သိုၵ်းမၢၼ်ႈပွႆႇမၢၵ်ႇသႂ်ႇတီႈဝဵင်းလႃႈသဵဝ်ႈထႅင်ႈ

မိူဝ်ႈၼႆႉဝၼ်းထီႉ 22 October 2024 (လိူၼ်သိပ်းဢဵတ်းလွင်ႈ 5 ၶမ်ႈ ပီႊတႆး 2118 ၼီႈ) ၸုမ်းသိုၵ်းမၢၼ်ႈဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈၼႂ်းပွၵ်ႉ 12 ဝဵင်းလႃႈသဵဝ်ႈ လႄႈ မီးၵူၼ်းမိူင်းလႆႈမၢတ်ႇၸဵပ်းၵမ်ႈၽွင်ႈ ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ ၸုမ်းသိုၵ်းမၢၼ်ႈၶဝ် ဢဝ်ႁိူဝ်းမိၼ် ၵႂႃႇပွႆႇမၢၵ်ႇသႂ်ႇ တီႈပွၵ်ႉ 12 ၼၼ်ႉ ပဵၼ်ၶၢဝ်းယၢမ်းတဵင်ႈၶိုၼ်း မွၵ်ႈ 00:30 မူင်းၼႆႉၶႃႈ၊ ယွၼ်ႉၸၢၵ်ႇမၢၵ်ႇလႄႈ ၵူၼ်းမိူင်းလႆႈမၢတ်ႇၸဵပ်း 2 ၵေႃႉ ၵူၺ်းဢမ်ႇပေႃး ႁၢဝ်ႈႁႅင်းၼင်ႇၵဝ်ႇ၊  ႁိူၼ်းၵူၼ်းမိူင်းသမ်ႉလႆႈလူႉၵွႆ 3 လင် ဝႃႈၼႆ။

မိူဝ်ႈဝႃးဝၼ်းထီႉ 21 October 2024 ၼႆႉၵေႃႈ ၸုမ်းသိုၵ်းမၢၼ်ႈဢဝ်ႁိူဝ်းမိၼ် ပွႆႇမၢၵ်ႇသႂ်ႇတီႈ ဝဵင်းၼွင်ၶဵဝ် လႄႈ ဝၢၼ်ႈၵျွၵ်ႉၽိဝ်ႇ ၸႄႈဝဵင်းၼမ်ႉသၼ်ႇသေ မီးၵူၼ်းမိူင်းလႆႈမၢတ်ႇၸဵပ်းသေဢမ်ႇၵႃး ႁိူၼ်းယေး ဢိၵ်ႇပႃး ၵျွင်းသွမ်း ၵျွင်းမုၼ်ၸဝ်ႈၵေႃႈ လႆႈလူႉၵွႆတင်းၼမ် ယူႇယဝ်ႉ။

တႆးလွတ်ႈလႅဝ်း