ၶၢဝ်းတၢင်း 4 လိူၼ် ၵူၼ်းမိူင်းတႆးတၢႆယွၼ်ႉၵၢၼ်သိုၵ်းၼမ်လိူဝ်ပိူၼ်ႈ

ၸုမ်းၽၢႆႇၶူၼ်ႉၶႂႃႉၺၢၼ်ႇလိၼ်းထႅတ်ႉ ပိုၼ်ၽၢဝ်ႇၵႂႃႇၼႂ်းဝၼ်းထီႉ 9 October 2024 (လိူၼ်သိပ်းဢဵတ်းမႂ်ႇ 7 ၶမ်ႈ ပီႊတႆး 2118 ၼီႈ) ဝႃႈ ၼႂ်းၶၢဝ်းတၢင်း 4 လိူၼ်ၵူၺ်း ၸုမ်းသိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇသႂ်ႇၵူၼ်းမိူင်းၼႂ်းမိူင်းႁူမ်ႈတုမ် လႄႈ ၼႂ်းၼၼ်ႉ ၵူၼ်းမိူင်းတႆး တၢႆၼမ်လိူၼ်ပိူၼ်ႈသုတ်း ဝႃႈၼႆ။

တင်ႈတႄႇဢဝ်လိူၼ် May 2024 ထိုင် August 2024 ၶၢဝ်းတၢင်း 4 လိူၼ်ၼႆႉ သိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇသႂ်ႇဢွင်ႈတီႈဢၼ် ၵူၼ်းမိူင်းယူႇသဝ်းဝႆႉ ၼႂ်းမိူင်းႁူမ်ႈတုမ်သေ မီးၵူၼ်းမိူင်းလႆႈတၢႆၵႂႃႇ 455 ၵေႃႉ ၼႂ်းၼၼ်ႉပဵၼ်ၵူၼ်းၸၢႆး 82 ၵေႃႉ၊ ၼၢင်းယိင်း 90 ၵေႃႉ၊ လုၵ်ႈဢွၼ်ႇ 40 ၵေႃႉ၊ တႃႇ 243 ၵေႃႉၼၼ်ႉ ဢမ်ႇၸၢင်ႈၸႅၵ်ႇလႆႈဝႃႈ ပဵၼ်ၵူၼ်းၸၢႆးႁိုဝ်ပဵၼ်ၵူၼ်းယိင်း ဝႃႈၼႆ ၊ ၼႂ်းၵူၼ်းၸိူဝ်းလူႉသဵင်တၢႆၵႂႃႇ ယွၼ်ႉသိုၵ်းမၢၼ်ႈၼၼ်ႉ ပႃးဝႆႉၵူၼ်းမိူင်းတႆးပွတ်းႁွင်ႇ 105 ၵေႃႉ တီႈမိူင်းရၶႅင်ႇၼၼ်ႉၵေႃႈ ၵူၼ်းမိူင်းလႆႈတၢႆၵႂႃႇ 101 ၵေႃႉၼႆယဝ်ႉ။

ယွၼ်ႉသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇၼႆႉသေ ဢွင်ႈတီႈၵိူဝ်းယမ်သႃႇသၼႃႇ လႆႈလူႉၵွႆၵႂႃႇ 61 လင်၊ ႁူင်းႁဵၼ်းသွၼ်လိၵ်ႈ 28 လင်၊ ႁူင်းယႃ 16 လင်ၼႆ လႆႈႁၼ် ၸုမ်းၽၢႆႇၶူၼ်ႉၶႂႃႉၺၢၼ်ႇလိၼ်းထႅတ်ႉ ပိုၼ်ၽၢဝ်ႇဝႆႉၼင်ႇၼႆ။

တႆးလွတ်ႈလႅဝ်း