ၵူၼ်းၸူၼ်ပေႃႉထုပ်ႉသွင်ၵေႃႉမႄႈလုၵ်ႈတၢႆၵေႃႉၼိုင်ႈ

မိူဝ်ႈဝႃးဝၼ်းထီႉ 24 October 2024 (လိူၼ်သိပ်းဢဵတ်းလွင်ႈ 7 ၶမ်ႈ ပီႊတႆး 2118 ၼီႈ) ယၢမ်းၵၢင်ၼႂ်မွၵ်ႈ 09:00 မူင်းပၢႆ သွင်ၵေႃႉမႄႈလုၵ်ႈ လုၵ်ႉတီႈဝဵင်းၵလေႃး (ၵၢတ်ႇလေႃႉ) သေ ပွၵ်ႈၵႂႃႇတီႈႁိူၼ်း ဝဵင်းဢွင်ႇပၢၼ်းၼၼ်ႉ ထုၵ်ႇၺႃးၵူၼ်းၸူၼ် ပေႃႉထုပ်ႉၸွမ်းတၢင်း လႄႈ လႆႈလူႉသဵင်ႈတၢႆၵႂႃႇၵေႃႉၼိုင်ႈ ဝႃႈၼႆ။

ၵူၼ်းမိူင်းၼႂ်းပိုၼ်ႉတီႈလၢတ်ႈၼႄဝႃႈ တေႃႇၼီႇလႃႇထူၺ်း ဢႃႇယု 47 ပီႊ လႄႈလုၵ်ႈၸၢႆးမၼ်း မၢၼ်ႇမိၼ်ႉၵျေႃႇ ဢႃႇယု 20 ပီႊ လုၵ်ႉတီႈဝဵင်းၵလေႃးသေ ပွၵ်ႈၶိုၼ်းတီႈႁိူၼ်းဢွင်ႇပၢၼ်း လႄႈ ၽွင်းၼၼ်ႉၵေႃႉပဵၼ်မႄႈႁူဝ်မဝ်းၼႆ လႄႈ လႆႈၵိုတ်းလိုဝ်ႈႁိူဝ်ႉတီႈ သဵၼ်ႈတၢင်းၶိုၼ်ႈလွႆမႄႈၶူဝ်ႇ တၢင်းၶဝ်ႈဝဵင်းဢွင်ႇပၢၼ်း ၵမ်းၼၼ်ႉမီးၵူၼ်းၸူၼ် 2 ၵေႃႉ ႁေႃႈလူတ်ႉၶိူင်ႈၵႂႃႇၸူးၶႃမႄႈလုၵ်ႈ ၶိုၼ်းဢဝ်ထူင် ဢၼ်သႂ်ႇဝႆႉမၢၵ်ႇႁိၼ်ၼၼ်ႉ ပေႃႉထုပ်ႉၸွမ်းၵွၵ်းႁူဝ်ၶႃမႄႈလုၵ်ႈ လႄႈ လႆႈတၢင်းၸဵပ်းမၢတ်ႇႁၢဝ်ႈႁႅင်းဝႆႉ။

တေႃႇၼီႇလႃႇထူၺ်းၼၼ်ႉ ယွၼ်ႉလႆႈတၢင်းၸဵပ်းမၢတ်ႇ ၸွမ်းၵွၵ်းႁူဝ်ႁၢဝ်ႈႁႅင်းလႄႈ မၼ်းၼၢင်းႁွတ်ႈတီႈႁူင်းယႃၸဝ်ႈၸၢမ်ႇထုၼ်း ဝဵင်းလူင်တူၼ်ႈတီး မွၵ်ႈၶိုင်ႈၸူဝ်ႈမူင်းၵူၺ်း လႆႈလူႉသဵင်ႈၵႂႃႇယဝ်ႉ၊ ၵေႃႉပဵၼ်လုၵ်ႈၸၢႆးမၼ်းၵေႃႈ ၵွၵ်းႁူဝ်တႅၵ်ႇ ထိုင်တီႈပေႃးႁၼ်ပႃးဢွၵ်းဢေႃမၼ်းလူးၵွၼ်ႇ မိူဝ်ႈလဵဝ်တႄႉ လႆႈၶဝ်ႈယူတ်းယႃတူဝ်ဝႆႉၼႂ်းႁွင်ႈ ICU ဝႃႈၼႆ။

ၵူၼ်းၸူၼ် 2 ၵေႃႉၼၼ်ႉပဵၼ်ၽႂ်ယူႇတီႈလႂ်ၼႆၼၼ်ႉၵေႃႈ ဢမ်ႇပႆႇမီးၽႂ်ႁူႉ လႄႈ လႆႈငိၼ်းဝႃႈ ၶႃသွင်ၵေႃႉမႄႈလုၵ်ႈ လႆႈသုမ်းလူတ်ႉၶိူင်ႈ တင်း ၶူဝ်းၶွင်ငိုၼ်းၶမ်းထႅင်ႈၵမ်ႈၽွင်ႈ ၼႆယဝ်ႉ။

တႆးလွတ်ႈလႅဝ်း