သိုၵ်းမၢၼ်ႈဢဝ်ၸိူၵ်ႈမတ်ႉၵူၼ်းထဝ်ႈလႄႈၵၼ်ႉၸၼ်လူလၢႆ

မိူဝ်ႈဝၼ်းထီႉ 26 October 2024 (လိူၼ်သိပ်းဢဵတ်းလွင်ႈ 9 ၶမ်ႈ ပီႊတႆး 2118 ၼီႈ) ၸုမ်းသိုၵ်းမၢၼ်ႈ ၶဝ်ႈၵႂႃႇၼႂ်းသူၼ်ၶဝ်ႈၵၢပ်ႇ တီႈဝၢၼ်ႈၼွင်ဝူဝ်း ၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်းသေ ဢဝ်ၸိူၵ်ႈမတ်ႉမႄႈထဝ်ႈၵေႃႉၼိုင်ႈ လႄႈ ၵၼ်ႉၸၼ်လူလၢႆ ၼင်ႇမိူၵ်ႈမိူၵ်ႈလိူင်းလိူင်း။

ၵူၼ်းမိူင်းၼႂ်းပိုၼ်ႉတီႈလၢတ်ႈတီႈသိုဝ်ႇၶၢဝ်ႇ DVB ဝႃႈ ၽွင်းမႄႈထဝ်ႈၵေႃႉၼိုင်ႈ ဢႃႇယု 56 ပီႊ ယူႇဝႆႉတီႈၼႂ်းသူၼ်ၶဝ်ႈၵၢပ်ႇၼၼ်ႉ မီးသိုၵ်းမၢၼ်ႈ 2 ၵေႃႉ ႁွတ်ႈၽႅဝ်ၵႂႃႇၼႂ်းသူၼ် လႄႈ ၶိုၼ်းဢဝ်ၸိူၵ်ႈမတ်ႉမႄႈထဝ်ႈၼၼ်ႉသေ တဵၵ်းၵၼ်ႉၸၼ်လူလၢႆ ၼင်ႇမိူၵ်ႈမိူၵ်ႈလိူင်းလိူင်း၊ တေႃႈၼင်ႇၵူၼ်းဢႃႇယုယႂ်ႇ သိုၵ်းမၢၼ်ႈ တင်းႁတ်းႁဵတ်းလွင်ႈမိူၵ်ႈလိူင်းၸိူင်ႉၼႆလႄႈ ပေႃးပဵၼ်ၼၢင်းယိင်းဢွၼ်ႇၼႆ ၶႅၼ်းလီမႆႈၸႂ်တႄႉတႄႉယဝ်ႉ၊ သိုၵ်းမၢၼ်ႈ 2 ၵေႃႉၼႆႉ ဝၢႆးၵၼ်ႉၸၼ် မႄႈထဝ်ႈယဝ်ႉၼၼ်ႉ ၶိုၼ်းပွၵ်ႈမိူဝ်းၵႂႃႇတီႈ ၼိူဝ်လွႆၼွင်ဝူဝ်း ဝႃႈၼႆ။

ၼႂ်းပိုၼ်ႉတီႈၼွင်ဝူဝ်းၼႆႉ ၸုမ်းသိုၵ်းမၢၼ်ႈ လႄႈ ၸုမ်း PDF ပဵၼ်ပၢင်တိုၵ်းၵၼ် ၶၢဝ်းတၢင်းႁိုင်မွၵ်ႈ 8 လိူၼ်သေ ၵူၼ်းမိူင်းၼႂ်းပိုၼ်ႉတီႈၵေႃႈ လႆႈဢွၼ်ၵၼ် ငိူင်ႉဝႄႈပၢင်တိုၵ်း ပၢႆႈၶဝ်ႈယူႇၸွမ်းသူၼ်/ၸွမ်းၼႂ်းထိူၼ်ႇ ႁႃဢွင်ႈတီႈလွတ်ႈၽေး ႁင်းၽႂ်ႁင်းမၼ်းဝႆႉ ယူႇယဝ်ႉ။

တႆးလွတ်ႈလႅဝ်း