ၵူဝ်းရီးယႃးႁွင်ႇ သူင်ႇသိုၵ်း 3 ႁဵင် ၵႂႃႇၽိုၵ်းၽွၼ်ႉ ၼႂ်းမိူင်းရၢတ်ႉသျႃး

မိူဝ်ႈၼႆႉဝၼ်းထီႉ 24 October 2024 (လိူၼ်သိပ်းဢဵတ်းလွင်ႈ 7 ၶမ်ႈ ပီႊတႆး 2118 ၼီႈ) သိုဝ်ႇၶၢဝ်ႇ VOA ဢွၵ်ႇဝႆႉ ၵဵဝ်ႇလူၺ်ႈလွင်ႈ ၵူဝ်းရီးယႃးၸၢၼ်း ဢွၵ်ႇမႃးလၢတ်ႈဝႃႈ ၵူဝ်းရီးယႃးႁွင်ႇ သူင်ႇၵူၼ်းသိုၵ်းမွၵ်ႈ 3,000 ၵေႃႉ ၵႂႃႇတီႈမိူင်းရၢတ်ႉသျႃး တႃႇၽိုၵ်း ၽွၼ်ႉၸႂ်ႉတိုဝ်းတရူၼ်း လႄႈ ၶိူင်ႈယိပ်းတိုၵ်းၼႂ်းၵၢၼ်သိုၵ်း ၼႆယဝ်ႉ။

ၵဵဝ်ႇလူၺ်ႈလွင်ႈၼႆႉသေ Lloyd Austin ၽွင်းလူင်ၽၢႆႇၵႅတ်ႇၶႄ မိူင်းဢမေႇရိၵၢၼ်ႇ ဢွၵ်ႇမႃးယိုၼ်ယၼ်လၢတ်ႈဝႃႈ မီးၵူၼ်းသိုၵ်းၵူဝ်းရီးယႃးႁွင်ႇ ထုၵ်ႇသူင်ႇၵႂႃႇတီႈမိူင်း ရၢတ်ႉသျႃးတႄႉယူႇ လႄႈ သင်ၸိူဝ်ႉၵူဝ်းရီးယႃးႁွင်ႇၶဝ်ႈႁူမ်ႈရၢတ်ႉသျႃး တိုၵ်းယူႇၶရဵၼ်း ပွၵ်ႈၵမ်းၼႆႉၼႆၸိုင်  ဢမ်ႇၵႃးၼႂ်းပွတ်းတွၼ်ႈယူးရူပ်ႇၵူၺ်းဢၼ်တေလႆႈႁပ်ႉၽွၼ်းတုမ်ႉယွၼ်ႈမၼ်း  ပွတ်းတွၼ်ႈ ဢိၼ်ႇတူဝ်ႇပႄႇသိၾိၵ်ႇတင်းသဵင်ႈ ၵေႃႈ တိုၼ်းတေလႆႈႁပ်ႉၽွၼ်းယွၼ်ႈမၼ်းပႃးယဝ်ႉဝႃႈၼႆ။

မိူဝ်ႈဝူင်ႈပူၼ်ႉမႃးၼၼ်ႉ ၽၢႆႇၵူဝ်းရီးယႃးၸၢၼ်းၵေႃႈ လႆႈဢွၵ်ႇမႃးလၢတ်ႈဝႃႈ ၵူဝ်းရီးယႃးႁွင်ႇ သူင်ႇၵူၼ်းသိုၵ်းၼႂ်းတပ်ႉၶိုၵ်ႉတွၼ်း ၵႂႃႇတီႈ မိူင်းရၢတ်ႉသျႃးပွတ်းဝၼ်းဢွၵ်ႇ  1,500ၵေႃႉ တႃႇၶဝ်ႈႁူမ်ႈၵၢၼ်ၽိုၵ်းၽွၼ်ႉလႄႈႁႂ်ႈမိုတ်ႈရႃႇသီႇဢုတု မိုတ်ႈတင်းၼႃႈလိၼ်မိူင်းရၢတ်ႉသျႃး တီႈၼႂ်းတပ်ႉပၢင်သဝ်းတီႈၼိုင်ႈ ၼႆသေတႃႉ ၵူၺ်းၵႃႈၽၢႆႇရၢတ်ႉသျႃး တင်း ၵူဝ်းရီးယႃးႁွင်ႇ တႄႉ ဢွၵ်ႇမႃးပၢၵ်ႈပႅတ်ႈလွင်ႈၼႆႉၵႂႃႇ မိူၼ်ၵၼ်။

