ၽူႈမီးၼမ်ႉၸႂ် ၸွႆႈထႅမ်ၵူၼ်းမိူင်းၸိူဝ်းထူပ်းၽေးၼမ်ႉထူမ်ႈ

ပေႃႈမႄႈၵူၼ်းမိူင်းၸိူဝ်းထူပ်းၽေးၼမ်ႉထူမ်ႈ ၼႂ်းၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း လႆႈႁပ်ႉတၢင်းၸွႆႈထႅမ်တီႈ ၽူႈမီးၼမ်ႉၸႂ်တၢင်းထုင်ႉမၢဝ်း လႄႈ ၼႂ်းၸိုင်ႈမိူင်းၶႄႇ ၼႆယူႇယဝ်ႉ။

မိူဝ်ႈဝၼ်းထီႉ 3 October 2024 ၽူႈမီးၼမ်ႉၸႂ် ဢၼ်ယူႇတီႈဝဵင်းၼမ်ႉၶမ်း ဢဝ်ငိုၼ်း 2,000,000 ပျႃး ၸွႆႈထႅမ်ပၼ်တီႈ ပေႃႈမႄႈၵူၼ်းမိူင်းၸိူဝ်းထူပ်းၽေးၼမ်ႉထူမ်ႈ လႄႈ ဝၼ်းထီႉ 6 October 2024 သိုပ်ႇၸွႆႈထႅမ်ထႅင်ႈ တႃႇ 5,000,000 ပျႃး ႁူမ်ႈပဵၼ် 7,000,000 ပျႃးယူႇယဝ်ႉ။

ၼႂ်းဝၼ်းထီႉ 30 September 2024 ၼၼ်ႉၵေႃႈ ၸုမ်းသၢႆႁိူဝ်ႈလႅင်း ဢၼ်မီးလုၵ်ႈၸုမ်းဝႆႉ တီႈၼႂ်းထုင်ႉမၢဝ်း လႄႈ ၼႂ်းမိူင်းၶႄႇၼၼ်ႉ ၸူႉတုမ်ငိုၼ်းတွင်းၵၼ်လႆႈ 930,000 ပျႃး၊ ပီႈၼွင်ႉတႆးၵမ်ႈၽွင်ႈ ဢၼ်ယူႇသၢင်ႈၵိၼ်သဝ်းဝႆႉထႅင်ႈတီႈ ၼႂ်းမိူင်းၶႄႇၼၼ်ႉၵေႃႈ ၸူႉတုမ်လႆႈငိုၼ်း 390,000 ပျႃး ႁူမ်ႈတၢင်းမူတ်းပဵၼ် 1,320,000 ပျႃးသေ ၸွႆႈထႅမ်ပၼ်တီႈ ၵူၼ်းမိူင်းၸိူဝ်းထူပ်းၽေးၼမ်ႉထူမ်ႈ တီႈၼႂ်းၸႄႈတွၼ်ႈလၢင်းၶိူဝ်းမိူၼ်ၵၼ် ၼႆယဝ်ႉ။

ၵၢၼ်ၸွႆႈထႅမ်ပွၵ်ႈၼႆႉၵေႃႈ ၽူႈမီးၼမ်ႉၸႂ်တီႈထုင်ႉမၢဝ်း လႄႈ ၼႂ်းမိူင်းၶႄႇၼၼ်ႉ ယိူင်းဢၢၼ်းႁႂ်ႈလႆႈပဵၼ် ၵၢၼ်ၵမ်ႉၸွႆႈထႅမ်ၵၼ်ၼႆလႄႈ လႆႈဢဝ်ငိုၼ်းၸွႆႈထႅမ်ဝႆႉတီႈ ၽူႈမီးပုၼ်ႈၽွၼ်းၽၢႆႇၵဵဝ်ႇၶွင်ႈသေ လူဝ်ႇၸႂ်ႉတီႈလႂ်ၵေႃႈႁႂ်ႈဢဝ်ၸႂ်ႉတိုဝ်းၵႂႃႇ ပုၼ်ႈတႃႇၵူၼ်းမိူင်း ၸိူဝ်းထူပ်းၽေးၼမ်ႉ ၼႆယူႇယဝ်ႉ။

တႆးလွတ်ႈလႅဝ်း