၢႆယႃ ဢၼ်ဢမ်ႇလႆႈတၢင်ႇသဵၼ်ႈမၢႆ လွၵ်းလၢႆးပွင်းဢီႈယႃ မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 3 ပီႊ ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 5,000 ဝၢတ်ႇ ႁိုဝ် ၺႃးတၢမ်ႇတင်းသွင်မဵဝ်း၊ 2. တၢင်းၵိၼ် ဢၼ်မီးတူဝ်လိၵ်ႈဢမ်ႇထုၵ်ႇမႅၼ်ႈ မိူၼ်ၼင်ႇ ဢမ်ႇမီးလိၵ်ႈထႆး ဢမ်ႇမီးတူဝ်ၼပ်ႉ ၶေႃႈၸီႉၼႄဝၼ်းလိူၼ်ပီႊတီႈႁဵတ်းဢွၵ်ႇတၢင်းၵိၼ် မီးတၢင်းၽိတ်း ၺႃးတၢမ်ႇ မႂ်ငိုၼ်းဢမ်ႇပူၼ်ႉ 30,000 ဝၢတ်ႇ၊ 3. မီးၶူဝ်းၶွင်ဢၼ်မီးၽေးမဵဝ်းထီႉ 2 ဢၼ်ဢမ်ႇလႆႈႁပ်ႉဢၶႂၢင်ႉ ဢမ်ႇၼၼ် ဢမ်ႇလႆႈတၢင်ႇသဵၼ်ႈမၢႆပဵၼ်တၢင်ၵၢၼ် ယူႇၼႂ်းမိုဝ်း မီးတၢင်းၽိတ်း  တူၵ်းၶွၵ်ႈဢမ်ႇပူၼ်ႉ 3 ပီႊ ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 300,000 ဝၢတ်ႇ ႁိုဝ် ၺႃးတၢမ်ႇတင်းသွင်မဵဝ်း လႄႈ ၶၢႆၶူဝ်းမဵဝ်းမီးၽေး ဢၼ်ၼႄတူဝ်လိၵ်ႈဢမ်ႇထုၵ်ႇမႅၼ်ႈ မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 6 လိူၼ် ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 50,000 ဝၢတ်ႇ ႁိုဝ် ၺႃးတၢမ်ႇတင်းသွင်မဵဝ်း။

4.ၶၢႆၶိူင်ႈႁဵတ်းႁၢင်ႈၸႃႉပွမ် မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 6 လိူၼ် ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 50,000 ဝၢတ်ႇ ႁိုဝ် ၺႃးတၢမ်ႇတင်းသွင်မဵဝ်း လႄႈ ၶၢႆၶိူင်ႈႁဵတ်းႁၢင်ႈ ဢၼ်ဢမ်ႇမီးလိၵ်ႈထႆး မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 3 လိူၼ် ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 30,000 ဝၢတ်ႇ ႁိုဝ် ၺႃးတၢမ်ႇတင်းသွင်မဵဝ်း 5. ၶၢႆယႃထိူၼ်ႇယႃၶိူဝ်း ဢၼ်ဢမ်ႇလႆႈႁပ်ႉဢၶႂၢင်ႉၼၼ်ႉ မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 3 ပီႊ ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 300,000 ဝၢတ်ႇ ႁိုဝ် ၺႃးတင်းသွင်မဵဝ်းသေ ၶၢႆယႃထိူၼ်ႇယႃၶိူဝ်း ဢၼ်ဢမ်ႇတၢင်ႇသဵၼ်ႈမၢႆလွၵ်းလၢႆးပွင်းဢီႈယႃၼၼ်ႉသမ်ႉ မီးတၢင်းၽိတ်း တူၵ်းၶွၵ်ႈဢမ်ႇပူၼ်ႉ 1 ပီႊ ဢမ်ႇၼၼ် ၺႃးတၢမ်ႇမႂ်ငိုၼ်းဢမ်ႇပူၼ်ႉ 100,000 ဝၢတ်ႇ ႁိုဝ် ၺႃးတင်းသွင်မဵဝ်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ ၽူႈမီးပုၼ်ႈၽွၼ်းထႆးၶဝ် တေၵူတ်ႇထတ်း လၢၼ်ႉၶၢႆၶူဝ်း ၶွင် မဵဝ်းဢၼ်ၵဵဝ်ႇၵပ်းပၢႆးယူႇလီ ၼင်ႇၼႅၼ်ႈၼႃ လႄႈ တေဢဝ်တၢင်းၽိတ်း ၸွမ်းၼင်ႇမၢႆမီႈၸိုင်ႈမိူင်းမီးဝႆႉ ၵွပ်ႈၼၼ် ယွၼ်းႁႂ်ႈၸဝ်ႈလၢၼ်ႉတၢင်းၶၢႆ ထတ်းတူၺ်းၵုၼ်ႇၵႃႉဢၼ်တေဢဝ်မႃးၶၢႆၼႂ်းလၢၼ်ႉၸဝ်ႈၵဝ်ႇၼၼ်ႉ ႁႂ်ႈတႅတ်ႈတေႃးလီလီၵွၼ်ႇ ၸင်ႇဢဝ်မႃးၶၢႆ ၶူဝ်းၶၢႆၸိူဝ်းၼၼ်ႉ လူဝ်ႇလႆႈမီးလိၵ်ႈထႆး လႆႈယွၼ်းဢၶႂၢင်ႉႁဵတ်းဢွၵ်ႇ/ဢဝ်ၶဝ်ႈမိူင်းမႃးထုၵ်ႇမႅၼ်ႈမၢႆမီႈ လႄႈ တေလႆႈမီးပႃး တူဝ်ၼပ်ႉ ဢေႃးယေႃး(อย.) (ၶိူင်ႈမၢႆၶႂၢင်ႉတီႈ ၽၢႆႇၶဝ်ႈၼမ်ႉတၢင်းၵိၼ် လႄႈ ဢီႈယႃ မိူင်းထႆး) ဝႃႈၼႆ။

တႆးလွတ်ႈလႅဝ်း