ၼွၵ်ႈလိူဝ်သေၼႆႉ ၸွမ်ၸိုင်ႈယူႇၶရဵၼ်း သေႇလႅၼ်ႇသၵီႇ လႆႈလၢတ်ႈဝႃႈ မီးႁၢႆးငၢၼ်းၶၢဝ်ႇလပ်ႉဝႃႈ ၵူဝ်းရီးယႃးႁွင်ႇ တေသူင်ႇၵူၼ်းသိုၵ်းမွၵ်ႈ 10,000 ၵေႃႉ ၶဝ်ႈႁူမ်ႈ ၸွမ်းတပ်ႉသိုၵ်းရၢတ်ႉသျႃး ၼႆယဝ်ႉ။

ၼႂ်းၶၢဝ်းတၢင်း 2 ပီႊ ပူၼ်ႉမႃးၼၼ်ႉ ရၢတ်ႉသျႃး လႄႈ ၵူဝ်းရီးယႃးႁွင်ႇ လႆႈတိူဝ်ႉၽိူမ်ႉ လွင်ႈႁူမ်ႈမိုဝ်းၽၢႆႇၵၢၼ်သိုၵ်းၵၼ်တိူဝ်းၼမ်ၶိုၼ်ႈမႃးသေဢမ်ႇၵႃး ယင်းလႆႈတူၵ်းလူင်းၽၢႆႇၵၢၼ်သိုၵ်း မိူဝ်ႈၼႂ်းလိူၼ် June 2024 တႃႇၸတ်းႁႃလွင်ႈၸွႆႈထႅမ်ပၼ်ၵၼ် သင်ၸိူဝ်ႉထုၵ်ႇၽူႈၶဵၼ်ၶဝ်ႈပိုတ်းယိုဝ်း ဝႃႈၼႆ။

ပိူဝ်ႈတႃႇတေႃႇသူႈသၢၼ်ၶတ်း လွင်ႈႁူမ်ႈမိုဝ်းၵူဝ်းရီးယႃးႁွင်ႇ လႄႈ ရၢတ်ႉသျႃးၼၼ်ႉ ၼႆသေ မိူဝ်ႈဝႃးဝၼ်းထီႉ 23 October 2024 ၼၼ်ႉ ၽၢႆႇၵူဝ်းရီးယႃးၸၢၼ်း လၢတ်ႈဝႃႈ ၵူဝ်းရီးယႃးၸၢၼ်း တေၸၢင်ႈၼပ်ႉသွၼ်ႇ တႃႇသူင်ႇၶိူင်ႈယိပ်း ပၼ်ယူႇၶရဵၼ်းၵမ်ႈသိုဝ်ႈယူႇ ၼႆယဝ်ႉ။

ၸိူင်ႉႁိုဝ်ၵေႃႈလီ ယၢမ်းၽွင်းတေႃႈလဵဝ် ၵူဝ်းရီးယႃးႁွင်ႇ မီးၵူၼ်းသိုၵ်းယူႇ  1.2 လၢၼ်ႉၵေႃႉ လႄႈ တေလႆႈဝႃႈ ပဵၼ်ၸိုင်ႈမိူင်းဢၼ်မီးသိုၵ်းၼမ် မိူင်းၼိုင်ႈ ၼႆယူႇ။

တႆးလွတ်ႈလႅဝ်း