သိုၵ်းမၢၼ်ႈၸီႉသင်ႇႁႂ်ႈႁဵတ်းပွႆးလိူၼ်သိပ်းသွင်မူၼ်း

ၽွင်းဝၢၼ်ႈမိူင်းသုၵ်ႉယုင်ႈ ဢမ်ႇၼိမ်ဢမ်ႇသဝ်းၼႆႉ ၸုမ်းသိုၵ်းမၼ်ႈၸီႉသင်ႇႁႂ်ႈ ၵူၼ်းမိူင်းဝဵင်းလူင်တူၼ်ႈတီး ၸတ်းႁဵတ်းပၢင်ပွႆးလိူၼ်သိပ်းသွင်မူၼ်း ဢၼ်တေထိုင်ၼႂ်းလိူၼ်ၼႃႈၼႆႉ လႄႈ ႁႂ်ႈႁၢင်ႈႁႅၼ်းဝႆႉပႃး ႁူင်းၾႆးမိၼ် ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ “ပေႃးၸူးၸႂ်ၵူၼ်းမိူင်းတႄႉ ဢမ်ႇၶႂ်ႈၸတ်းႁဵတ်းသေဢိတ်းပွႆးၼႆႉ ယွၼ်ႉဝႃႈတီႈမိူင်းတႆးပွတ်းႁွင်ႇ လႄႈ မိူင်းတႆးပွတ်းၸၢၼ်း မၢင်ပိုၼ်ႉတီႈ လႆႈထူပ်းၽေးပၢင်တိုၵ်းၼမ်ႁႅင်းၼႃႇ ဢမ်ႇမီးၸႂ်ၶႂ်ႈၵျေႃႇၶႂ်ႈလၢဝ်းသင်ယဝ်ႉ၊ ၵူၼ်းမိူင်းတီႈပွတ်းႁွင်ႇၵေႃႈ ပၢႆႈၽေးမႃးယူႇသဝ်းဝႆႉတီႈ ဝဵင်းတူၼ်ႈတီးၼမ်ဝႃႈၼမ်၊  ၊ ၸုမ်းသိုၵ်းမၢၼ်ႈသမ်ႉ ၶိုင်ၸတ်းႁဵတ်းပွႆး လိူၼ်သိပ်းသွင်မူၼ်းလႄႈ ၵဵပ်းငိုၼ်းၵူၼ်းမိူင်း တင်း ၸဝ်ႈပၢႆးမၢၵ်ႈမီးၶဝ် ပေႃးဝႃႈႁိူၼ်းဢၼ်ပိုတ်ႇလၢၼ်ႉတၢင်းၶၢႆဝႆႉၼႆ တေလႆႈသႂ်ႇငိုၼ်း 30,000 ပျႃး” ဝႃႈၼႆ။

“ၵႃႈၶၼ်ႁူင်းၾႆးမိၼ်ၼၼ်ႉ ပေႃးဝႃႈဢၼ်ပွႆႇၶိုၼ်ႈၵၢင်ၶမ်ႈၵၢင်ၶိုၼ်း လႄႈ မီးပႃးယၢမ်းတၢင်းႁၢင်ႈလီၼႆ  ၼိုင်ႈလုၵ်ႈၵႃႈၶၼ်တေမီးမွၵ်ႈ 7,000,000 ပျႃး၊ ပေႃးဝႃႈႁူင်းၾႆးမိၼ် ဢၼ်ပဵၼ်တၢင်းႁၢင်ႈလီလႄႈ ဢမ်ႇပႃးယၢမ်းၸွမ်းၼၼ်ႉ ၼိုင်ႈလုၵ်ႈၵႃႈၶၼ်မီးမွၵ်ႈ 4,000,000 ပျႃး ၼႆႉ၊ မိူဝ်ႈလဵဝ်သမ်ႉဝၢၼ်ႈမိူင်းသုၵ်ႉ ပၢႆးမၢၵ်ႈမီးတူၵ်းလႄႈ ၵူၼ်းမိူင်းၵမ်ႉၼမ် ဢမ်ႇမီးၵၢၼ်ႁဵတ်း မၢင်ၸိူဝ်းၵေႃႈဢမ်ႇမီးငိုၼ်း” ဝႃႈၼႆ။

ပၢင်ပွႆးလိူၼ်သိပ်းသွင်မူၼ်းၼႆႉ ၸုမ်းသိုၵ်းမၢၼ်ႈတေတႄႇၸတ်းႁဵတ်း ၼႂ်းဝၼ်းထီႉ 9−15 November 2024  ၶၢဝ်းတၢင်း 7 ဝၼ်း လႄႈ လႆႈႁူႉဝႃႈၵူၼ်းမိူင်းမၢင်ၸိူဝ်း တေဢမ်ႇၵႂႃႇၶဝ်ႈပၢင်ပွႆး ၼႆယူႇယဝ်ႉ။

တႆးလွတ်ႈလႅဝ်း