သိုၵ်းမၢၼ်ႈပွႆႇမၢၵ်ႇသႂ်ႇႁူင်းႁုင်လဝ်ႈ

မိူဝ်ႈၼႆႉဝၼ်းထီႉ 23 October 2024 (လိူၼ်သိပ်းဢဵတ်းလွင်ႈ 6 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ် 08:00 မူင်းပၢႆ သိုၵ်းမၢၼ်ႈဢဝ်ႁိူဝ်းမိၼ်ၵႂႃႇပွႆႇမၢၵ်ႇသႂ်ႇ တီႈဝၢၼ်ႈမႄႈႁၢၼ်ႇ ႁိမ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵဵဝ်ႇၵပ်းလူၺ်ႈလွင်ႈၼႆႉ ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ မၢၵ်ႇသိုၵ်းမၢၼ်ႈ ပွႆႇတူၵ်းလူင်းမႃးၼၼ်ႉ တူၵ်းတိူဝ်ႉၸပ်း ႁူင်းႁုင်လဝ်ႈ တီႈဝၢၼ်ႈမႄႈႁၢၼ်ႇ လူႉၵွႆၵႂႃႇၶႃႈဢေႃႈ၊ ၵူၼ်းမိူင်းတႄႉဢမ်ႇမီးလွင်ႈမၢတ်ႇၸဵပ်းၼင်ႇၵဝ်ႇၶႃႈ၊ ယွၼ်ႉၸၢၵ်ႇမၢၵ်ႇသေ ၶူဝ်းၶွင်တီႈႁူင်းႁုင်လဝ်ႈၼၼ်ႉ လႆႈလုၵ်ႉပဵၼ်ၾႆးၵမ်ႈၽွင်ႈ လႄႈ တၢင်းၽၢႆႇၽူႈၵဵဝ်ႇၶွင်ႈၶဝ်ၵေႃႈ ဢွၼ်ၵၼ်ၵႂႃႇၸွႆႈၶႄၾႆးဝႆႉယူႇ ဝႃႈၼႆ။

တီႈဝဵင်းလႃႈသဵဝ်ႈၼႆႉ မိူဝ်ႈဢွၼ်တၢင်းမီး ငဝ်ႈငုၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) လႄႈ ထုၵ်ႇၺႃးၸုမ်းသိုၵ်းၵူဝ်းၵၢင်ႉ MNDAA ယိုတ်းသိမ်းလႆႈသေ ၼင်ႇႁိုဝ် ပေႃးတေဢမ်ႇပူၵ်းပွင် ၼႂ်းၶူးၼႂ်းဝဵင်းလႆႈၶိုၼ်းၼၼ်ႉ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ် ၵမ်းၵမ်းၵႂႃႇပွႆႇမၢၵ်ႇသႂ်ႇ ၼႂ်းပိုၼ်ႉတီႈဢမ်ႇထၢတ်ႇဢမ်ႇဝၢႆးယူႇယဝ်ႉ။

မိူဝ်ႈဝႃးဝၼ်းထီႉ 22 October 2024 ၼႆႉၵေႃႈ ၸုမ်းသိုၵ်းမၢၼ်ႈ ဢဝ်ႁိူဝ်းမိၼ်ပွႆႇမၢၵ်ႇသႂ်ႇ တီႈၼႂ်းပွၵ်ႉ 12 လႄႈ မီးၵူၼ်းမိူင်းမၢတ်ႇၸဵပ်း 2 ၵေႃႉယူႇယဝ်ႉ။

တႆးလွတ်ႈလႅဝ်း