သိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈဝၢၼ်ႈဢီႇၼၢႆး

မိူဝ်ႈၼႆႉဝၼ်းထီႉ 14 October 2024 (လိူၼ်သိပ်းဢဵတ်းမႂ်ႇ 12 ၶမ်ႈ ပီႊတႆး 2118 ၼီႈ) ယၢမ်းတဵင်ႈၶိုၼ်း 00:10 မူင်း ၸုမ်းသိုၵ်းမၢၼ်ႈဢဝ်ႁိူဝ်းမိၼ် ၵႂႃႇပွႆႇမၢၵ်ႇသႂ်ႇ တီႈဝၢၼ်ႈဢီႇၼၢႆး ဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ လႄႈ မီးၵူၼ်းမိူင်းလႆႈတၢႆ 3 ၵေႃႉ မၢတ်ႇၸဵပ်း 2 ၵေႃႉ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ သိုၵ်းမၢၼ်ႈ ပွႆႇမၢၵ်ႇတီႈဝၢၼ်ႈဢီႇၼၢႆးၼႆႉ မီးမွၵ်ႈ 7 လုၵ်ႈ လႄႈ ၵူၼ်းမိူင်း တၢႆ 3 ၵေႃႉ ပဵၼ်ၵူၼ်းၸၢႆးလၢႆလၢႆ၊ ဢၼ်လႆႈတၢင်းမၢတ်ႇၸဵပ်းသမ်ႉ မီးမႄႈထဝ်ႈၵေႃႉၼိုင်ႈလႄႈ လုၵ်ႈဢွၼ်ႇဢႃႇယု 4 ၶူပ်ႇၵေႃႉၼိုင်ႈ၊ ႁိူၼ်းၵူၼ်းမိူင်းလူႉၵွႆၵႂႃႇမွၵ်ႈ 6 လင်၊ ဢွင်ႈတီႈဢၼ် သိုၵ်းမၢၼ်ႈပွႆႇမၢၵ်ႇၼႆႉ ဢမ်ႇလႆႈၵဵဝ်ႇၶွင်ႈၸွမ်းၵၢၼ်သိုၵ်း ဝႃႈၼႆ။

မိူဝ်ႈလဵဝ်တၢင်းၽၢႆႇၽူႈမီးပုၼ်ႈၽွၼ်းၶဝ် တိုၵ်ႉသိုပ်ႇၵူတ်ႇထတ်းဝႆႉ လွင်ႈလူႉသုမ်း တီႈၼႂ်းဝၢၼ်ႈဢီႇၼၢႆး လႄႈ ဝၢၼ်ႈဢီႇၼၢႆး ၵေႃႈမီးၸၢဝ်းၶိူဝ်းတႆး ယူႇသၢင်ႈၵိၼ်သဝ်းဝႆႉတင်းၼမ်မိူၼ်ၵၼ်ၼႆယဝ်ႉ။

တႆးလွတ်ႈလႅဝ်း