လွႆၵေႃႇဝၼ်း ၶုၵ်းထူပ်းၸဝ်ႈမုၼ်ယႂ်ႇၶုၼ်ႁေႃၶမ်းထႆး ပႃးထီႉ 9 ၼွၼ်းၽႄး

မိူဝ်ႈဝႃး ဝၼ်းထီႉ 13 October 2024  ၽူႈယႂ်ႇၵူၼ်းလူင် ၼႂ်းမုၵ်ႉၸုမ်း ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) လႄႈ ၵေႃႉသိုၵ်းၵေႃႉႁၢၼ် ပေႃႈမႄႈၵူၼ်းမိူင်း ဢၼ်ယူႇၼႂ်းၼႃႈလိၼ်သိုၵ်းမၢႆ 1 လွႆၵေႃႇဝၼ်းၼၼ်ႉ လႆႈၸတ်းႁဵတ်း ပၢင်ၶုၵ်းထူပ်းဢဝ်ၵုင်ႇမုၼ် ၸဝ်ႈမုၼ်ႈယႂ်ႇၶုၼ်ႁေႃၶမ်းထႆး ပႃးထီႉ 9 ဢၼ်လႆႈၼွၼ်းၽႄးၵႂႃႇ မိူဝ်ႈပီႊ 2016  ၼၼ်ႉယဝ်ႉ။

တႄႇၼႂ်း ယၢမ်းၵၢင်ၼႂ် 5:30 မူင်း လႆႈတၢင်ႇသွမ်းတေႃႇၽြႃးပဵၼ်ၸဝ်ႈ၊ ၵၢပ်ႈသွမ်းသင်ႇၶႃႇၸဝ်ႈ၊ လူႇတၢၼ်းယၢတ်ႇၼမ်ႉ ဢွင်ႈတီႈဝတ်ႉၵေႃႇဝၼ်းဢိၼ်း ၽႄၵုသူဝ်ႇထိုင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး ပႃးထီႉ 9 ဢၼ်လႆႈၼွၼ်းၽႄးၵႂႃႇၼၼ်ႉ ၼႆယူႇယဝ်ႉ။

ထိုင်မႃးယၢမ်းႁူဝ်ၶမ်ႈ  19:00 မူင်း တီႈႁူင်းႁေႃးပၢင်ႇပဵင်းၾႃႉၼၼ်ႉၵေႃႈ လႆႈတႄႇၶပ်ႉမၢႆပၢင်ၶုၵ်းထူပ်းၵႂႃႇသေ ယူႇတီႈ ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ 1 လႆႈဢွၼ်ဝၢင်းတူင်ႇမွၵ်ႇမွင်ၸႂ် ၽၢႆႇၼႃႈႁၢင်ႈၸဝ်ႈမုၼ်ယႂ်ႇၶုၼ်ႁေႃၶမ်းထႆး ပႃးထီႉ 9  လႄႈ  ၽူႈယႂ်ႇၵူၼ်းလူင်ထႅင်ႈလၢႆလၢႆၸဝ်ႈ လႆႈသိုပ်ႇဝၢင်းတမ်းၵႂႃႇၸွမ်း။ သိုပ်ႇၼၼ်ႉ ၽူႈၸိူဝ်းၶိုၼ်ႈႁွတ်ႈတင်းသဵင်ႈ ဢွၼ်ၵၼ်ၸပ်းတဵၼ်းပူႇၸေႃႇ ၼႂ်းမိုဝ်းသေ တိူင်ႇၵၢဝ်ႇယွၼ်းသူးၵႂႃႇ လႄႈ လႆႈဢွၼ်ၵၼ်ၸုၵ်းၼိမ်ယဵၼ် ၶုၵ်းထူပ်းထိုင် ၸဝ်ႈမုၼ်ယႂ်ႇၶုၼ်ႁေႃၶမ်းထႆး ဢၼ်လႆႈၸၢမ်ႇပူႈၼွၼ်းၽႄး လပ်ႉလွႆငိုၼ်းလွႆၶမ်းၵႂႃႇ တဵမ် 8 ပီႊ ၼၼ်ႉ ၼႆယူႇယဝ်ႉ။

သိုပ်ႇသေၼၼ်ႉ ႁူမ်ႈၵၼ်တႆႈတဵၼ်း ၽၢႆႇၼႃႈႁၢၼ်ႉၶဵင်ႇ ပၢင်ၶုၵ်းထူပ်း ၸဝ်ႈမုၼ်ယႂ်ႇၶုၼ်ႁေႃၶမ်းထႆး လႄႈ ယွၼ်းသူးတိူင်ႇၵၢဝ်ႇၽႂ်မၼ်းသေယဝ်ႉ ပၢင်ၶုၵ်းထူပ်း ၸဝ်ႈမုၼ်ယႂ်ႇၶုၼ်ႁေႃၶမ်းထႆး ပႃးထီႉ 9 ၼွၼ်းၽႄးၵေႃႈ ယဝ်ႉတူဝ်ႈၵႂႃႇလီငၢမ်း ယူႇယဝ်ႉ။

တႆးလွတ်ႈလႅဝ်း