သိုၵ်းမၢၼ်ႈပွႆႇမၢၵ်ႇသႂ်ႇတီႈဝဵင်းၼွင်ၶဵဝ် လႄႈ မီးၵူၼ်းမိူင်းလႆႈမၢတ်ႇၸဵပ်းတၢႆ

မိူဝ်ႈၼႆႉဝၼ်းထီႉ 19 October 2024 (လိူၼ်သိပ်းဢဵတ်းလွင်ႈ 2 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ်ၸဝ်ႉၼၼ်ႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ ၼႂ်းပွၵ်ႉၸၢၼ်း ဝဵင်းၼွင်ၶဵဝ် လႄႈ မီးၵူၼ်းမိူင်းလႆႈတၢႆ 3 ၵေႃႉ မၢတ်ႇၸဵပ်း 3 ၵေႃႉယူႇယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မိူဝ်ႈယၢမ်းၵၢင်ၼႂ်ၸဝ်ႉ 05:15 မူင်းၼၼ်ႉ မၢၵ်ႇသိုၵ်းမၢၼ်ႈၵႂႃႇတူၵ်းသႂ်ႇတီႈႁိူၼ်း ဢူးၵျေႃႇ လႄႈ ဢူးၵျေႃႇတင်းလုၵ်ႈသၢဝ်မၼ်း 2 ၵေႃႉ လႆႈလူႉသဵင်ႈၵႂႃႇယဝ်ႉ၊ မိူဝ်ႈယၢမ်း 05:25 မူင်းၼၼ်ႉ ႁိူဝ်းမိၼ်သိုၵ်းမၢၼ်ႈ ၵႂႃႇပွႆႇမၢၵ်ႇထႅင်ႈ ပွၵ်ႈၵမ်း 2 လႄႈ ၵႂႃႇတူၵ်းသႂ်ႇတီႈႁိူၼ်း ဢူးပျႃး သေ မီးၵူၼ်းၼႂ်းႁိူၼ်းလႆႈမၢတ်ႇၸဵပ်းႁၢဝ်ႈႁႅင်း 3 ၵေႃႉ ၼႆယဝ်ႉ။

သိုၵ်းမၢၼ်ႈပွႆႇမၢၵ်ႇသႂ်ႇတီႈဝဵင်းၼွင်ၶဵဝ် ပွၵ်ႈၵမ်းၼႆႉ မီးႁိူၼ်းၵူၼ်းမိူင်းလူႉၵွႆၸမ် 20 လင် လႄႈ မိူဝ်ႈလဵဝ်ၽူႈၵဵဝ်ႇၶွင်ႈၶဝ် တိုၵ်ႉသိုပ်ႇဢွၼ်ၵၼ်ၵူတ်ႇထတ်းၼႂ်းပိုၼ်ႉတီႈ လႄႈ ႁႃၸွႆႈထႅမ်ၵၼ်ဝႆႉယူႇ ၼႆယဝ်ႉ။

မိူဝ်ႈၼႆႉ ယၢမ်းၵၢင်ၼႂ်ၸဝ်ႉၵူၺ်းၼင်ႇၵဝ်ႇ ၸုမ်းသိုၵ်းမၢၼ်ႈဢဝ်ႁိူဝ်းမိၼ် ၵႂႃႇပွႆႇမၢၵ်ႇ သႂ်ႇတီႈဝဵင်းလၢဝ်ႇၵၢႆး လႄႈ ၵဵဝ်ႇလူၺ်ႈလွင်ႈလူႉသုမ်းတႄႉဢမ်ႇပႆႇလႆႈႁူႉၸွမ်း။

တႆးလွတ်ႈလႅဝ်း