ၽူႈမီးပုၼ်ႈၽွၼ်း RCSS/SSA ႁူပ်ႉထူပ်းၸွႆႈထႅမ်ၵူၼ်းမိူင်း

မိူဝ်ႈဝႃး ဝၼ်းထီႉ 13 October 2024 (လိူၼ်သိပ်းဢဵတ်းမႂ်ႇ 11 ၶမ်ႈ ပီႊတႆး 2118 ၼီႈ) ၽူႈမီးပုၼ်ႈၽွၼ်း လႄႈ ၵေႃႉသိုၵ်းၵေႃႉႁၢၼ် RCSS/SSA လႆႈဢွၼ်ၵၼ် လူင်းႁူပ်ႉထူပ်းၵူၼ်းမိူင်း တီႈၼႂ်းဢိူင်ႇၵဵင်းလူမ်း ဝဵင်းၵႃလိ လႄႈ လႆႈၸတ်းႁဵတ်းပႃး ပၢင်မွၵ်ႇလၢတ်ႈၶေႃႈၵႂၢမ်းပၼ်ႁႅင်းၸႂ်ၵူၼ်းမိူင်းၵႂႃႇ ယူႇယဝ်ႉ။

ၼႂ်းၼၼ်ႉၵေႃႈ လႆႈလၢတ်ႈထိုင်ပႃး လွင်ႈလူဝ်ႇမေႃၽွမ်ႉသဵင်ပဵင်းပၢၵ်ႇၵၼ်၊ လွင်ႈမေႃၸွႆႈထႅမ်ၵၼ်၊ လွင်ႈၵမ်ႉထႅမ်ၵၢၼ်ႁဵၼ်းလုၵ်ႈဢွၼ်ႇ ႁႂ်ႈလႆႈၶိုၼ်ႈႁူင်းႁဵၼ်း၊ လွင်ႈမေႃထိင်းသိမ်းၽႅၼ်ႇလိၼ်ဝၢၼ်ႈမိူင်းႁဝ်း ယဝ်ႉၵေႃႈ လႆႈလၢတ်ႈထိုင်ပႃး လွင်ႈတႃႇတေမႄးသဵၼ်ႈတႃႈသၢႆတၢင်း ၶူဝ်ဢၼ်လႆႈလူႉၵွႆၵႂႃႇ ၸိူဝ်းၼႆႉယဝ်ႉ။

လိူဝ်ၼၼ်ႉၵေႃႈ လႆႈဢဝ်တင်းၶူဝ်းၵိၼ်ယႅမ်ႉ မီးၸဵမ် ၵိူဝ်၊ ၽွင်ဝၢၼ်၊ ၼမ်ႉမၼ်း၊ ထူဝ်ႇၼဝ်ႈ ၸႅၵ်ႇပၼ်တီႈၵူၼ်းမိူင်း ၼႂ်းဝၢၼ်ႈပၢင်သၵ်း 21 လင်ႁိူၼ်းလႄႈ ဝၢၼ်ႈၼႃးၵေႉ 37 လင်ႁိူၼ်းၵႂႃႇ ယူႇယဝ်ႉ။

ၸွမ်းၼင်ႇ လၵ်းၼမ်းပေႃႇလသီႇ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး ၶေႃႈထီႉ 4 ဢၼ်မီးဝႆႉဝႃႈ ပူၵ်းပွင်ၽဝၵူၼ်းမိူင်း ၼႆၼၼ်ႉ ယူႇတီႈၽူႈမီးပုၼ်ႈၽွၼ်း RCSS/SSA ၵေႃႈ လႆႈသိုပ်ႇတူင်ႉၼိုင်ႁဵတ်းသၢင်ႈၵႂႃႇ ယူႇယဝ်ႉ။

တႆးလွတ်ႈလႅဝ်း